Waterball

Waterball (in’t engelsche „water polo“) is en Ballspeel in’t Water, dat Elementen vun Handball un Rugby hett. Dorbi versöökt Speler vun twee Mannschoppen, dör vigeliensch Afspelen un Freeswemmen den Ball in’t Door vun’n Gegner to smieten. Winnen deit de Mannschop, de an’t Enn vun’t Speel de meisten Doren maakt hett.

Dorno warrt Waterball also to de Doorspelen rekent un is en Mannschopssport. Togliek gellt Waterball as Deeldisziplin vun’n Swemmsport, so dat de Weltswemmverband FINA Dackverband vun disse Sportoort is.

En Mannschop besteiht bi’n Waterball ut höchsten 13 Spelers, bi eenige Turneeren bit to 15 Spelers, vun de jümmer söver in’t Speel sünd. Een is de Doorhöder, de annern söss warrt as Feldspelers betekent.

Taktik un Speelafloop

Ballföhren mit den afwannelten Kraulstil

Swemmstil

En sünnern Swemmstil is bi’t Speel nich vörsehn. Man verboden is, wiel dat Afspeel vun’n Ball op’n Beckenbodden to stahn. De Swemmoort Bottervagel (oder Delfin) warrt bi’t Speel nich faken bruukt, vun wegen dat se toveel Knööv köst un in’t Speel keen sinnvullen Insatz hett. In ruhigere Momenten, as to’n Bispeel na en Ünnerbreken, is Bostswemmen begäng, wiel in’n kämperischen Verloop vör allen de gaue Kraulstil anwennt warrt. De is bi’n Waterball licht ännert, as tomeist mit’n Kopp över Water swommen warrt, dat een de Översicht över’t Speel nich verlütt.

De Kraulstil warrt butendem ok bi’t Föhren vun’n Ball ännert: De Arms warrt anwinkelt blangen den Ball vörbiföhrt, denn utstreckt un as bi’t normale Kraulswemmen ünner Water na achtern togen. Över Water warrt se wedder anwinkelt, üm den Ball gegen möögliche Gegner aftoschirmen. De Kopp is oprecht, warrt also in den Nacken stütt. Dorbi liggt de Kopp so hooch, dat de Speler dör’n Mund aten kann. De Ball warrt vör’n Kopp föhrt un dör de Bewegen mit de Arms över Water „dribbelt“. Afhangig vun de Situatschoon warrt de Ball ok der Stöten mit den Kopp oder dat Gesicht wieterbröcht. Dorblangen warrt de Andrief dör den Beenslag düütlich starker utföhrt. De normale Kraulstil warrt meist blots bi’t Answemmen un in’n Kamp üm den Ballbesitt to Anfang vun jeed Veerdeel anwennt. Dorbi kummt dat neemlich op gröttste Snelligkeit an, wiel de Ball un de Gegner blots flüchtig wohrnahmen warrt.

Rüchswemmen warrt meist blots na dree bit veer Töög Kraulstil maakt, üm för tospeelte Bäll praat to wesen vun Mitspelers, de achter den Speler sünd. De Methood, de an wenigsten Knööv köst, üm sik över Water to hollen, is dat Waterpedden un warrt dorüm vun all Spelers insett. Dat warrt to’n Bispeel meist de hele Tiet vun den Doorhöder anwennt, as he sik de wiel de helen Speelduer an sien vörsehn Steed ophollen mutt. Bi’t Afwehren vun Doorschöten, föhrt he dat Waterpedden so dull ut, dat he sik dorbi mit hoochstreckte Arms bit to’n Buuknavel ut’n Water böhren kann.

Bi’t Praatstahn vör en vermoden Doorschööt lehnt sik de Doorhöder wieter na vörn as normal in de so nöömten „Froschpositschoon“. Dorbi sünd de Fööt, Been, Hüft, Arms un Hannen anwinkelt un de Rüch is krümmt. Dör’n Grätsche na ünnen un achtern kann de Doorhöder, aver ok annere Spelers, bit to de Baadbüx un noch wieter ut dat Water hoochscheten.

Speler-Positschonen

In’t moderne Waterballspeel hebbt sik de Taktiken so wiet entwickelt, dat sik sünnere „Spelerpositschonen“ defineeren laat. Mit Utnahm vun’n Doorhöder sünd de Positschonen aver nich an faste Spelers knütt. Sünners de Afwehr- un Middelfeldspelers müüt in Speelverloop fakener vun een op en annere Positschoon wesseln.

