सर्वोच्चमा न्यायाधीश नियुक्ति नहुँदा न्याय सम्पादनमा असर पर्न थालेको छ । पछिल्लो समय बार र बेन्चको असमझदारीले न्यायपरिषद्को बैठकै बस्न नसकेपछि नियुक्ति प्रक्रिया रोकिएको हो । ६५ वर्षे उमेर हदका कारण प्रधानन्यायाधीश विश्वम्भरप्रसाद श्रेष्ठले असोज २० मा अनिवार्य अवकाश पाउने भएकाले अहिले बिदामा छन् । यसअघि नै ५ न्यायाधीशको दरबन्दी रिक्त छ ।
चालु आर्थिक वर्षको दुई महिना (साउन र भदौ) मा राजस्व संकलनमा सुधार देखिएको छ । यस अवधिमा सरकारले १ खर्ब ६६ अर्ब ३८ करोड राजस्व संकलन गरेको छ । यो वार्षिक लक्ष्यको ११.७२ प्रतिशत र गत वर्षको सोही अवधिको तुलनामा करिब १८ प्रतिशतले बढी हो । गत आर्थिक वर्षको पहिलो दुई महिनामा सरकारले १ खर्ब ४१ अर्ब ७ करोड राजस्व संकलन गरेको थियो ।
संघीय संसद्को चौथो ठूलो दल रास्वपाको प्रथम राष्ट्रिय भेला मंगलबार राजधानीमा सुरु भएको छ । सांगठनिक, वैचारिक र नीतिगत स्पष्टताका लागि आयोजना गरिएको केन्द्रीय परिषद्को भेलामा मुलुकभित्र र प्रवासका गरी दुई हजारभन्दा बढी सहभागी छन् ।
स्टार्टअप उद्यम कर्जाका लागि ५ हजार २ सय ५० उद्यमीले परियोजना प्रस्ताव पेस गरेका छन् । औद्योगिक व्यवसाय विकास प्रतिष्ठानले भदौ ११ मा सूचना सार्वजनिक गर्दै २१ दिनभित्र परियोजना प्रस्ताव पेस गर्न आह्वान गरेको थियो ।
आधा दर्जन सहकारी संस्थाबाट अर्बभन्दा बढी रकम गोर्खा मिडिया नेटवर्क र अन्य कम्पनीमा लगेर अपचलन गरेको आरोप लागेका गितेन्द्रबाबु (जीबी) राईलाई सरकारी संयन्त्रले नै भगाएको खुलेको छ । राईको राहदानी रोक्का भएको आठ दिनमै संघीय सरकारको सहकारी विभाग र अध्यागमन कार्यालयको मिलेमतोमा देश छाड्ने बाटो खोलिएको पाइएको छ ।
संसदीय छानबिन विशेष समितिको प्रतिवेदनले सहकारीको बचत अपचलन, हिनामिना र ठगीमा प्रत्यक्ष संलग्नहरू पक्राउ गरेर अनुसन्धान एवं मुद्दाको प्रक्रिया अघि बढाउन बाटो खोले पनि कार्यान्वयन कसरी र कहिले हुन्छ भन्नेबारे सरकारले स्पष्ट गरिसकेको छैन । गृहमन्त्री रमेश लेखकले प्रतिवेदनमा रहेका तथ्य–प्रमाण तथा विश्लेषणका आधारमा अघि बढ्ने बताएका छन् ।
यस वर्षको दसैं सुरु हुन अब १५ दिन मात्र बाँकी रहे पनि काठमाडौं उपत्यकाबाट बाहिरिने यात्रुका लागि गाडीको अग्रिम टिकट बुकिङ खुल्ला गर्नेबारे सरकारले अझै सुरसार गरेको छैन । प्रायः घटस्थापनादेखि उपत्यकाबाट बाहिरिले क्रमले तीव्रता पाउने गरेको छ ।
सुदूरपश्चिमको विकासका लागि महत्त्वपूर्ण मानिएको चैनपुर सेती जलविद्युत् आयोजनाको काम दुई महिनादेखि ठप्प छ । नेपाल विद्युत् प्राधिकरणले निर्माण गरिरहेको २ सय १० मेगावाट क्षमताको आयोजना निर्माणको काम गर्दा सम्बद्ध सरकारी प्रक्रिया पूरा नगरी थालिएको भन्दै डिभिजनल वन कार्यालय बझाङले रोकेको हो ।
२२.१२°C काठमाडौं
