Canto degli Italiani

Il Canto degli Italiani (IPA: /il ˈkanto deʎʎi itaˈljani/, par furlan Cjant dai Talians), cognossût ancje par talian cui nons di Fratelli d'Italia (Fradis di Italie), Inno di Mameli (Imni di Mameli), Canto nazionale (Cjant nazionâl) e Inno d'Italia (Imni di Italie), al è un cjant dal Risorziment scrit di Goffredo Mameli e musicât di Michele Novaro tal 1847, imni nazionâl de Republiche Taliane. Il toc, un 4/4 in si bemol maiôr, al è fat di sîs strofis e di un ritornel che al ven cjantât ae fin di dutis lis strofis.

Il cjant al jere tant popolâr dilunc pal Risorziment e tai agns daspò, ancje se dopo de unitât di Italie (1861) sicu imni dal Ream di Italie e fos stade selzude la Marcia Reale, toc ufiziâl de cjasade dai Savoia. Il Canto degli Italiani al jere di fats considerât masse pôc conservatôr rispiet ae situazion politiche de epoche par vie dal so stamp republican che nol leve ben intun periot di restaurazion des monarchiis.

Daspò de seconde vuere mondiâl la Italie divignint une republiche al à selzût, ai 12 di Otubar dal 1946, il Canto degli Italiani sicu imni nazionâl provisori, rûl che al à conservât par agns. Alfin cun la leç nº 181 dai 4 di Dicembar dal 2017, il toc al à cjapât il status di imni nazionâl de iure.