Jærbladet

Jærbladet starta med nettavis i 1998. Hausten 2013 innførte bladet betalingsmur for å gje andre enn abonnentar høve til å lesa avisa på nettet. Jærbladet hadde i fjerde kvartal 2023 registrert i gjennomsnitt 36 644 daglege lesarar på papir og nett, ifølgje statistikk frå Mediebedriftenes Landsforening.

Jærbladet vart skipa i 1949, med nynorsk som dominerande målform. Avisa vart skapt for eit jordbruksdistrikt med innslag av landbruksbasert industrielt entreprenørskap som vaks kraftig med oljeøkonomien frå 1970-åra. Redaktør og skipar var Jon Fatnes, som nokre år hadde vore Sandnes-korrespondent for Stavanger Aftenblad, og som i 1936 hadde grunnlagt avisa Hallingdølen i Ål i Hallingdal.

Kommunane Time, Hå og Klepp er det sentrale nedslagsfeltet, men avisa har etter kvart også strekt seg mot Sola og Sandnes. Til å byrje med var det historiske artiklar og nyhende som fylte sidene, ved sida av annonsar. Etter kvart vart stofftilfanget meir variert. Både kultur og sport fann sin plass i spaltene, overskriftene vaks, bileta vart større og lesarbreva fleire. Nynorsk har heile tida vore den dominerande målforma, og avisa har frå starten av vore politisk nøytral.

Fatnes var redaktør til han døydde i august 1979. Nokre månader seinare tok Jostein Fylling over redaktørstolen og vart sitjande til 1995. Deretter følgde Ivar Rusdal fram til 2008. Jærbladet byrja med éin skrivande medarbeidar, som òg var redaktøren. I jubileumsåret 1999 hadde avisa ni journalistar, redaktøren medrekna, og 18 tilsette i marknadsavdeling, elektronisk produksjon og ekspedisjon.

Den første tida vart Jærbladet prenta på ei lita presse hos bokhandlar Jonas Jørstad på Bryne. Seinare skjedde trykkinga hos Jærprent AS, og midt i 1950-åra fekk dei ei flatrotasjonspresse som gjorde det mogleg å utvide sidetalet frå fire til åtte. I 1974 gjekk avisa over til offset i Rogalands Avis, og frå 1995 har Jærbladet vore prenta hos Dalane Tidende i Egersund. Frå 1. september 1986 kom avisa ut tre gonger i veka. I 2004 gjekk ho over til tabloidformat. Driftsselskapet engasjerte seg også i andre avisutgivingar i distriktet.

Til og med 2015 gjeld opplagstala berre papirutgåva. Frå 2020 blir netto opplagstal for digitalt abonnement og papirabonnement brukt. Kjelda er opplagstala avisene rapporterer til Mediebedriftenes Landsforening.

• Prøvenummer 21.10.1949, ordinære nummer frå 3.12.1949.
• Nettavis frå 1998.

• Norsk presses historie
• avis
• lokalavis

• Jærbladet

• Gudleiv Forr: «Jærbladet», i Idar Flo (red.): Norsk presses historie, bd. 4. Oslo 2010
• Jostein Fylling: Avisa på Jæren. Jærbladet 50 år. 1949–1999. Bryne 1999
• Ottar Grepstad: Avisene som utvida Noreg. Oslo 2010