U-47 (Kriegsmarine)
| Vaartuig klas | German Type VIIB submarine |
|---|---|
| Konflik | Tweede Wêreldoorlog |
| Geografiese ligging | 60°0′0″N 13°0′0″W |
| Operateur | Kriegsmarine |
| Crew member(s) | Günther Prien |
| Vervaardiger | Friedrich Krupp Germaniawerft |
| Ligging van vervaardiging | Kiel, Duitsland |
| Wapentuig | torpedo tube, 8.8 cm SK C/35 gun, 2 cm Flak 30/38/Flakvierling |
| Openingsdatum | 29 Oktober 1938 |
| Ingebruikneming | 17 Desember 1938 |
| Commanded by | Günther Prien |
| Vlagstaat | Nazi-Duitsland |
| Skipnommer | 583 |
Die U-47 was was 'n Tipe VIIB duikboot van Nazi-Duitsland se Kriegsmarine tydens die Tweede Wêreldoorlog.[1] Die duikboot en die kaptein Günther Prien het bekend geword toe hulle die HMS Royal Oak gekelder het in Scapa Flow op 14 Oktober 1939 tydens hulle tweede patrollie.
Die duikboot se kiel is op 27 Februarie 1937 gelê en te water gelaat op 29 Oktober 1938. Die duikboot het op 7 Maart 1941 verdwyn tydens sy tiende patrollie. Tydens U-47 se loopbaan het sy 'n totaal van 31 vyandelike vaartuie gesink, insluitend die Britse slagskip HMS Royal Oak, en nog nege beskadig.[2]U-47 is een van die suksesvolste Duitse duikbote van die Tweede Wêreldoorlog.[3]
In 2016 is een van die foutiewe torpedo's wat op HMS Royal Oak geskiet is, gevind en geïdentifiseer.[4]
Kelder van die HMS Royal Oak
[wysig | wysig bron]
Op 8 Oktober 1939 het U-47 met haar tweede patrollie begin. Op 14 Oktober 1939 (ses dae nadat sy die hawe verlaat het), het sy daarin geslaag om die Britse Vloot se primêre basis by Scapa Flow binne te dring.[5] Alhoewel die meeste van die tuisvloot nie destyds in die basis was nie, het U-47 daarin geslaag om 'n teiken, die slagskip HMS Royal Oak, te vind. Nadat sy die Royal Oak gewaar het, het sy met haar torpedo's op die skip gevuur. Haar eerste twee salvo's het niks meer gedoen as om 'n ankerketting te sny nie. Nadat die torpedobuise herlaai is, het die laaste salvo van drie torpedo's die Britse oorlogskip getref en erge oorstromings veroorsaak. Met 'n kantel van 15 grade, is haar oop patrypoorte onder water, wat die oorstromings vererger en die kanteling tot 45 grade verhoog het; die Royal Oak het binne 15 minute gesink met die verlies van meer as 800 man.[5] Na die aanval het Prien die bynaam Der Stier von Scapa Flow ("Die Bul van Scapa Flow") gekry; die embleem van 'n snorkende bul is toe op die toring van U-47 geverf en die beeld het gou die embleem van die hele 7de U-bootflotilla geword.[5] Prien is bekroon met die Ridderkruis van die Ysterkruis, die eerste matroos van 'n U-boot en die tweede lid van die Kriegsmarine wat hierdie toekenning ontvang het. Die res van die bemanningslede is met die Ysterkruis bekroon. Twee ander U-47-bemanningslede het ook later tydens die Tweede Wêreldoorlog die Ridderkruis verwerf: die hoofingenieur (Leitender Ingenieur) Johann-Friedrich Wessels en 1ste wagoffisier (I. Wachoffizier) Engelbert Endrass.
Baie jare later, in September 2002, het een van die onontplofte torpedo's wat U-47 tydens die aanval op die Royal Oak afgevuur het na die oppervlak gestyg van sy rusplek op die bodem. Die onontplofte torpedo, minus sy plofkop, het geleidelik na die kus gedryf, waar dit deur 'n bemanningslid aan boord van die Noorse olietenkskip Petrotrym opgemerk is. ’n Britse Vloot sleepboot het die torpedo onderskep, en nadat dit geïdentifiseer is dat dit aan U-47 behoort het, het EOD-personeel (explosive ammunition disposal) dit ’n myl van die kus onskadelik gestel.
Op 16 April 2016 het deskundiges van die Britse Vloot-bomverwydering 'n Tweede Wêreldoorlog-torpedo wat in Scapa Flow gevind is, ontplof. Dit is vermoedelik een van die wat deur U-47 op Royal Oak afgevuur is.
Ander aktiwiteite
[wysig | wysig bron]Later het U-47 die vaartuig Arandora Star gesink omdat dit as 'n gewapende handelskip beskou is. U-47 het op tien oorlogspatrollies gegaan en dertig handelskepe gesink en nog agt beskadig.
Op 29 Oktober 1940 het Prien 'n ander konvooi, HX79, op pad na Engeland dopgehou. Hy het vier ander bote ingeroep om by daardie aanval te help: U-38, U-46, U-48 en U-100. Daardie nag het hulle gesamentlik 14 skepe gesink, dadelik nog 'n konvooi teëgekom en nog sewe skepe gesink. As dit by die 17 skepe gevoeg word wat die vorige nag deur 'n ander "wolfpak" gesink is, was die totaal in twee dae 38 skepe met 'n totaal van 325 000 bruto geregistreerde ton.
Prien was nou die suksesvolste van alle U-bootbevelvoerders. Aangesien hy die eerste was wat 'n totaal van 100 000 bruto geregistreerde ton gesink het, is hy met die Ridderkruis met eikeblare bekroon.
Vermis
[wysig | wysig bron]Die lot van U-47 en sy bemanning van 45 is onbekend. Die U-47 word sedert 7 Maart 1941 vermis en is vermoedelik in die Atlantiese Oseaan buite Rockall Banks verlore. Daar is aanvanklik gedink dat sy deur die Britse fregat HMS Wolverine gesink is, maar dit het later geblyk dat dit 'n ander U-boot was. Die twee Britse korvette HMS Camelia en HMS Arbutus het ook beweer dat hulle die U-47 gesink het. Daarbenewens bly die moontlikheid bestaan dat die U-47 gesink het as gevolg van 'n fout in een van sy eie torpedo's.
Verwysings
[wysig | wysig bron]- ↑ Helgason, Guðmundur. "The Type VIIB boat U-47". German U-boats of WWII - uboat.net. Besoek op 28 Februarie 2010.
- ↑ Helgason, Guðmundur. "Ships hit by U-47". German U-boats of WWII - uboat.net. Besoek op 28 Februarie 2010.
- ↑ Helgason, Guðmundur. "The Most Successful U-boats". German U-boats of WWII - uboat.net. Besoek op 23 Maart 2010.
- ↑ Found torpedo likely used during U-boat raid 4 Maart 2016, Washington Post.
- ↑ 5,0 5,1 5,2 Helgason, Guðmundur. "The Bull of Scapa Flow". German U-boats of WWII - uboat.net. Besoek op 21 Maart 2010.
Normdata  |
|
|---|