Randy Rides Alone
| Filmdaten | |
|---|---|
| Plattdüütsch Titel: | — |
| Originaltitel: | Randy Rides Alone |
| Düütsch Titel: | Der einsame Reiter |
| Produkschoonsland: | USA |
| Johr vun’t Rutkamen: | 1934 |
| Läng: | 53 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Harry Fraser |
| Dreihbook: | Lindsley Parsons |
| Produkschoon: | Paul Malvern |
| Kamera: | Archie Stout |
| Snitt: | Carl Pierson |
| Dorstellers | |
| |
Randy Rides Alone (op platt so veel as: „Randy riddt alleen“; dt. Titel: Der einsame Reiter) is de Titel vun en US-amerikaanschen Western ut dat Johr 1934, in den John Wayne de Hööftrull speelt hett. Dreiht worrn is de Film in Santa Clarita in’n US-Bundsstaat Kalifornien. Premiere harr de Film an’n 18. Juni 1934 in de USA[1].
Inholt
[ännern | Bornkood ännern]Randy Bowers is op’n Weg na Ed Rogers. In den sien Saloon Half Way House finnt he aver na en Överfall blots noch Lieken vör un den Safe, de utrüümt worrn is. As de Sheriff op Henweis vun den stummen Matt Mathews na’n Saloon kummt, warrt Randy ahn veel Fragen fastnahmen. In Wohrheit is Mathews aver de Verbreker Marvin Black, de mit Steekbreef söcht warrt. Black is de Kopp vun de Bande, de dat Half Way House överfallen hett. Mit dat Geld ut den Safe hett Black vör, dat Grundstück vun Rogers to köpen, neemlich vun den sien Nichte Sally. De Plaan geihgt aver scheef, vunwegen dat dat Geld, op dat he spekuleert hett, gor nich in’n Safe weer.
Rogers hett en Schrieven bi sik, dat wiest, dat he vun Rogers halt worrn is. Dormit övertüügt he Sally vun sien Unschuld, de em dorophen ut dat Gefängnis befreet un sik vun em schulen lett. Man, toeerst mutt Randy vör den Sheriff utneihn. Op sien Flucht finnt he dör en Tofall dat Versteek vun Black sien Bande. He slutt sik jem to’n Schien an. Black kennt em aver foorts wedder un blifft argdenkern. Üm mit sien Plaan vörantokamen lett he Sally in dat Versteek bringen, üm vun ehr sülvst ruttokriegen, woneem dat Geld versteken is. Sally seggt aver nix an un warrt vun de Banditen insparrt. In’t Lager vun de Bande stellt Randy Kuntakt to ehr her. Em verraat se, woneem dat Geld liggt.
Torüch in’t Half Way House finnt he gau dat Versteek un nimmt dat Geld rut. An de Steed verstickt he en poor Stangen Dynamit. Dör en Schriftproov vun den stummen Matt finnt he nu ok rut, dat Marvin un Matt en un de sülve Person is. Also tütt he de Acht vun den Sheriff op sik, de mit sien Lüüd achter em ran neiht. Randy föhrt jem direkt na dat Versteek vun de Bande, woneem dat to en Scheteree kummt. In dat Dör’nanner kann Black utneihn. He maakt sik op’n Weg na’n Saloon, woneem he nu endlich dat Geld in sien Fingers kriegen will. Bi den Versöök, de iesern Kist mit en Schott ut sien Revolver apentokriegen, tünnert he aver dat Dynamit un flüggt mitsams den Saloon in de Luft. An’t Enn kann Randy endlich verkloren, wat he doon hett un worüm. Sally gifft he dat Geld torüch, dat he ut de Kist nahmen harr. Se gifft to, dat se sik in em verkeken hett.
Weblinks
[ännern | Bornkood ännern]- Randy Rides Alone in de Internet Movie Database (engelsch)