De Doorhöder mutt över’t hele Speel in sien egen Speelfeldhälft blieven. He is de eenzige, de in’n 5-m-Ruum den Ball mit beide Hannen spelen un sik ok ahn Ball in’n 2-m-Ruum ophollen dröff. Vun sien Positschoon ut fangt de meisten Angrepen an.

De Center vun en Mannschop steiht bi’n Angreep mööglichst in de Mitt op de 2-m-Lien vun’n Gegner. He versöcht den Ball in Door to smieten oder spellt den Ball so af, dat een vun sien Mitspelers op dat Door smieten kann. Dat Verdelen vun’n Ball an sien Mitspelers is sien Hööftopgaav. Bi’n Angreep is he tomeist de eenzige de ok Sicht na achtern hett, vun wegen dat he mit’n Rüch to’t Door vun’n Gegner liggt. Dordör kann he fre’e Mitspelers anspelen. Tomeist kummt dat dorbi to harde Tweekämpen mit de Centerafwehr.

De Centerafwehr versöcht dör geschickt Decken vun den Center vun’n Gegner, an den Ball to kamen. Disse Positschoon warrt meist vun en groten starken övernahmen. Dör de harden Tweekämp, is dat ok de Positschoon, de an’n fakensten ut dat Speel stellt warrt, man en saubere Afwehr warrt vun’n Schiedsrichter jümmer ok goot heten. Faken is dat ok so, dat de Centerafwehr den Center to en Störmerfoul dwingen kann. Wegen dat Rutstellen wesselt sik de Spelers op disse Positschoon faken af, dat nich een Speler in een Speel dree persönliche Fouls ansammelt un dormit för den helen Rest vun’t Speel rutstellt warrt.

Op Buten warrt tomeist de gaueren Spelers insett, de normalerwies ok to Anfang vun en Veerdeel answemmt. Bi’n Konter dreiht de Butenspelers toeerst üm, üm den Ball vun’n Doorhöder antonehmen un wieter to spelen. Dör’t V-förmige Uteneenswemmen maakt se dat Speel breed. De beiden Butenspelers rechts un links hebbt de längste Swemmstreck, vun wegen dat se de hele Feldläng swemmen mööt, üm in jemehr Angreeps- un Afwehrpositschonen to kamen.

Denn gifft dat noch de Halfpositschonen, op de op beide Sieten vun’t Feld elk een Speler twüschen de Butenspelers un de Centers/Centerafwehr speelt. Jümmer Opgaav is to’n een dat Doorsmieten ut grötteren Afstand un to’n annern as Ballverdelers bi’n Angreep.

Speelbestimmen Regeln

Speelfeld bi’n Waterball, as dat siet den 1. Oktober 2005 bespeelt warrt.

De Ball dröff mit jeedeen Deel vun’n Lief anröhrt warrn. De Feldspelers drööft den Ball dorbi jümmer blots mit een Hand oder Arm anfaten. Eenzig de Doorhöder hett Verlööf den Ball binnen den 5-m-Ruum mit beide Hannen antofaten. Verboden is aver, den Ball mit de Fuust to spelen. Dat gellt för all Speelsituatschonen. Eenzige Utnahm is ok hier de Doorhöder, de to’n Afwehren vun en Doorworp ok de Füüst nehmen.
Warrt en gegnerischen Speler, de nich den Ball hett, hinnert, warrt dat as en Foul weert un mit’n Freeworp bestraaft. Dat Hollen, Ünnerduken oder Torüchtehn vun’n Gegner, de nich den Ball hett, warrt mit Rutstellen för 20 Sekunnen bestraaft. Dat gellt nich, wenn de angrepen Speler noch in Ballbesitt weer, as de Attacke stattfunnen hett. Wenn en Speler dree vun disse persönlichen Fehlers maakt, warrt he för den helen Rest vun’t Speel utslaten.
En Door kann blots denn smeten warrn, wenn de Ball vörher vun twee Spelers speelt (d. h. mit Afsicht anröhrt) worrn is. Utnahmen dorvun sünd Free- un Straafworpen, de vun buten de 5-m-Lien vör’t Doot ahn Tögern utföhrt warrt.

