Fjordabladet

Fjordabladet nyttar betalingsmur for ikkje-abonnentar som vil lesa avisa på nettet. Det gjennomsnittlege talet på daglege lesarar av papirutgåva og nettavisa var fjerde kvartal 2023 totalt 6208, ifølgje statistikk frå Mediebedriftenes Landsforening.

Etter ein kort periode i Bergens Tidende flytta juristen Otto Blehr til Eid i 1872 for å vikariere som sorenskrivar i Nordfjord. Den komande statsministeren skjøna kva makt som låg i det trykte ord i kampen for liberale og nasjonale idear, og i november 1873 tok han initiativ til lutlaget som danna grunnlaget for den fyrste avisa i Nordfjord. Avisa skulle ut i januar, men oppstarten av boktrykkeriet til ingeniør Dahl måtte utsetjast. Difor leid det utpå sommaren 1874 før bladstyrar Edvard Kr. Storm Blom kunne sende ut fyrste nummer av Fjordenes Blad, som førebels blei trykt i Bergen.

Blom var fødd i Stavanger, utdanna jurist og eitt år yngre enn Blehr. Medan Blehr kort tid etter flytta til eit nytt embete i Sogn og starta ei ny avis, skapte Blom ei sverdrupsk opposisjonsavis som blei teken godt imot av nordfjordingane. Blom forlét eit blad i medgang i 1882. Dei neste åra hadde boktrykkarane Dahl, Marthinussen og Olsen bladstyraransvaret etter tur, heilt til Mons Syltevik overtok i 1885. Syltevik var frå Geiranger og tok med seg sine sunnmørske indremisjonsverdiar inn i avisa. Brotet med fortida førte avisa mot stupet, abonnentane likte slett ikkje at bladet la seg på denne tunge og alvorsfylte linja. Syltevik slutta tidsnok til at avisa kunne reddast. I 1892 overtok den omtykte krigskommissæren John Myklebust og førte avisa tilbake til reine Venstre. Overgangen til offentleg aksjeselskap i 1895 gjorde sitt til å føre avisa vidare framover.

Fjordenes Blad rådde grunnen aleine i fleire tiår, men fekk etter kvart konkurranse frå aviser som etablerte seg ytst (Måløy 1910) og inst (Stryn 1929) i Nordfjorden. Desse la seg til høgre for Fjordenes Blad. I 1920 skifta avisa namn til Fjordabladet, slik det høvde seg for eit Venstre-organ midt i nynorsken sitt kjerneområde. Sidan 1911 hadde avisa kome ut tre dagar i veka. Etter krigsstansen auka ho frå to til tre utgåver fyrst i 1974.

Fjordabladet sitt opplag har auka lite sidan 1945, i motsetnad til konkurrerande aviser i nabolaget. Abonnentane er blitt relativt færre, både i aust og i vest, og er i dag stort sett å finne i Eid kommune.

Fjordabladet vart kåra til «Årets lokalavis» i 1994.

Til og med 2015 gjeld opplagstala berre papirutgåva. Frå 2020 vert netto opplagstal for både digitalt abonnement og papirabonnement nytta. Kjelda er opplagstala som avisene rapporterer til Mediebedriftenes Landsforening (MBL).

• Fjordenes Blad: Fyrste nummer 10.7.1874. Siste nummer 30.6.1920.
• Skifta namn til Fjordabladet 12.7.1920. Førebels siste nummer 31.3.1942.
• Fyrste nummer etter andre verdskrigen 17.5.1945.

• Norsk presses historie

• Fjordabladet

• Sandnes, Astrid, m.fl.: Fjordabladet gjennom 100 år, 1975, isbn 82-7128-007-4