Saint Lucia er eit land og ei øy som ligg i Atlanterhavet og høyrer til verdsdelen Nord-Amerika. Hovudstaden heiter Castries.
Saint Lucia
Faktaboks
- Hovudstad
- Castries
- Innbyggjartal
- 183 300
- Storleik
- 610 km²
- Statsform
- monarki
- Statsoverhovud
- kong Charles 3
- Språk
- engelsk
- Nasjonaldag
- 13. desember
- Valuta
- østkaribisk dollar
St. Lucia (mørkegrønt) ligg i Nord-Amerika (lysegrønt).
Natur og klima
Saint Lucia og nabolanda
Saint Lucia ligg i Karibia og grensar mot både Karibhavet og Atlanterhavet. Saint Lucia er litt større enn Oslo i storleik.
Det er mange strender, klipper, korallrev og små øyar og skjer ved kysten. Det er òg vulkanar, regnskog, elvar, daler og låge fjell i landet. Det høgaste punktet ligg 950 meter over havet.
Det lever få pattedyr på land på Saint Lucia, men det finst mellom anna mange artar av flaggermus. I havet er det delfinar, haiar og mange andre ulike fiskeartar. Det lever også havskjelpadder i landet.
Saint Lucia får straum og energi frå både fossilt brennstoff og fornybare energikjelder.
Saint Lucia har eit tropisk klima, med varmt vêr heile året. Landet er i periodar utsett for orkanar.
Folk og kultur
Biletet er frå finalen i 100-meter i OL i Paris i 2024. Julien Alfred frå Saint Lucia, som leiar, vann løpet. Gullet hennar var Saint Lucia sin første OL-medalje nokon gong.
Over 80 prosent av befolkninga er av afrikansk opphav. Mange er etterkomarar av slavar. Over ein tredel av befolkninga bur i og omkring hovudstaden Castries.
Engelsk er offisielt språk. Nesten heile befolkninga reknar seg som kristne, og over 60 prosent er katolikkar.
Grunnskulen er gratis, og alle barn må gå på skule frå dei er 5 til 15 år. Landet har eitt universitet.
Cricket, fotball og friidrett er populære idrettar blant barn og ungdom.
Politikk og økonomi
Saint Lucia er eit demokrati og monarki. Den britiske monarken er statsoverhovud, og landet er medlem av Samveldet av nasjonar. Det er regjeringa og statsministeren som styrar i landet.
Det har i periodar vore mykje arbeidsløyse i landet. Folka som bur på landsbygda og driv jordbruk til eige forbruk har lågast inntekt.
Mange menneske i landet jobbar med turisme, handel og jordbruk. Landet tener pengar på mellom anna turisme og på å selje frukt til andre land.
Saint Lucia er medlem av mellom anna FN, Verdsbanken og Samveldet av nasjonar.
Historie
Det har budd menneske på øya som no heiter Saint Lucia i rundt 2000 år. Då europearar kom dit på 1500-talet, budde folkegruppa kalinago (også kalt karibar) der.
Dei neste hundreåra døydde dei fleste i urbefolkninga av sjukdommar som europearane førte med seg. Mange slavar blei henta frå Afrika, for å arbeide på dei store gardane kalla plantasjar.
Saint Lucia blei ein britisk koloni i 1814. Storbritannia styrte landet heilt fram til Saint Lucia blei sjølvstendig i 1979.
Det er i dag store skilnader mellom dei som har høg og låg inntekt i landet. Saint Lucia har dei siste tiåra satsa mykje på turisme.