En Straafworp gifft dat, wenn de Gegner in’n 5-m-Ruum op swore Wies gegen de Regeln verstött.
Feldspelers künnt ahn Inschränken utwesselt warrn. Warrt de Wessel na en Door, na’t Fleiten för de Poos oder wiel en Uttiet maakt, mutt de Speler eenfach blots ut dat Water gahn un de Utwesselspeler jumpt in’t Water rin. In’t lopen Speel dorgegen mutt de Speler, de utwesselt warrn schall in den Wesselruum an de egenen Doorutlien swemmen un warrt dor denn gegen en ne’en Speler utwesselt. Disse Wesselruum is root markeert.
Na en spoodrieken Doorworp stellt sik beide Mannschoppen in jemehr egen Mannschopshälften nee op. Na’t Wedderanfleiten dör den Schiedsrichter warrt dat Speel wieterföhrt. De Ball warrt dorbi tomeist vun’n Anstöötpunkt op de Middellien vun en Feldspeler vun de Mannschop, de dat Door kasseert hett, afspeelt. In jüngerer Tiet aver jümmer fakener ok ut de achteren Regen.

Opstellen

Ded moderne Waterball wiest vele verschedene Taktiken op, de je na Speelsituatschoon anwennt warrt. Vele dorvun baseert op dat Övertallspeel na’t Rutstellen vun en gegnerischen Speler. Dat kummt vergleken mit’n Handball fakener vör un is jümmer för en lütte Tietspann. Ok de Mannschop in Ünnertall mutt sik op de ne’e Situatschoon instellen un versöcht vör’n egenen Doorruum mööglichst jümmer een Speler twüschen twee Angriepers to stellen. An sünnere Steden kann ok en Pressdecken anwennt warrn, wat tomeist bi’n gegnerischen Center de Fall is.

Üm de enkelten Positschonen beter uteneen to hollen, hett man sik eenigt, dat man jem Platztallen gifft, wobi vun links na rechts un vun vörn na achtern tellt warrt.

4-2-System

Angreepsituatschoon in klassische 4-2-Opstellen

Dat 4-2-System is de fakenste Speelsituatschoon bi’n Waterball. Se warrt bi normale Angrepen, an’n fakensten aver bi Övertallspeel anwennt: De Angriepermannschop stellt op de 2-m-Lien veer Speler op un twee wietere, de fief bit söss Meter vun’t Door weg sünd. Vun de Lüüd op de 2-m-Lien staht twee op Hööch vun de Doorposten un de annern beiden ruchweg 2-3 Meter na de Siet vun’t Door.

De afwehren Mannschop stellt jümmer een Speler twüschen twee Angriepers op, d. h. jümmer een twüschen de beiden Angriepers in fief bit söss Meter Afstand un een twüschen de beiden op Hööch vun’n Doorposten, elk een twüschen de beiden Angriepers bi de Doorposten un de buteren Angriepers un een twüschen de beiden op Hööch vun’n Doorsposten. De Doorhöder bewegt sik op na Siet afhangig vun de Ballwessels un de Positschhon vun den Ball vör’t Door.

3-3-System

Dat 3-3-System warrt tomeist in lütte Hallen insett, bi de nich noog Platz is för veer Spelers blangenenanner. De Becken sünd denn normalerwies 10 bit 12,5 Meter breed – dat is so veel as veer oder fief Swemmbahnen in en normt Swemmbecken. Disse Opstellen warrt ok geern bi Övertallspeel insett.

5-1-System

Disse Opstellen warrt in eenige Rebeden ok as „Halfkrink“ betekent. Dit System is wat för Mannschoppen, de al länger speelt. Hier warrt de Överraschen vun en in Ünnertall spelen Mannschoppn utnütt, vun wegen dat dat bannig swoor is, so gau ümtodenken un en vernünftige Opstellen för de Afwehr uttoklamüstern. De Center vun de Angriepers warrt ven de Centerafwehr preedeckt. Bi’t Speel kann dat ok vörkamen, dat eenige Spelers ünner sünnere Ümstännen dweer dör de Formatschoon swemmt, üm dat Decken för een Gegner swoor un för de annern den Ruum freetomaken.

Speelvarianten

Dise Speelvarianten warrt blots bi’t Training oder to’n Spaaß maakt, vun wegen dat se deelwies nich mit de offiziellen Regeln för Waterball tohopenpasst.

Viktoria (Rugby-Waterball)

In disse Variante is teemlich alles verlööft, also ok dat Ünnerduken oder Torüchtehn vun’n Gegner. Brutale Saken as Slahn, Pedden usw. sünd natürlich wieterhen verboden. En Schiedsrichter gifft dat dorbi ok nich, man de Spelers mööt na egen Verstand Speelspaaß un Gefahr uteneenhollen.

