Bengaalse kat
| Bengaalse kat | ||||
| ||||
| Land | VSA | |||
| Ontstaan | Hibride | |||
| Pels | Kort | |||
| Patroon | Kolle, marmerpatroon | |||
| Wetenskaplike naam | ||||
| Felis catus (huiskat) | ||||
| ||||
Die Bengaalse kat (Engels: Bengal) is ’n relatief nuwe hibridiese katras wat ’n kruising is tussen ’n huiskat en ’n Asiatiese luiperdkat (Prionailurus bengalensis). Hulle het die kleurpatroon en lyf van ’n wilde kat,[1] maar die sagte geaardheid van ’n huiskat, mits hulle minstens drie geslagte verwyder is van die oorspronklike luiperdkat.
Die naam is afgelei van die wetenskaplike naam van die Asiatiese luiperdkat, P. bengalensis, en nie van die Bengaalse tier s’n nie.
Geskiedenis
[wysig | wysig bron]
Die eerste vermelding van ’n kruising tussen ’n huis- en ’n Asiatiese luiperdkat was in 1889, toe Harrison Weir in Our Cats and All About Them[2] daaroor geskryf het. Jean Mill (gebore Sugden), wat later ’n groot invloed gehad het op die teling van die moderne Bengaalse kat, het in 1946 oor die kruisteling van die katte geskryf in ’n semesterskripsie vir haar genetikaklas aan die Universiteit van Kalifornië, Davis, Amerika.[3]
In die 1960's het verskeie bekende telers, onder andere Jean Sugden, sulke hibrides geteel, maar daar was nie enige noemenswaardige pogings om ’n spesifieke ras te skep nie. Later is ’n paar katklubs gestig wat gefokus het op hibrides. Van hulle het spesifiek gefokus op ’n dier wat William Engler, lid van die Long Island-panterklub en ’n teler, die Bengaalse kat genoem het. In die 1970's is verder met die katte geteel en hulle is in 1977 by die Amerikaanse Cat Fanciers' Association as eksperimenteel geregistreer.
Omstreeks dié tyd het Jean Mill ook weer die katte begin teel, onder andere met kruisings tussen hibrides en ’n Indiese mau. Greg en Elizabeth Kent was ook van die vroeë telers en hulle het hul eie lyn Bengaalse katte geskep deur Asiatiese luiperdkatte en Egiptiese maus te kruisteel. Jean Mill en die Kents het hard gewerk om die ras bekend te stel en gewild te maak en toe telers meer word, is die Bengaalse teelafdeling van The International Cat Association (TICA) gestig. Die vereniging het die eerste geskrewe standaard in 1986 aanvaar.
Hoewel dit ’n gewilde ras geword het, erken sommige katverenigings, soos die Amerikaanse Cat Fanciers' Association, nie die katte nie. Laasgenoemde erken geen hibrides nie.[4]
Beskrywing
[wysig | wysig bron]Die katte het die lyf van ’n luiperdkat en ’n "wilde" patroon van kolle en strepe. Die kolle kom net op die sye en rug voor en die strepe elders. Hulle het ook swart omlyning soos maskara om die oë.
Die Britse Governing Council of the Cat Fancy (GCCF) erken net bruingevlekte en sneeugevlekte Bengaalse katte, hoewel TICA meer kleure erken, asook ’n kol- en marmerpatroon. In die Nuwe Eienskappe-klas kan nog kleure sowel as langhaarkatte geskou word.[5]
Ná drie geslagte van die oorspronklike kruising af (F3), het die katte gewoonlik die sagte geaardheid van huiskatte.[1] Vir die tipiese kateienaar moet ’n kat verkieslik vier geslagte verwyder wees (F4). Katte van F1 tot F3 word gewoonlik gebruik vir teeldoeleindes.[6]
Nuwe ontwkkelinge
[wysig | wysig bron]Verskeie soorte huiskatte word op die oomblik ontwikkel uit die Bengaalse kat:
- Die Serengeti-kat, uit kruisings met Oosterse korthaar- of Siamese katte met die doel om ’n kat te skep wat soos ’n tierboskat lyk sonder om die gene van ’n tierboskat te gebruik.
- Die Savanne, wat wel tierboskat-gene insluit.
- Die Toyger, uit kruisings met huiskatte om ’n gestreepte "speelgoed-tier" ("toy tiger") te skep.
- Die Cheetoh, ’n poging om twee huiskatrasse met kolle, die Bengaalse kat en Ocicat, te kruisteel.
Sien ook
[wysig | wysig bron]Verwysings
[wysig | wysig bron]- ↑ 1,0 1,1 Bengal Cat Geargiveer 6 Julie 2011 op Wayback Machine Animal World, Exotic Pets & Animals. URL besoek op 18 Januarie 2008
- ↑ Harrison William Weir, Our Cats and All About Them: Their Varieties, Habits, and Management, (Houghton, Mifflin & Co., 1889), p. 55.
- ↑ "A Brief History of the (Bengal) Universe" (in Engels). Bengal Classifieds. Geargiveer vanaf die oorspronklike op 19 Junie 2017. Besoek op 14 Januarie 2012.
- ↑ Peters, Sharon L. (28 Junie 2007). "Bengal cats leap into owners' hearts". USA Today (in Engels). Geargiveer vanaf die oorspronklike op 7 Februarie 2012. Besoek op 25 Oktober 2009.
- ↑ "argiefkopie". Geargiveer vanaf die oorspronklike op 22 September 2013. Besoek op 14 Januarie 2012.
- ↑ Breeding the ALC with domestic cats
Eksterne skakels
[wysig | wysig bron]- Suider-Afrikaanse standaarde Geargiveer 7 Mei 2013 op Wayback Machine
- International Bengal Cat Society
- Genetika Geargiveer 9 Februarie 2012 op Wayback Machine
Wikimedia Commons het meer media in die kategorie Bengaalse kat.
Hierdie artikel is vertaal uit die Engelse Wikipedia
