Ayumi Morita
|
C'l artìcul chè 'l è scrit in
Miranduléś |
L’Ayumi Morita (Ōta, 11 ad Mars dal 1990, scrit 森田 あゆみ in Giapunéś) l'è na tenìsta giapunéśa prufesiunìsta da 'l 2005. La tira drit e arvèrs cun al dū maṅ anc s'al sò bras bòṅ al sarés qvél dèstar.
Al 3 'd Utóbar dal 2011 l'è stada bòna ad rivàr a èsar la nùmar quarànta dal mónd in singulàr. In dla sò caréra l'à purtâ a cà òt tìtui in tut ad qvéi ITF.
I gh piàś'n i film 'd asiòṅ, la mùśica rock e far dal cómpri.
Caréra
In dal 2005, cun na carta salvàdga in bisàca, la Morita la tōś part a quìnd'ś an a 'l turnèo ad Tokyo ma la vèṅ fata fóra subìt da la Marija Kirilenko par 6-4 6-4. 'L an dòp la riva a 'l tèrs tùran in sl'èrba ad Birmingham, pardénd in tri sét da la Marion Bartoli, ma pò la vins dū tìtui ITF in Giapòṅ.
In dal 2007 la partìs subìt cun na scunfìta a Auckland cun la Marion Bartoli e pò la n pasa briśa al qualificasiòṅ a gl'Australian Open anc s'la gh la cava a bàtar la Sara Errani. In Luj, baténd par 6-4 1-6 6-2 l'Ai Sugiyama, la riva in di utàṿ a Birmingham in dua la pèrd séc da l'Elena Lichovceva par 2-6 0-6. A Wimbledon la pasa 'l qualificasiòṅ par pò cédar subìt a la Mara Santangelo 1-6 6-3 3-6. In Istâ la śōga dū finài ITF, vinsénd-an una. In Setémbar la riva in di quàrt a Bali (2-6 1-6 da la Daniela Hantuchová) e a Seùl (1-6 2-6 da la pugléśa Flavia Pennetta). La finìs 'l an a 'l nùmar sènt-quarànta dal ranking.
In dal 2008 la s qualìfica p'r al turnèo ad Doha e pò la dà anc la paga a l'Elena Vesnina 6-3 6-4 prima ad cédar a l'Ai Sugiyama 6-4 4-6 0-6. In dal qualificasiòṅ in Dubai la bat subìt l'Angelique Kerber (acsè cuma l'iva fat anc 'l an prima in Fed Cup) ma pò la céd a l'Akiko Morigami. A Amelia Island la và a cà a 'l secónd tùran incruśànd la nùmar sèt dal mónd, la rusa Anna Čakvetadze. In séguit la pèrd pò àtar nóṿ vòlti ad fila prima ad scavśàr la cadéna in tri sét cun la nùmar 570 dal mónd, la Theresa Logar, in dal qualificasiòṅ ad Stanford. Ma la stagiòṅ la cuntìnua pò mâl listés cun i prim tùran a Los Angeles e Bali e al qualificasiòṅ negatìvi a Montreal e in di US Open. A Tokyo la n gh'à mia i punt asè par śugàr dirèt in dal tablòṅ ma lē la gh'à na carta salvàdga in dal bisachèṅ. Dòp avér mandâ a cà par 6-7 7-5 6-4 la nùmar daśnóṿ dal mónd, l'Ágnes Szávay, la pèrd a 'l secónd tùran da la Svetlana Kuznecova 1-6 1-6. A Seùl in Setémbar la s qualìfica baténd 7-5 6-3 la Melanie South. Prima ad cédar a la Shahar Peer in di utàṿ, la règla anc l'Arantxa Rus 6-4 6-1. A Tokyo la gh śōga incóra a la fiṅ dal méś in un WTA da 175.000 dòlar (secónd tùran cun la Caroline Wozniacki) e pò anc in Utóbar quànd la s pòrta a cà 'n ITF da 50.000 dòlar in finàl cóntar la Jarmila Gajdošová. Quàl lè 'l è 'l prim ad tri tìtui ITF ad fila ch'la giapunéśa la s pòrta a cà.
La Morita la taca bèṅ al 2009 cun i quàrt a Auckland (la gh'à da bandunàr dòp avér patî un 0-6 da l'Anne Keothavong), pò la fà un secónd tùran in Dubai (6-7 2-6 da la Daniela Hantuchová) e un prim tùran a Indian Wells (3-6 4-6 da la Roberta Vinci) e a Miami (6-1 4-6 6-7 da la Michaëlla Krajicek). A Róma la bat la Monica Niculescu 6-1 6-3 ma pò la gh'à da dar-ag sù cun la Viktoryja Azaranka ch'l'éra avànti 6-0. A Straśbûrg la gh dà incóra a muć cun la Lucie Hradecká in semifinàl in sal 6-0 1-0 par la céca e pò par lē a taca 'n perìud négar cun nóṿ prim tùran ad fila e na scunfìta subìt in dal qualificasiòṅ dal turnèo ad Turònt. La s fà nutàr sōl a Cantón in dua la pèrd in semifinàl da l'Alberta Brianti par 3-6 5-7, p'r al rèst tri prim tùran.