Bi dit Speel lehrt de Spelers mit Brass, Ehrgiez, de egen Knööv as ok mit de vun de annern Spelers torecht to kamen. Nicht jeedenn kummt in de Brass, man dat kann passeeren, as een bi’t Speel nich jümmer freewillig ünenr Water kummt. Bito kann mit disse Variante öövt warrn, sik dörtosetten.

An besten lehrt man hierbi ok, sien Knööv mit dat richtige Maat intosetten. Gegen Gegenspelers, de technisch oder physisch nich so veel gegentosetten hebbt, mutt een nich mit de vullen Kraft ringahn. Bi en groten starken Gegner mutt een dorgegen mit mehr Kraft un sünners mit Technik rangahn.

Strandwaterball

Strandwaterball (oder Beachwaterball) is en vereenfachte Variante mit lichtere Regeln un op’n lütter’t Feld. Speelt warrt dat vör allen apen Waters as Seen, Strööm oder in de See. Strandwaterball orienteert sik an annere „Strand“-Sportorden as Strandvolleyball oder Beachsoccer un kann as Freetietsport as jüst so ok as Wettkampsport dörföhrt warrn. Dat schall den Sport för Laien un tokiekers intressanter maken.

Dat Speelfeld is dorbi 15 mol 11,5 m groot. Ok de Doren sünd mit 2,5 mol 0,8 m lütter as bi’t Original. Bito warrt mit den lütteren Waterball vun de Fronslüüd speelt. En Mannschop besteiht hier ut dree Feldspelers, en Doorwart un twee Utwesselspelers. Dat Speel geiht hier nich op Tiet, man in Sätz, as dat bi’t Tennis speelt warrt över dree Drüddel. Een Satz geiht dorbi över söss Doren un ennalso mit 3:3, 4:2 oder 5:1.

Dat eerste Strandwaterball-Turneer is 1995 in Italien utdragen worrn. Bi’t drüdde Turneer 1998 is de „Coppa del Mediterraneo“ utspeelt worrn, an den sik Italien, Frankriek, Malta un Montenegro bedeeligt hebbt.

En Doorhöder versöcht den Ball aftofangen

Verbännen, Ligen, Turneren

Internatschonal

Waterball höört to de öllsten Mannschopssportorden vun de Olympischen Spelen vun wegen dat al 1900 en Wettstriet dorföhrt worrn is. Siet 2000 gifft dat en olympischen Wettkamp ok bi de Fronslüüd.
Europameesterschoppen warrt bi de Mannslüüd siet 1926 un bi de Fronslüüd siet 1985 utdragen. Bit 19979 weern se in’n Rahmen vun de Swemm-Europameesterschopen utspeelt.
Weltmeesterschoppen gifft dat bi de Mannslüüd siet 1973, bi de Fronslüüd siet 1986 as Deel vun de Swemm-Weltmeesterschopen.
Siet 1979 dräägt de acht weltbesten Mannschoppen vun de Manns- un Fronslüüd butendem den FINA-Weltcup ut.
De jüngste Wettstriet is de FINA-Weltliga, de siet 2002 jeed Johr för de Mannslüüd stattfinnt un siet 2004 för de Fronslüüd inföhrt weer. Se warrt op verschedene Kontinenten utdragen.

In de intenatschonalen Wettstrieden hett toeerst Grootbritannien an de Spitz stahn mit Goldmedaillen bi de Olympishen Spelen 1900, 1908, 1912 un 1920. Dorna füngen de Ungarn an, de Nees bi dit Speel vörn to hebben. Se harrn bit hüüt negen mol den eersetn Platz bi de Olympischen Spelen. Annere starke Natschonalmannschoppen sünd de vun Italien un ut dat fröhere Jugoslawien, de jeed dreemol wunnen hebbt. Düütschland hett eenmol in Amsterdam de Goldmedaille wunnen, bi de Sommerspelen vun 1928. Bi de FINA-Weltliga 2005 is de Utwahl vun’n DSV op’n drüdden Platz kamen.

Waterball in Düütschland

In Düütschland ist de Waterball in’n Düütschen Swemm-Verband (DSV) organiseert. Ünner den Dackverband sünd in de Facksparte Waterball 18 Landsswemmverbännen (LSV) vun de Bundslännervertreden as wieter ok de Landsverbännen Baden, Württemberg un de Süüdwestdüütsche Swemmverband. Dorto gifft dat ok noch Landsgruppen (LGr).

