Maurice Pialat
Maurice Pialat, realizator de cinèma e pintre francés de soca occitana, es nascut lo 31 d'agost de 1925 a Cunlhat (Auvèrnhe). Sos parents quitan Auvèrnhe per la region parisenca ont Maurice Pialat i passa la màger partida de son enfança.
Après aver primièr volgut èsser pintre, Maurice Pialat realiza pendent las annadas 1950 e 1960 cortmetratges amators puèi professionals.
Es pas qu'en 1968, a l'edat de 43 ans, que pòt realizar son primièr film vertadièr, L'enfance nue, una ficcion sus un mainatge de l'assisténcia publica fach amb d'actors amators.
Après la realizacion d'una seria per l'ORTF, La maison des bois, fa amb Marlène Jobert e Jean Yanne un film qu'empòrta una primièra capitada publica, Nous ne vieillirons pas ensemble.
Per contra, lo film d'après, La gueule ouverte, es una malescaduda publica e financièra, e Maurice Pialat deu esperar quatre ans abans de poder far un longmetratge novèl.
Dins las annadas 1980, sos films Loulou (amb Isabelle Huppert, Gérard Depardieu e Guy Marchand), À nos amours (amb Sandrine Bonnaire), Police (amb un còp mai Gérard Depardieu e Sandrine Bonnaire, mas tanben Sophie Marceau e Richard Anconina) e Sous le soleil de Satan (tostemps amb Gérard Depardieu e Sandrine Bonnaire), tornan aver de succès.
A tanben fach en 1991 un film biografic sul pintre Vincent van Gogh, amb Jacques Dutronc dins lo ròtle màger.
Maurice Pialat a recebut lo prèmi Jean-Vigo per L'enfance nue (1968), lo prèmi Louis-Delluc e lo Cesar del melhor film per À nos amours (1983) e la palma d'aur al festenal de Canas per Sous le soleil de Satan (1987).
Èra proprietari d'un ostal dins lo Savés, a Agassac, ont aimava se pausar luènh del mitan del cinèma e de l'espectacle.
Maurice Pialat es mòrt lo 11 de genièr de 2003 a París (França) de las seguidas d'una malautiá als rens.
Box office
França
[modificar | Modificar lo còdi]Film | Annada de produccion | Entradas en França |
---|---|---|
Nous ne vieillirons pas ensemble | 1972 | 1 727 871 |
La Gueule ouverte | 1974 | 26 954 |
Passe ton bac d'abord | 1978 | 337 412 |
Loulou | 1980 | 943 547 |
À nos amours | 1983 | 952 082 |
Police | 1985 | 1 830 970 |
Sous le soleil de Satan | 1987 | 815 748 |
Van Gogh | 1991 | 1 307 437 |
Le Garçu | 1995 | 300 111 |