Abu Nuwas

Dr Abu Nuwas (arab. أبو نواس; Abū Nuwās, au الحسن بن هانئ الحكمي الدمشقي; al-Ḥasan b. Hāniʾ al-Ḥakamī ad-Dimašqī; * 757 z Ahwaz; † 815), giltet as erschte urbane Dichter vu dr arabische Literatur. In dr Swahili-Literatur wird syy Name fir e fiktivi Narregstalt brucht, wu dailwys di nämlige Gschichte zuegschribe wäre wie em türkische Nasreddin Hodscha oder em nordafrikanische Dschuha.

Är het zur Zyt vum Kalif Harun ar-Raschid (au Harun al-Raschid) gläbt. In 1001 Nacht wird dr Abu Nuwas as Beglaiter vum Kalif gnännt. Die Epoche giltet as d Zyt vu dr klassische arabische Literatur mit em Zäntrum Bagdad, dodmol d Hauptstadt vu Arabie un Persie.

Dr Abu Nuwas het syy Vater Hani nie chänneglehrt. Dää isch e Araber gsii, syy Mueter isch e Wäberi vu Persie gsii. Z Basra un z Kufa het er bi dr greschte Philologe vu syre Zyt studiert. Go s beduinisch Arabisch lehre, wu zue syre Zyt as bsundersch rain gulte het, soll er au ne Johr in dr Wieschti zuebrocht haa.

Literarisch bregt isch die Zyt dur dr Ibergang vu dr Topoi vu dr Beduinedichtig zuen ere Verklerig un Idealisierung vu däne, vilmol au ironisch, vor allem dur stedtischi Dichter.

Dr Abu Nuwas het Wyy-, Jagd- un Liebesgedicht verfasst, in dr Hauptsach in ere homoerotische Form. Wäge däne Gedicht het er aber vilmol Broblem iberchuu un isch au in dr Chärcher gsperrt wore. Ais vu syne Spottgedicht het er mit em Dod bießt: e firnämi Perserfamilie het en eso misshandle loo, dass er an dr Folge gstorben isch. In dr letschte Period vu sym Läbe het sich dr Abu Nuwas vu dr wältlige Lyrik ab- un dr Religion zuegwändet.

Syt 1976 isch e Krater mit 116 Kilometer Durmässer uf em Merkur bi 17,4°N, 20,4°W noch em Dichter gnännt.

Literatur

Heinrich Ludwig Kaster (Ibersetzer, Nochverzeller), Abu Nawas oder die Kunst zu lügen, Piper-Bücherei, München 1961
A. v. Kremer (Hg.), Diwan des Abu Nuwas, des größten lyrischen Dichters der Araber Wien 1855; wieder: Beirut 1982 (hg. und komm. von A.A. M. al-Ghazali, udT Divan)
Philip F. Kennedy, Abu Nuwas. A Genius of Poetry, Oneworld Publications, Oxford, 2005
Philip F. Kennedy, Perspectives of a Khamriyya – Abu Nuwas´ Ya Sahir al-Tarf, In: Heinrichs, Wolfhart und Gregor Schöler (Hg.): Festschrift Ewald Wagner zum 65. Geburtstag. Bd.2: Studien zur arabischen Dichtung, Stuttgart: Franz Steiner Verlag, 1994 (Beiruter Texte und Studien – Bd. 54), S. 258–276
Philip F. Kennedy, The Wine Song in Classical Arabic Poetry. Abu Nuwas and the Literary Tradition, Clarendon Press, Oxford, 1997
Vincent Mansour Monteil, Abu Nuwas: Quintette du vin, In: Heinrichs, Wolfhart und Gregor Schöler (Hg.): Festschrift Ewald Wagner zum 65. Geburtstag. Bd. 2: Studien zur arabischen Dichtung, Stuttgart: Franz Steiner Verlag; 1994 (Beiruter Texte und Studien – Bd. 54); S. 277–282
Julie Scott Meisami, Abu Nuwas and the Rhetoric of Parody, In: Heinrichs, Wolfhart und Gregor Schöler (Hg.): Festschrift Ewald Wagner zum 65. Geburtstag. Bd.2: Studien zur arabischen Dichtung; Stuttgart: Franz Steiner Verlag; 1994 (Beiruter Texte und Studien – Bd. 54); S. 246–257
Ewald Wagner, Abu Nuwas. Eine Studie zur arabischen Literatur der frühen Abbasidenzeit, Franz Steiner Verlag, Wiesbaden, 1965

Weblink

Princeton Online Arabic Poetry Project: Zwei Gedicht zum Aalose uf Arabisch Abu Nuwas, Layla

Dä Artikel basiert uff ere fräie Übersetzig vu dere Version vum Artikel „Abu_Nuwas“ vu de dytsche Wikipedia. E Liste vu de Autore un Versione isch do z finde.