Kronštadt

Kronštadt
Кронштадт
Lidnanznam;	Flag;
Valdkund	Venäma
Eläjiden lugu (2023)	44,414 ristitud
Pind	19,35 km²
Pämez'	Natal'ja Čašina; (sügüz'ku 2014—)
Telefonkod	+7−812-xxx-xx-xx
Avtokod	78, 98, 178, 198
Aigvö	UTC+3 (MSK+0)

Kronštadt (ven.: Кроншта́дт, suom.: Kronstadt) om Venäman lidn da meriport Piterin lidnan röunoiden südäimes. Se om Kronštadtan rajonan üks'jäine eländpunkt.

Istorii

Petr I pani eländpunktan alust vl 1704 kuti Kronšlot-lidnuz da torguindport läz Kotlin-sart. Vl 1723 hän-žo pani puižen Kronštadt-lidnusen alust Kotlin-sarel da nimiti lidnad uden lidnusen mödhe. 1720-nzil vozil lidn tegihe Baltijan sodamerilaivišton bazaks. Vl 1824 lidn eli läbi sur'vedes, läz kaiked sauvused oliba muretud, i 19. voz'sadal sauvoihe kivišt lidnust, kudamban pertid da seinän jändused oma kaičenus tähäsai. Saudihe da udessündutihe äiluguižid fortoid-ki randištol 20. voz'sadan augotišhesai, ned oliba ühtenzoittud raudtel vedamha šlibakoid 1980-nzihe vozihesai.

Toižen mail'man sodan aigan Kronštadt eli blokadas läbi, ei ole anastadud nacistoil. Vspäi 1996 avaitihe lidnad verazmalaižiden täht.

Kronštadtan ižandusen päsarakod oma laivoiden kohenduz^[1] i sömtegimišt. Konteineroiden Mobi Dik-meriport radab. Eläjiden znamasine pala radab Piteriš.

Geografijan andmused

Lidn sijadase Suomen lahten Kotlin-saren päivnouzmaižes poles, putkotadud mahusel. Ühtenzoitase avtotel Piterin toižidenke rajonidenke dambadme.

Kronštadtan klimat sättub meren lämudenke i tulleikahamb mi Piterin keskuzpalas. Voden keskmäine lämuz om +6 C°, kezakun-elokun +16..+19 C°, tal'vkun-uhokun −2..−6 C°.

Eläjad

Vn 2010 Venäman rahvahanlugemižen mödhe lidnan eläjiden lugu oli 43 005 ristitud. Kaik 44 477 eläjad oli lidnas vl 2017. Kaikiš suremb ristitišt oli vl 1863 (48,4 tuh. rist.) i vl 1989 (45 053 eläjad).

Ortodoksižen hristanuskondan ühesatoštkümne pühäpertid^[2] oma kaičenus i saudud lidnas: ph. Mikulai-čudonsädajan meripäjumalanpert' (1903−1913), Vladimiran Jumalanmaman päjumalanpert' (1875−1879), nell' jumalanpertid, seičeme kodijumalanpertid, kuz' časounäd. Niiden ližaks ph. Ondrijan-ezikuctud päjumalanpert', kuz' jumalanpertid i časoun' ei ole kaičenus.

Sodamerilaivišton openduzkeskuz om lidnan professionaližen opendusen aluzkundaks.

Municipaližen ühtnikan pämez' tegeb municipaližen nevondkundan ezimehen velgusidme. Sijaližen Administracijan pämez' om Aleksandr Martemjanov vspäi 2023.

Transport

Avtobusad oma kundaližeks transportaks lidnan südäimes. Avtobusad-žo ajeltas Lomonosov-lidnha (vspäi 2011) da Staraja Derevnä-metrostancijhasai. Lidn ühtenzoitase kontinentanke Rengazavtotel ümbri Piteriš.

Galerei

Lidnan administracijan sauvuz (2015)
Ph. Mikulai-čudonsädajan meripäjumalanpert', vn 2015 nägu
Meritegimen kontor vl 2013
Norišton pert'kulu (2014)
Merivaldmad (2012)

Homaičendad

↑ Kronštadtan meritegimen sait (kmolz.ru). (ven.)
↑ Kronštadtan pühäpertid sobory.ru-saital. (ven.)

Irdkosketused

Kronštadt Vikiaitas

[1] Kronštadtan meritegimen sait (kmolz.ru). (ven.)

[2] Kronštadtan pühäpertid sobory.ru-saital. (ven.)

[1]

[2]

L • D • R Piter
Rajonad:	Admiralteiskii \| Frunzen \| Kalininan \| Keskuzrajon \| Kirovan \| Kolpinon \| Krasnogvardeiskii \| Krasnosel'skii \| Kronštadtan \| Kurortan \| Merenrandaine \| Moskvan \| Nevan \| Petrodvorecan \| Petrogradan \| Puškinan \| Vasileostrovskii \| Viipurin
Lidnad:	Kolpino \| Krasnoje Selo \| Kronštadt \| Lomonosov \| Pavlovsk \| Petergof \| Puškin \| Sestroreck \| Zelenogorsk