Barbican Centre
Barbican Centre for Arts and Conferences
Ligging
City of London, Londen
Verenigde Koninkryk
Geopen in
Tipe
Konferensie- en kunssentrum
Webtuiste
barbican.org.uk
Die Barbican Centre is 'n sentrum vir konferensies en uitvoerende kunste in die City of London. Die kunssentrum, wat in Silk-straat, tussen Aldersgate- en Moorgate-straat, geleë en ná 'n boutyd van tien jaar op 3 Maart 1982 deur Haar Majesteit koningin Elizabeth II amptelik ingewy is, is die grootste van sy soort in Europa. Die boukoste het destyds ₤161 miljoen beloop (wat gelykstaan aan ₤480 miljoen volgens die 2014-geldwaarde). Die koningin het tydens die openingsplegtigheid na die kunssentrum verwys as "een van die moderne wonders van die wêreld".[1]
Die sentrum, wat in die brutalistiese styl uitgevoer is, maak deel uit van die Barbican Estate-kompleks, 'n groot behuisingsprojek vir 6 000 mense wat onder meer in drie woonsteltorings op 'n hoogte van sowat 120 meter gehuisves word. In die kuns- en konferensiesentrum, wat jaarliks deur byna 1,8 miljoen mense besoek word, word klassieke en popkonserte aangebied, net soos toneelopvoerings, rolprentvertonings en kunsuitstallings. Die Barbican Centre huisves daarnaas ook 'n biblioteek, drie restaurante en 'n musiekkonserwatorium.
Die sentrum se konsertsaal is die tuissaal van twee internasionaal bekende orkeste, die London Symphony Orchestra en die BBC Symphony Orchestra. Sedert 2013 word ook die Londense opvoerings van die Koninklike Shakespeare-toneelgeselskap (Royal Shakespeare Company) hier gehou.
Die Barbican Centre is in besit van en word ook bestuur en befonds deur die City of London Corporation, die derde grootste befondser van kunsprojekte in die Verenigde Koninkryk.
Verwysings
[wysig | wysig bron]Eksterne skakels
[wysig | wysig bron]
Wikimedia Commons het meer media in die kategorie Barbican Centre.- (en) Amptelike webwerf
