Franskar kartöflur
Franskar kartöflur eru kartöflur sem hafa verið skornar í strimla og djúpsteiktar. Flestar heimildir benda til að franskar kartöflur hafi fyrst verið matreiddar á landsvæði sem nú tilheyrir Belgíu. Aðrar halda því fram að þær hafi fyrst komið fram á Spáni og sá siður að djúpsteikja þær hafi síðan flust til þess hluta Niðurlanda sem þá var undir spænskri stjórn.
McDonald's skyndibitakeðjan hefur átt stóran þátt í því að gera franskar kartöflur vinsælar út um allan heim. McDonalds gerði á sínum tíma samning við fyrirtækið J.R. Simplot sem hafði fundið upp aðferð til þess að snöggfrysta franskar kartöflur. Áður höfðu franskar kartöflur verið skrældar og skornar niður á staðnum, en með uppfinningu Simplot fyrirtækisins mátti skera niður starfsmanna-kostnað og stytta afgreiðslutímann.
Eitt og annað um franskar kartöflur
[breyta | breyta frumkóða]- Þegar ljóst var að Frakkar myndu ekki styðja innrás Bandaríkjamanna í Írak árið 2003 fóru sumir Bandaríkjamenn að kalla franskar kartöflur, „frelsiskartöflur“ (enska: freedom fries) í mótmælaskyni.
- Á Íslandi eru franskar kartöflur venjulega bornar fram með tómatsósu eða kokkteilsósu en annars staðar t.d. með majónesi, ediki (oftast maltediki) og ýmiss konar kryddsósum og ídýfum.