In dal 2010 la riva in semifinàl a Kuala Lumpur (4-6 1-6 da la rusa Alisa Klejbanova), p'r al rèst gnint 'd arcurdàr a part soquànti scòpli in di prim tùran cuma al 0-6 2-6 patî a Stanford da la Viktoryja Azaranka o al 1-6 0-6 subî da la Francesca Schiavone a gl'US Open. La s tira 'n pôc sù śugànd a la fiṅ d'l an soquànt ITF, vinsénd a Tokyo (al nùmar tri) cun la Jill Craybas e rivànd in finàl a Taipei (al nùmar dū) pardénd cun la Shuai Peng.
In dal 2011 la taca 'l an pardénd subìt 0-6 6-7 da la Simona Halep a Auckland. A Hobart e a Pattaya City la và fóra a 'l secónd tùran incruśànd la Bethanie Mattek-Sands e la Sara Errani. A gl'Australian Open e a Dubai invéci la pasa dū tùran prima 'd andàr a cà cun la Shuai Peng e la Caroline Wozniacki ma in di Emirâ Àrab Unî almànc la dà la paga a la Petra Kvitová. In Maǵ la riva in di quàrt a Bruxelles pardénd da la Francesca Schiavone (nùmar sinc dal mónd) par 2-6 3-6 mént'r a Turònt in Agóst a taca incóra par lē la stagiòṅ di prim tùran (sinc ad fila). A Tokyo e a Uśàka la pèrd da la Marion Bartoli. La sèra 'l an vinsénd 'l ITF ad Taipei (al nùmar sinc), 6-2 6-2 in finàl a la Kimiko Date-Krumm.
La giapunéśa la n è bòna ad vìnsar gnanc na partìda in di prim sinc turnèo WTA dal 2012. In Dubai l'è custréta a śugàr al qualificasiòṅ ma la n i pasa briśa. A Kuala Lumpur la riva in di quàrt ma lè lì lē la gh'à da bandunàr cun la Jelena Janković. A Indian Wells, Miami e a Esturìl la fà sù tri prim tùran, méj in d'l ITF ad Praga in dua la riva in di quàrt, amprufitànd-as dal bandòṅ dla śvisra Stefanie Vögele, ma pò la céd a la padròna ad cà, la Lucie Šafářová, par 1.6 3-6. La giapunéśa la sèra pò la stagiòṅ in sla tèra rósa faghénd i quàrt a Straśbûrg (3-6 4-6 da la Sloane Stephens) e 'n secónd tùran cun la Marija Šarapova a 'l Roland Garros. A Wimbledon, a Dallas e a Cantón la pèrd par tri vòlti cun la cinéśa Shuai Peng in di prim tùran. A Tokyo e a Pechîn la riva invéci a 'l secónd tùran ma pò la gh'à da lasàr strada a l'Angelique Kerber e a la Marion Bartoli. La finìs 'l an cun 'n àtar bandòṅ a Taipei, in di quàrt cun la Misaki Doi.
In dal Śnar dal 2013 la pèrd incóra na vòlta da la sò bistiàsa négra Shuai Peng par 1-6 1-6 a 'l secónd tùran ad Shenzhen (l'à vins sōl na vòlta in nóṿ incóntar śugâ sèg). A Sydney la giapunéśa la mét in riga la Daniela Hantuchová 1-6 6-3 6-3 par pò cédar a n'atra cinéśa, la Na Li, par 1-6 0-6. A gl'Asutralian Open la Morita la gh'à da pigàr-as a 'l tèrs tùran a la Serena Williams par 1-6 3-6 ma pò a la fiṅ dal méś la riva in di quàrt a Pattaya City, baténd anc a 'l prim tùran la nùmar trédas dal mónd, l'Ana Ivanović. In Favràr la céd in dla semifinàla ad Kuala Lumpur a la Karolína Plíšková par 0-6 2-6 mént'r in Mars la pèrd incóra da la Serena Williams a 'l tèrs tùran a Miami. In sla tèra rósa ad Monterrey l’Ayumi la bat la Jana Čepelová par 6-0 6-1 e la Galina Voskoboeva par 6-4 7-6 prima ad far al valìś cun l'Angelique Kerber, nùmar siē dal mónd, cun al puntéǵ ad 2-6 1-6. In Maǵ la riva incóra a 'l tèrs tùran a Esturìl (4-6 3-6 da la Kaia Kanepi) e a Róma (1-6 0-2 bandòṅ cun la Viktoryja Azaranka). A 'l Roland Garros la và fóra subìt cun la Julija Putinceva par 2-6 3-6 e la fà cumpàgn anc in sl'èrba ad Birmingham, ad 'S-Hertogenbosch e ad Wimbledon, cun l'Alison Van Uytvanck (nùmar 205 dal mónd), cun la Sofia Arvidsson e cun la Marina Eraković.