De Olympia-Stüttpunkt för Waterball is in Hannober, woneem dat en Internat gifft. Blangen Slaapmööglichkeiten, kann een hier dagsöver de School besöken un Trainingseenheiten afleggen. Bito gifft dat in Chemnitz en Sport-Gymnasium, dat ok Waterball lehrt. Wieter warrt disse Sportoort ok in en Gesamtschool in Berlin anboden, de sportlich utricht is.

Waterball stött in Düütschlaand nich op dat gröttste Intresse, vun wegen dat de intenatschonale Spood nich dor is, aas in annere Sportorden. Dordör blieft de Sponsers weg, de Mannschoppen finanziell ünnerstütten doot. De Fraag is dorüm, wat Waterball in tokamen Tieten noch as Leistungssport bedreven warrn kann oder reinen Bredensport warrt. Profi-Spelers, de jemehr Inkamen alleen mit Waterball bestrieden doot, gifft dat kuum: de meisten Speler un ok de Natschonalspelers bedrieft den Sport as Hobby un warrt för Wettkämp dör jemehr Arbeitsgevers dör Freestellen ünnerstütt. Dör den Profi-Mangel blifft de finanzielle Ünnerstütten ut, so dat de Trainingsmöglichkeiten düütlich achter de vun annere Natschonen torüch blifft.

In Düütschland gifft dat en Liga-Bedrief, wobi bi de Mannslüüd de hööchste de Düütsche Waterball-Liga (DWL) is. Bi de Fronslüüd gifft dat siet Enn vun de 1990er Johren de 1. Frons-Bundsliga.

Waterball in Öösterriek

De össterrieksche Dackorganisatschoon för Waterball is de Öösterrieksche Swemmverband (OSV). Ok hier gifft dat’n Liga-Bedrief vun den Sport mit de Öösterriekschen Waterball-Bundsliga as hööchste Speelklass.

Waterball in der Swiez

Waterball warrt in de Swiez siet Anfang vun’t 20. JOhrhunnert speelt. De Meesterschoppen warrt vun’n Swiezer Swemmverband organiseert. De hööchste Speelklass is hier de Natschonalliga A.

Waterball in Ungarn

Ungarn gellt hüüdigendaags as Hoochborg un groten Favorit in’n Waterball. Hier gifft dat ok vele Profi-Spelers. De ungaarsche Mannschop hett bit hüüt negen mol de Goldmedaille bi de Olympischen Spelen wunnen. Dat eerste mol weer 1932 in Los Angeles, dorna in Berlin (1936), Helsinki (1952), Melbourne (1956), Tokio (1964), Montreal (1976) as ok de letzten dree molen in Sydney (2000), Athen (2004) un in Peking (2008). Wieter weer Ungarn dörteihn mol Europameester un tweemnol Weltmeester.

Waterball in Serbien

Ok Serbien tellt to de starksten Mannschoppen in’n Waterball. De serbische (vördem de jugoslawische oder serbsch-montenegrinsche) Natschonalmannschop hett dreemol de Weltmeesterschoppen und veermol de Europameetserschoppen wunnen. Bi de Olympischen Spelen wunn se eenmol Sülver (2004) un tweemol Bronze (2000 un 2008) un is en stännigen Gegner vun Ungarn bi Endspelen. De jugoslawische Matschonalmannschop hett bi de Olympischen Spelen dreemol Gold (1968, 1984, 1988) un veermol Sülver wunnen.

Waterball in Kroatien

Kroatien tellt wieter ok to de Favoriten. Jemehr Natschonalmannschop is 2007 Weltmeester worrn. Dackorganisatschoon is hier de Kroaatsche Waterball-Verband (HSV, Hrvatski vaterpolski savez). De hööchste Speelklass is de 1. Koraatsche Waterball-Liga.

Waterball in Luxemborg

Ok in Luxemborg warrt siet Anfang vunt 20. Johrhunnert Waterball speelt. De Sportoort steiht ünner de Organisatschoono vun de luxemborgsen Swemmföderatschoon FLNS. Al 1928 hett en Delegatschoon vun de Stadt Luxemburg an de Olympischen Spelen deelnahmen. Sien Hööchpunkt harr Waterball in Luxemborg Anfang vun de 1980er Johren, as dat föffteihn Mannschoppen geev, de in twee Ligen speelt hebbt. De Tall is aver bannig torüchgahn, vun wegen, dat keen Jöögdmannschoppen nakamen deen. Enn vun de 1990er Johren weern blots noch dree Mannschoppen över, vundaag sünd dat wedder veer.

