Areuse NE

S NE im Lemma isch s offiziell Chürzel vom Kanton Nöieburg und wird bruucht, zum Verwächslige mit Yträäg vom Name Areuse vermyde, wo öppis anders meined.

Areuse isch en Ortschaft i der nöieburgische Gmeind Boudry.

Geografy

S Dorf Areuse lyt am nördleche Rand vom grosse Flussdelta vo der Areuse am nordweschtlechen Ufer vom Nöieburgersee; am See isch früener der chly Hafe Port Areuse gsi. Oben am Dörfli chunt grad s höche Port mit de wyte Räbbärge. D Ussekwartier vo Colombier und vo Boudry wärden immer wie grösser und chöme vo beide Syte uf Areuse zue.

S chlyne alte Dorf Areuse het nume öppen es Dotze Hüüser. Die Sidlig lyt a der alte Strooss vo Nöieburg uf Cortaillod, wo hüt dur d Autobaan ersetzt isch, wo grad näbem Dorf imene Dunäll duregoot. A dere Autobahn isch d Uusfahrt Nummere 8 Areuse.

D Ysebaanlinie Littorail vo Nöieburg uf Boudry yne het e Haltstell bi Areuse. Und ufem grosse Fäld bim Dorf – das Piet heisst Prés d’Areuse – lyt der Flugplatz vo Nöieburg.

Gschicht

S Dorf Areuse isch s erschte Mol anne 1178 i der Namensform Oruse imene Dokumänt gnänt. Es het bis 1832 zu der Pfarrei Colombier ghört und derno zu der Pfarrei Boudry. D Boderächt im Dorfbann, wo nid gross isch, sind bi verschidene Herrschafte gsi, teils au bi dere vom Schloss Colombier. Am Änd isch die chlyni Dorfgmeinschaft, wo im spoote 19. Joorhundert numen öppe sibezg Lüüt gha het, vom Kanton Nöieburg gar nie as en eigeti Gmeind agluegt worde, und anne 1870 het sech s Dorf offiziell der Gmeind Boudry agschlosse.

Literatur

• Germain Hausmann: Areuse (Siedlung). In: Historisches Lexikon vo dr Schwiiz.

46.9566946.8555