Schamhoor

Schambehoorung vun ere Frau

Schambehoorung vu me Ma

Mit Schamhoor wird d Behoorung vun de männlige un wiblige Gschlechtsorgan un dr ongrenzende Regione bezeichnet, wu sich usbilde mit de sekundäre Gschlechtsorgan am Beginn vun de Pubertät.

D Schamhoor sin meischt kräftiger un dunkler wie s Kopfhoor, bi Rothoorige, seli Hellblonde un Schwarzhoorige au glichfarbig. Bi Europäer sin s hifig glockt oder kruselt, bi Afrikaner engkruselt un bi Asiate un de omerikanische Uriiwohner ender glatt un stärker ooligend. Au d Hoordichti un s Mass vun de Usbreitung sin genetisch bedingt un wege dem indviduell verschide. Debi fallt uff, dass d Schambehoorung vun Männer generell weicher isch wie bi de Fraue.

Biologisch stihn d Schamhoor, wie au d Achselhoor, im Dienscht vun de Verdunschtung vun de Duftdrise-Sekret fir de gschlechtsschpezifisch Liibgruch im Scham- un Leischteberich, wu in dr Friezit vun de menschlige Abstommung, wie bi dr ondre Primate un dr ondre Seigetier hit no, e gressri Beditung ghet het. Usserdem diene si au zum Schutz vor Fremdkerper un Kronkheitserreger.

D vollständig oder fascht vollständig Entfernung vun de Schamhoor nennt mer Intimrasur, d teilwis Entfernung vun de Schamhoor (vor allem sitlig zue de Oberschenkel) in de Bikinizone bi Fraue isch vil witter verbreitet un wird au Bikinirasur gnennt. Dr Iibergong zwische beide Variante isch fliessend. Aber au d komplett Intimrasur erfrejt sich in Europa vor allem bi de junge Generation ere immer gressere Beliebtheit. Des gilt, in nit gonz eso starkem Ussmass wie bi de Fraue, mittlerwil au fir Männer. Im Islam isch d Entfernung vun d Schamhoor fir Männer un Fraue vorgschribe.

Schamhoor fange aa wachse in de Pubertät, bi Maidli ugfähr ab em 10. un bi Buebe ab em 12. Lebensjohr. Form, Farb un Dichti kinne arig variiere, wil si genetisch veronlagt sin. Bi Fraue bedecke d Schamhoor di ussere Schamlippe. Si hän vilmol d Form vun eme uf de Kopf gstellte Dreyeck. Bi Männer wachse d Schamhoor uf em Hodesack un um de Penis rum, si hän obe am Penis au d Form vun eme Dreyeck, wo uf de Kopf gstellt isch, wie au bi de Fraue. Bi ugfähr 80% vun de Männer wachse d Schamhoor in ere grade Linie bis zum Buchnabel nuf, oder si wachse in de Form vun eme normale Dreyeck bis zum Buchnabel. In däm Fall siht d Schambehoorung deno rautefermig us. Schamhoor sin generell länger un lockiger wi ondri Kerperhoor, un si zelle zue de issere Gschlechtsmerkmol.

Dä Artikel basiert uff ere fräie Übersetzig vum Artikel „Schamhaar“ vu de dütsche Wikipedia. E Liste vu de Autore un Versione isch do z finde.