Waterball in’n Behinnertensport

Ok Minschen mit Behinnern künnt den Waterball-Sport utöven. De Sportverbännen vun de Höörlosen beedt deelwies Waterball in jemehr Swemmafdeelen an. Höörlose nehmt in Düütschland an’n normalen Speelbedrief in de ünneren Ligen deel, ofschoonst jemehr Behinnern hier en grote Rull speelt, as de meisten Signalen vun’n Schiedsrichter akustisch dör en Trillerfleut geven warrt.

Man, butendem gifft dat ok Wettstrieden ünner Höörlose to glieke Vörrutsetten op natschonale un internatschonale Even. Waterballafdeelen in Höörlosen-Sportverenen gifft dat in Berlin, Dresden, Hamborg, Hannober, Hilmessen un München. Se veranstalt jeed Johr ünnerenanner Düütsche Meesterschoppen un Pokalturneren. Dat Speel warrt denn mehr mit Hand- un Flaggenteken regelt. Internatschonal warrt Waterball ünner Höörlose butendem noch in Australien, Italien, de Nedderlannen, Ungarn un de USA speelt. Bi de Deaflympics, de egen Weltspelen vun de Höörlosen, 2005 in Melbourne hett Düütschland de Goldmedaille wunnen. Bito warrt ok egene Welt- (roor) un Europameesterschoppen utdragen.

Ok in eenige Versehrten-Sportverenen warrt Waterball anboden.

Historie vun’n Waterball

Anfäng in England

In’t Engelsche warrt Waterball as water polo nöömt – en Beteken de sik in de glieken Tiet entwickelt hett, as ok dat Polo-Speel entwickelt hett. Dat is denn in de meisten vun de europääschen Spraken övernahmen worrn.

An’n 12. Mai 1870 hett de London Swimming Club en Komitee grünnt, dat de Opgaav harr, de Football op en Speel in’t Water to överdrägen. Dat Resultat weer 1874 vörstellt. Dat eerste Water-Football-Speel weer in’n Crystal Palace in London speelt. Man, dat Komitee hett nich schriftlich fasthollen, wat se utklamüstert harrn, so dat vundaag nix Naues mehr to dat Speel bekannt is.

Över dat Tostannenkamen vun’n Waterball gifft dat verschedene Informatschonen, de sik aver nich gegensietig utsluten doot. Beleggt ios to’n een, dat Waterball wohrschienlich utdacht worrn is, üm Swemmveranstalten („Swimming Exhibitions“) intressanter to maken un somit den Swemmsport beter antopriesen. To’n annern is mündlich överlevert, dat Dick Hodgson, de 1924 un 1928 to de engelschen Olympia-Mannschop hören de, den BBC-Kommentater Harry Walker wat aners vertellt harr. Dorna güng Hodgson sien Vadder mit sien Rugby-Mannschop in Lancashire normalerwies na’t Speel in en Waschhuus mit Swemmbad. „Mitünner ennen se denn in’t Becken, normalerwies mit Ball, un hebbt en Oort Rugby_Speel in’t Water maakt. Den Ball harrn se an de Siet leggt, wenn en Door na Rugby-Oort maakt worrn is“.

In de twee Johren dorna hett sik en Oort Water-Baseball entwickelt, bi dat dree Speler op jede Siet weern un de Ball op de Gegnersiet op en Plattform oder en Boot legt warrn müss. Woans dat to gahn harr, weer nich regelt. Dat geev enkelte Versöken, dat Speel in’t Water populär to maken un ne’e Regeln uttofinnen, bit opletzt an’n 14. Juli 1876 de Bournemouth Premier Rowing Club den eersten enigermaten dör en Regelwark fastleggten Waterball-Wettstriet veranstalten de. Dorto gifft dat Presseberichten. Ünner de Opsicht vun een Scheidsrichter un twee Doorlienenrichters spelen twee Manschoppen mit elk söven Lüüd op en afgrenzt Feld op en Stroom gegenenanner. Doren geev dat keen. De Ball müss op en Flott afleggt warrn. Disse eerste „ernsthafte“ Wettstriet güng aver blots kort, vun wegen dat de Gummiball, den harden Wettkamp nich lang dörhollen künn un platzen de.

