Serera (vahoaka)
Ny Serera dia vahoakan' i Afrika Andrefana, indrindra any amin' ny faritra andrefana-afovoan' i Senegaly, manomboka any amin' ny tapany atsimon' ny faritr' i Dakar ka hatrany amin' ny sisin-tany avatr' i Gambia. Hita any amin' ny tapany atsimon' i Maoritania koa izy ireo. Atao hoe Sarera na Kegema koa ny Serera.
Izy ireo no mandrafitra ny vondrom-poko fahatelo ao Senegaly, mandrafitra ny 15 % amin' ny vahoaka asegaley,aorian' ny Vôlôfo sy Folany; eo amin' ny Senegaley iray amin' ny enina no manam-piavina serera. Iray amin' ny vahoaka tranainy indrindra ao Senegambia ny Serera.
Ny Serera dia avy ao amin' ny lohasahan' ny ony Sénégal eo amin' ny sisin-tanin' i Senegaly sy Maoritania, nifindra nianatsimo tamin' ny taonjato faha-11 sy faha-12, avy eo indray tamin' ny taonjato faha-15 sy faha-16 rehefa nisy nanafika ny tanànany ary niharan' ny fanerena ara-pivavahana izy ireo. Nanana kolontsaina niiorim-ponenana izy ireo ary nalaza amin' ny fahaizany momba ny fambolena sy ny fiompiana andiam-biby fiompy.
Ny Serera dia voamarika ara-tantara ho vondrom-poko nampihatra singa avy amin' ny fianakaviana tarihin-dray sy tarihin-dreny izay nanohitra ela ny fanitarana ny finoana silamo, niady tamin' ny jihady tamin' ny taonjato faha-19, avy eo nanohitra ny fitondran' ny mpanjanaka frantsay. Tamin’ ny taonjato faha-20 dia nivadika ho mozilmana (sofisma) ny ankamaroan’ izy ireo, fa ny sasany kosa dia kristiana na nanaraka ny fivavahan-drazany.
Ny fiarahamonina serera, toy ny an' ny foko hafa any Senegaly, dia nanana rafi-piarahamonina ahitana sarangam-poko sy andevo tsy manambady ivelan' ny saranga misy azy, na dia lavin' ny mpahay tantara hafa, toa an' i Thiaw sy i Richard sy ny hafa, ny fisian' ny kolontsaina misy fanandevozana tao amin' ity vondrona ity, na farafaharatsiny tsy mitovy fampiharana ny fanandevozana tamin' ny foko hafa any amin’ io faritra io.