Kameramann

De Kameramann oder de Kamerafro is en Beroop in’t Filmgewarf. Dat is de Person, de bi en Filmprodukschoon dat Seggen un de Verantwoorten för de Bildgestalten hett.

Historie

In de Fröhtiet vun’t Kino weern de Filmphotograph un de Kameraoperater de eenzigen Lüüd, de an en Filmkamera rümhanteeret hebbt. Mit de Tiet sünd aver de Funkschonen un Möglichkeiten vun de Kino-Kamera dör de technischen Entwickeln jümmer komplizerter worrn, so dat vundaag an de Steed vun een Loopbildphotographen nu en heel Kamerakru an’t Wark is. Dorbi gifft dat ünnerscheedliche spezialiseerte Lüüd, de verscheden Opgavenun Funkschonen utfüllen doot.

Definitschoon vun’n Beroop

In’n Ümgangssnack warrt de Kameramann faken glieksett mit den Baas vun en Kamerakru, man, de hüütige Beteken „Kamera“ seggt över den Beroop vun en lichtsettend Kameramann, wat also de Person is, de för de Filmfotografie verantwoortlich is, nix ut. De bildgestaltend Kameramann warrt in’t Engelsche director of photography, in’t Franzöösche directeur de la photo, in’t Italieensch diretore della fotografia un in’t Portugeesch diretor fotografico nöömt, wat all’ns översett warrn kann as „Fotograafsch Leiter“. In’t Düütsche warrt jümmer mehr ok de Begreep Bildgestalter bruukt.

In de USA folgt em na ünnen hen in de Hierarchie de Kameraoperater op („Swenker“, in’t Engelsche ok camera operator), denn de eerste Kamerahelpsmann (focus puller), de för’t scharp Bild verantwoortlich is, un de tweete Kamerahelpsmann (clapper loader) oder Materialhelpsmann, de de Filmklapp bedeent, mit dat Rauhmaterial hanteert, de Dorstellers wenn nödig vertellt, woneem se to stahn un to gahn hebbt un sik bito üm den helen Papeerkram vun de Kru kümmert. In’n wietern Sinn höört to de Kru ok Standfotografen, de tostännig sünd för de Warfbiller, un de Helpslüüd, de den Kamerawagen un den -kran (in’t Düütsche „Kamerabühne“) bedeent (grip, key grip, dolly grip). Bi gröttere Filmprodukschonen warrt vun de Ünnernehmen ok mit’n tweete Kamerakru arbeidt (second unit), dat mit nich ganz so wichtige Opgaven arbeiden deit (t. B. Szenen ahn de Hööftdorstellers), Produkschoonskosten siet hollen deit un de Möglichkeit to’n gliektietigen Arbeiten gifft.

Opgavenrebeden

Speelfilm

In de Tiet vör de Produkschoon mutt de Kameramann dat nödige Material afschätzen un de Redschoppen, de bruukt warrt. Tomeist stellt he ok de Kamerakru tohopen. Bi Speelfilmen hett he för de Bildkompositschoon (Perspektiev, Bildutsnitt), de Kameraföhren as ok för’t richtige Licht an’n Filmset to sorgen. Na Dreihsluss kümmert he sik faken al üm dat nächste Set.

In’n Vörfeld vun de Dreiharbeiten klamüstert de Kameramann tohopen mit den Speelbaas Ideen ut, woans dat Dreihbook an’n besten in Biller ümsett warrn kann (Visualiseeren). Sien Andeel kann dorbi in’n hööchsten Fall bedüden, dat de Kameramann alleen för’t visuell Ümsetten tostännig is, in’n sietsten Fall kümmert he sik alleen för’t Ümsetten vun de Ideen, de annere Lüüd em vertellt. In de so nöömten „Poolschen School“ warrt de Kameramann al in den Vörgang vun’t Dreihbookschrieven mit inbunnen. In’n so nöömte Dogma-Filmen is de Kameramann nich an de Anwiesen bunnen. En goden Kameramann hett sik sien egenen Stil anegent un is togliek in de Laag, ünnerscheedliche Stilformen ümtosetten. De Wahl vun’n Kameramann för en Filmprodukschoon hangt faken ok dormit tosamen, dat he den wünschten Stil vun’n Film goot ümsetten kann.

Feernsehn

Bi Feernsehopteken oder Liveöverdrägen mit mehrere Kameras, maakt de Speelbaas vörher en Konzept, dat aver bi Liveprodukschonen tomeist nich nipp un nau ümsett warrn kann. Anners as bi Speelfilm- oder Warffilmprodukschonen is bi’n Feernsehn meist to wenig Tiet, üm mit de Kameralüüd un de Cutters jeed enkelte Motiv dörtosnacken. De Kameralüüd un de Filmsnitt arbeidt hier vergliekswies egenstännig.

Utbilln

De Utbilln to’n Kameramann is nich eenheitlich regelt. Vörutsetten för den Beroop sünd en fotograafsche Utbilln mit en Tosatzutbilln an en Film- oder Feernsehschool oder en Eerstutbilln to’n Kameramann an Film- oder Kunsthoochscholen, de as Filmakademien- oder -universitäten betekent warrt, as ok an Fachhoochscholen. Dorbi warrt al wiel de Studientiet praktisch Insichten wunnen.

Filmpriesen för Kameraarbeit

De Beroop vun’n Kameramann is bit vundaag jümmers ’n beten in’n Schadden vun de Schauspelers un Speelbasen torüchbleven, liekers dat al siet vele Johren en egene Kategorie bi de Oscarverlehen gifft. In Düütschland warrt eerst siet 1982 mit den Düütschen Kamerapries en sünnere Utteken für de Kameraarbeit verleht. Butendem gifft dat siet 2000 en internatschonale Utteken, den Marborger Kamerapries, de gemeensom vun de Stadt Marborg, de öörtlich Kinobedrieven un’t Fachrebeet Medienwetenschap vun de Philipps-Universität vergeven warrt.

Beropen Kameralüüd

To de beropensten Kameramannslüüd tellt Karl Freund, Hans Schneeberger, Franz Planer, de Bröder Michael un Boris Kaufmann as ok Eduard Tisse. In de Nutiet is Michael Ballhaus de bekannteste düütsche Kameramann, de veel mit Rainer Werner Fassbinder arbeit hett. Bekannt is ok Jost Vacano, de för Das Boot för den Oscar nomineert weer. Bekannte Kamerafronslüüd sünd de ok as Speelbasen bekannten Elfi Mikesch un Sophie Maintigneux.

Literatur

Karl Prümm (Rtg.), Kamerastile im aktuellen Film: Berichte und Analysen, Marburg: Schüren, 1999, ISBN 3-89472-311-4
Pierre Kandorfer, Lehrbuch der Filmgestaltung, Stein-Bockenheim: Mediabook Verlag, 2003, ISBN 3-932972-18-X
Mark Wagener, Professionelle Kameratechnik und Aufnahmegestaltung, Stein-Bockenheim: Mediabook Verlag, 2003, ISBN 3-932972-22-8
Andreas A. Reil, Das DV System. Das große Handbuch zur Kamera- und Aufnahmetechnik – Bildgestaltung – Postproduktion, Stein-Bockenheim: Mediabook Verlag, 2002, ISBN 3-932972-10-4

Kiek ok

Websteden