Waterballspeel twüschen 1900 un 1920 op Java

Vun England ut hett sik Waterball as Wettkamp-Speel gegen Enn vun’t 19. Johrhunnert över den europääschen Eerddeel un na Noordamerika verbreedt. Vun 1880 an geev dat al regelmatige Wettstrieden twüschen Mannschoppen ut England un Schottland. 1884 hebbt sik engelsche un schottische Swemmverenen in Burton-on-Trent drapen un dor gemeensome Regeln fastleggt. Torüch in Schottland geev sik de Associated Swimming Club of Glasgow Möh, disse Regeln wieter to verbetern. Bito weer en Vull-Ledderball inföhrt. Dat Speel kreeg den Nahm Hardball (Soccer) Water Polo.

En wietere Ännern vun’n Speelcharakter keem mit dat Inföhren vun Doorposten. De Ball müss nu nich mehr afleggt warrn, man enn künn em ok smieten. Dat hett dat Speel noch intressanter maakt, wat to Folg harr, at Waterball sik gau verbreden de. Dat güng in’t Speel nu nich mehr so dull üm Stärk, man mehr ok üm Snelligkeit, Technik un Taktik. 1885 is Waterball denn vun’n engelschen Swemmverband as egenstännige Sportoort acht worrn. Bi Wettstrieden weern vun den verband nu eenheitliche Regeln anordent. Se bestünnen ut ölven Punkten. Dat Speel duer dormols twintig Minuuten.

1887 is dat Stahn op’n Grund un dat Fangen vun’n Ball mit beide Hannen verboden worrn. En Johr later, 1988, hebbt de eersten reguälren engelschen Meesterschoppen stattfunnen un en London League weer grünnt. Bit 1888 hebbt sik de regeln in England kuum ännert, bit de engelsche Swemmverband beslaten hett, dat en Komitee grünnt warrn schüll, dat sik mit de Regeln uteneen setten un jem verbetern schüll. Dör de ne’en Regeln (Inföhren vun en Door, bewegen blots noch dör Swemmen) weer dat Speel jümmer lever speelt un gauer verbreedt. För’t wietere Entwickeln weer ok wichtig, dat blangen de engelschen ok de schottischen un irischen Verenen na’nanner jemehr Mannschoppen billt un Meesterschopppen afhollen hebbt.

Water-Polo 1904 bi de Olympischen Spelen in St. Louis

Dat eerste internatschonale Speel weer 1890 Schottland gegen England, dat de SChotten mit 4:0 wunnen hebbt. Ofschoonst dat Speel na engelsche regeln dörföhrt weer, harrn de Schooten düütlich de Nees vörn. Se güngen weniger in de Gegners, man hebbt sik dorop konzentreert, den Ball to spelen, wat sik utbetahlt hett.^[1]

In dat glieke Johr keen Waterball ok na de USA, wobi de Regeln aver ännert weern vör den Achtergrund vun de lütten Hallenbäder. In’t Sünnere weer as „Door“ en Markeeren an de Wand defineert, op de aver nich smeten warrn dröff. Tellen de blots, wenn en Speler de Markeeren mit den Ball in de Hand anröhren de.

Entwickeln in Düütschland

Op’n Kontinent güng dat 1893 los, dat sik de Lüüd för Waterball intresseeren. Los güng dat toeerst in Düütschland, denn in Öösterriek un vun 1897 an ok in Ungarn. In Düütschland weer dat 1894 toeerst de Swemmvereen Borussia Berlin, de Waterball spelen de. De Berliner Speler Fritz Kniese harr dat ne’e Speel in England kennenlehrt un denn bi sien Vereenskameraden bekannt maakt.

In’t Johr 1897 geev Fritz Droemer Inföhren in’t Waterball-Speel överall in Düütschland. Dat Johr dorop hett Ulrich Baer ut Berlin düütsche Regeln verfaat, de wiet verbreedt worrn sünd. Droemer hett 1908 ok dat eerste düütsche Lehrbook för Waterball schreven, dat noch in’t Johr 1922 in veerrter Oplaag publizeert worrn is.

As sik in’n Düütschen Swemmverband jümmer mehr Mannschoppen billt harrn., is 1912 to’n eersten mol en „Düütsche Waterballmeesterschop“ utdragen worrn, de an’t Enn de Berliner Swemmclub Germania gegen Swaben-Stuttgart wunnen hett un dormit eerste Düütsche Meester in’n Waterball worrn is.

