Simona Halep
|
C'l artìcul chè 'l è scrit in
Miranduléś |
La Simona Halep (Custànsa, 27 ad Setémbar dal 1991) l'è na tenìsta ruména. In dla sò caréra l'à śugâ quàtar finàli WTA, vinsénd-an una. In bisàca la gh'à anc siē tìtui ITF. L'è rivàda a èsar la nùmar trénta-sèt dal mónd (al 17 ad Śugn dal 2012).
L'è élta 168 cm e la péśa 60 chilo. La dróa al bras dèstar e la tira 'l arvèrs a dū maṅ. A gh piàś bév'r al spremùdi ad purtugàl.
L'è dvintàda famóśa quànd in dal Setémbar dal 2009 l'à decìś ad far-as scurtàr al téti parchè i éran tròp grandi par lē e i gh dàvan fastìdi a la schina quànd la curìva. Cavànd via tut cal péś lè, la ruména la vliva dar un cuć par la sò caréra[1].
Caréra
La Halep la taca a śugàr a tènis a quàt'r an tgnénd a drē a sò fradèl più grand.
In dal Maǵ dal 2008 la vins al Trofeo Bonfiglio, turnèo p'r i baghét, baténd in dla finàla la sèrba Bojana Jovanovski cun al puntéǵ ad 6–4 6–1. In séguit la s pòrta a cà anc al tìtul dal Roland Garros di śōvan baténd l'Elena Bogdan par 6–4 6–7 6–2.
In dal 2010, tacànd da 'l qualificasiòṅ, la s fà strada a Marbella in dua la bat prima l'Iveta Benešová e pò la Sorana Cîrstea prima ad cédar a la Flavia Pennetta in di quàrt par 4-6 6-7. In Avrìl la fà incóra méj rivànd in finàl a Fès ma pò la pèrd da l'Iveta Benešová 4-6 2-6. A 'l Roland Garros la pasa 'l qualificasiòṅ mandànd a cà la Bethanie Mattek-Sands 6-4 6-7 6-4 ma pò la pèrd da la Samantha Stosur (pò finalìsta) par 5-7 1-6. Par lē prim tùran anc a gl'US Open (4-6 6-4 5-7 da la Jelena Janković) e a Seùl (4-6 4-6 da la Dinara Safina). La sèra 'l an da nùmar utànt'òṅ dal mónd.
La ruména la taca bèṅ asè al 2011 cun i quàrt a Auckland (0-6 2-6 da la Yanina Wickmayer) e al tèrs tùran di Australian Open (1-6 2-6 da l'Agnieszka Radwańska). A Miami la ciàpa na scòpla da la Svetlana Kuznecova 6-0 6-4 a 'l secónd tùran. In Avrìl la riva incóra in finàl a Fès baténd la Kirsten Flipkens 7-5 6-4 ma anc 'sta vòlta la gh'à da lasàr al tìtul a la parmśàna Alberta Brianti ch'la la bat par 6-4 6-3. A 'l Roland Garros e a Cupenàghen la mét in fila dū pas fals a 'l secónd tùran (0-6 2-6 da la Samantha Stosur e 3-6 7-5 5-7 da la Petra Martić). A Wimbledon l'è bòna ad purtàr via al prim sét a la Serena Williams e a gl'US Open la gh la cava a bàtar la Na Li, nùmar siē dal mónd, par 6-2 7-5.
In dal 2012 la mét in fila tri prim tùran in di prim quàtar turnèo śugâ, ciapànd la paga da la Kim Clijsters a Brisbane, da la Paula Ormaechea a gl'Australian Open e da la Roberta Vinci a Parì a 'l quèrt. A Dubai, pasànd p'r al qualificasiòṅ, la bat l'Anastasija Pavljučenkova 6-4 6-2 prima 'd lasàr strada a la danéśa Caroline Wozniacki cun al puntéǵ ad 2-6 3-6. A Doha la riva a 'l tèrs tùran baténd la Daniela Hantuchová 3-6 6-2 7-6 e l'Iveta Benešová par 6-4 6-4 par pò pèrdar da la Viktoryja Azaranka 3-6 1-6. Tèrs tùran anc a Indian Wells (3-6 4-6 da la Marija Šarapova) e a Miami (4-6 6-7 da la Marion Bartoli). A Barcelóna la fà fóra Sloane Stephens e Roberta Vinci in dū sét ma in di quàrt la gh'à da mandàr śò al ròsp sarvî da la Carla Suárez Navarro ch'la gh'à la méj sèg par 6-4 6-1. A Fès la s férma in semifinàl ad òpra dl'ulandéśa Kiki Bertens mént'r a Madrid e a Róma l'è la Venus Williams a dar-ag la paga par dū vòlti a 'l prim tùran. A Bruxelles la s fà strada baténd via via la Jelena Janković, la Monica Niculescu, la Dominika Cibulková e la Sofia Arvidsson prima ad cédar a la pulàca Agnieszka Radwańska par 5-7 0-6. Da lè a la fiṅ d'l an la fà sù sōl di prim e di secónd tùran srand la stagiòṅ a 'l 47śum pòst.
A 'l inìsi dal 2013 la pèrd par dū vòlti da la Sloane Stephens a Hobart e a Melbourne mént'r a Parì la pèrd subìt 6-0 6-3 da la Roberta Vinci cuma 'l an prima. A Miami la patìs a 'l tèrs tùran un 1-6 0-6 da cl'atra Chichi, la Sara Errani. A Marrakesh la và a cà a 'l secónd tùran p'r òpra dla milanéśa Francesca Schiavone, pò vinsidōra dal turnèo. Dòp un prim tùran in sla tèra rósa ad Madrid (2-6 6-4 4-6 da la Lourdes Domínguez Lino), la śōga un turnèo ad c'l àtar mónd a Róma, tacànd cun al bàtar la Daniela Hantuchová in dal qualificasiòṅ e pò asfaltànd la Svetlana Kuznecova 6-1 6-1 a 'l prim tùran. La ruména la manda pò a cà la nùmar quàtar dal mónd Agnieszka Radwańska 6-7 6-1 6-2, la nùmar quìndas Roberta Vinci 6-4 6-2 e la nùmar daśdòt Jelena Janković 4-6 6-0 7-5, cun la sèrba ch'la śbat via tri match point sèg. In semifinàl però la Simona la cata pò la Serena Williams ch'la vins 6-3 6-0. Dòp un prim tùran deludènt a 'l Roland Garros (6-3 2-6 2-6 da la Carla Suárez Navarro), la ruména la gh la cava finalmènt a vìns'r al sò prim tìtul WTA a Nurimbèrga baténd la Galina Voskoboeva in di quàrt, la Lucie Šafářová in semifinàl e l'Andrea Petković (carta salvàdga ad cà) in finàl par 6-3 6-3.
Culegamènt estéran
Nòti
- ↑ La stòria curióśa dla Simona Halep Tennisitaliano.it