Wikipedia:侵犯版權

一句講嗮：如果你認為將一段內容加入維基百科可能侵犯版權嘅話，就唔好加落去。編輯者應該將佢哋發現嘅侵權內容刪除。

維基百科其中一樣最重要嘅嘢，係佢啲字（唔係媒體文件）可以喺CC BY-SA 3.0協議同埋GNU自由文檔特許條款（GFDL）（版本不限，唔包含不變章節、封面文字或封底文字）嘅條款下，被任何人自由地分發、重用同埋再創作。編輯者一擺原創內容入嚟，就等於同意按照呢兩則協議將內容釋出。如果畀咗正確嘅版權歸屬，來自公家領域或其他兼容協議來源嘅嘢都可以按照版權政策嘅規定使用。

然而，未經版權持有人許可，抄寫來自公家領域或兼容協議以外來源嘅嘢，有可能構成侵權。抄寫經過修改嘅詞句，如果喺創作語言或句子結構中方面仍然同原文存在大量語言相似性嘅話，一樣可能構成侵權。呢種情況應該嚴肅處理，因為侵犯版權唔單止危及維基百科內容嘅再分發，亦會引致法律問題。

圖像或其他媒體文件嘅情況就有啲唔同，維基百科對呢方面容許使用更多種類嘅協議。不過簡單啲講，冇合適嘅自由授權，同時又唔符合非自由內容使用準則嘅媒體文件，應該被假定為唔可以接受。

侵權物品嘅連結亦一樣唔應該提供。