De engelschen Regeln weern 1911 vör all anslaten Länner dör den Internatschonalen Swemmverband FINA verbindlich maakt. Na’n Eersten Weltkrieg, in’t Johr 1920, sünd de Regeln in Düütschlandafwieken vun de internatschonalen Bestimmen noch mol ännert worrn. Düütschland weer nich mehr Liddmaat vun den FINA un dorüm nich mehr an de internatschonalen Regeln bunnen. Nee weer dorbi, dat de Gegner nich mehr ünnerduukt warrn u in’t Speel ok nich snackt warrn dröff. Man, 1924 sünd de internatschonalen Regeln wedder in Düütschland verbindlich worrn.

Dat Satzungsorgan för den Waterballsport – dat is de 1929 grünnte International Waterpolo Board – hett 1950 bannige Ännern vun at Regelwark vörnahmen, in den Sinn, dat Speel wietertoentwickeln. Dat so nöömte Standspeel geev dat dormit nu nich mehr, un dat weer verlööft, sik wiel dat hele Speel to bewegen, also ok bi Ünnerbreken (sünners bi Freewörp). Dat Speel weer dordör noch gauer un dormit spannender för de Tokiekers.

Olympische Spelen

De DDR-Olympiabreefmark to de Sommerspelen 1968 wiest en Waterball-Motiv

Al bi de Olympischen Spelen in Paris in’t Johr 1900 weern de eersten Waterballspelen dörföhrt. Hier hett de Vereensmannschop vun’n Osborne Swimming Club ut Manchester för Grootbritannien de Goldmedaille wunnen. Bi de Spelen 1904 in St. Louis, USA hebbt aver blots US-amerikaansche Mannschoppen gegenenanner speelt, vun wegen dat de europääschen Mannschoppen, wegen de hogen Reisekosten nich kamen künnen. Hier is na de veel harderen amerikaanschen Regeln speelt worrn, de sik internatschonal aver nich dörsetten künnen. Dorna hebbt 1908 söss Lännermannschoppen in London üm den Titel speelt. Wunnen hett Grootbritannien.

Düütschland hett 1928 to’n tweeten mol in Amsterdam an disse Sportoort deelnahmen un künn sik unvermodens vör Ungarn un den vöhrigen Winner Frankriek dörsetten. De Düütschen hebbt in de Verlängern mit 5:2 gegen Ungarn wunnen, ofschoonst de Ungarn to de Tiet as de beste Mannschop weltwiet ansehn weer. Dorna is sünners de ungaarsche Mannschop jümmer wedder Eerste worrn. Se hett bit vundaag negen mol bi de Plampischen Spelen wunnen.

Waterball vun de Fronslüüd

Anfang vun’t 20. Johrhunnert hebbt ok de Fronslüüd anfungen, Waterball to spelen. De eerste Wettstriet weer 1906 in de Nedderlannen utdragen, as sik de Fronsmannschoppen vun Hilversum un Haarlem gegenöver stünnen.

Man, en egen Komitee för den Fronswaterball is eerst bi’n eersten FINA-Weltcup 1979 grünnt worrn. De Nedderlannen hebbt den Waterball för de Fronslüüd in’t Rullen bröcht. Vundaag sünd ok hier de Ungarn, de USA, Australien, Italien un Kanada de bestimmen Natschonen. Dat sünd, afsehn vun Ungarn un Italien tomeist Länner, woneem de Waterball vun de Mannslüüd nich an de Gööd vun’n Fronswaterball rankummt. As to’n Bispeel ok bi’n Football, hebbt dat de Fronslüüd aver sworer in de Gunst üm de Tokiekers. In de Historie harrn Fronslüüd, de Waterball speelt, aver jümmer wedder mit Vöroordeelen to kriegen.

Literatur

Heinz Braecklein: Wasserball. Technik Taktik Training. Sportverlag, Berlin 1953
Jürgen Kozel: Wasserball - Ausbildung und Training. Meyer & Meyer Verlag
Béla Rajki: Das Wasserballspiel. Budapest, Corvina, 1959. 127+13 Bildtafel-Sieten
Friedrich Torberg: Die Mannschaft. Roman 1935 (Neeutgaav: Molden, Wien 2004, ISBN 3-85485-124-3)

Borns

↑ Smith, James R. (1985). The World Encyclopedia of Water Polo. Edited by Jim Norris. Los Olivos.

Weblenken

Waterball. Mehr Biller, Videos oder Audiodateien to’t Thema gifft dat bi Wikimedia Commons.

[1] Smith, James R. (1985). The World Encyclopedia of Water Polo. Edited by Jim Norris. Los Olivos.

[1]