超音鼠騎士

超音鼠騎士
ソニックライダーズ
Sonic Riders
遊戲標誌
類型	競速遊戲
平台	GameCube PlayStation 2 Xbox Microsoft Windows
整	Sonic Team Now Production
發行	世嘉
制作人	湯田高志
總監	森本兼次郎
設計師	森本兼次郎
編劇	宮本裕司
程序	越田健一
音樂	澤田朋伯 床井健一 熊谷文惠
美工	森屋英明
系列	超音鼠系列
模式	單人、多人
發行日期	GameCube、PlayStation 2、Xbox 北美：2006 年 2 月 21 日 日本：2006 年 2 月 23 日 歐洲：2006 年 3 月 17 日 澳洲：2006 年 3 月 23 日 Windows 北美：2006 年 11 月 16 日 歐洲：2006 年 11 月 24 日 澳洲：2007 年 2 月 8 日

《超音鼠騎士ciu1 jam1 syu2 ke4 si6》（英文：Sonic Riders；日文：ソニックライダーズ）係世嘉喺 2006 年為 GameCube、PlayStation 2 同 Xbox 推出嘅一個競速遊戲，玩家控制《超音鼠》系列嘅角色喺漂浮滑板上面同電腦或其他玩家比賽。遊戲由 Sonic Team 同 Now Production 開發，由世嘉出版。本身有計劃出一個 Game Boy Advance 嘅版本，由 Backbone Entertainment 開發，但係呢個計劃之後被棄置。

呢個遊戲嘅發行紀念住超音鼠系列嘅 15 週年，亦係自 1997 年嘅《超音鼠 R》嘅第一個《超音鼠》競速遊戲。呢個遊戲亦係系列創作者之一中裕司最後參與開發嘅《超音鼠》遊戲。

呢個遊戲有兩個續集，分別為 2008 年嘅《超音鼠騎士零重力》同 2010 年嘅《超音鼠自由騎士》。

遊戲玩法

《騎士》環繞住角色用稱為「極限裝備」（extreme gear）嘅反重力滑板、單車同溜冰鞋嚟比賽，玩家同其他 7 個人鬥快環繞賽道 3 次。贏比賽嘅關鍵係螢幕右下嘅空氣罐（air tank），作為極限裝備嘅燃料，喺比賽過程入面會一直消耗。角色亦都可以渦輪加速，加快空氣罐嘅消耗嚟換取速度突然爆發。如果一個玩家用渦輪加速嚟撞入另一個玩家，佢嘅角色會攻擊對方嚟爬頭。

除咗渦輪加速之外，角色漂移同儲力跳亦都會加快空氣罐嘅消耗。如果空氣罐消耗完嘅話，角色就會改用徒步跑，避免玩家渦輪加速、攻擊、漂移同儲力跳呢啲極限裝備先做到嘅動作。玩家要補充返空氣嘅話有兩個方法：用賽道入面嘅加油站或者用斜坡同其他車手留低嘅滑流嚟表現特技，特技越高分，補充嘅空氣就越多。

就好似大多數嘅《超音鼠》遊戲一樣，角色亦都可以喺賽道上收集金環，收集到足夠嘅金環嘅話就可以升級，提高力量同空氣罐容量。玩家亦都可以用比賽收集嘅金環嚟買新嘅極限裝備。

遊戲嘅每個角色都有各自嘅數值，比賽表現亦會略有分别。角色分為 3 種，分別為速度、力量同飛行，各自都有唔同嘅能力。速度角色可以用佢哋嘅極限裝備嚟磨軌；力量角色可以打爛賽道上面嘅障礙；飛行角色可以用天空入面嘅加速環嚟加速。每個賽道亦會設有每種角色先利用到嘅捷徑。

角色

玩家可以控制共 16 個角色，其中 13 個為《超音鼠》系列嘅角色，其餘三個為嚟自其他世嘉系列嘅客串，分別為嚟自《超級馬騮波》嘅 AiAi、嚟自《太空頻道 5》嘅 Ulala 同嚟自《飛天幽夢》嘅 NiGHT。

屬於《超音鼠》系列嘅 13 個角色為：

• 原有嘅角色
  • Sonic the Hedgehog（超音鼠；ソニック・ザ・ヘッジホッグ）
  • Miles "Tails" Prower（マイルス "テイルス" パウアー）
  • Amy Rose（エミー・ローズ）
  • Knuckles the Echidna（ナックルズ・ザ・エキドゥナ）
  • Cream the Rabbit（クリーム・ザ・ラビット）
  • Shadow the Hedgehog（シャドウ・ザ・ヘッジホッグ）
  • Rouge the Bat（ルージュ・ザ・バット）
  • 蛋頭博士（Dr. Eggman；ドクター・エッグマン）
• 《騎士》系列介紹嘅新角色
  • Jet the Hawk（ジェット・ザ・ホーク）
  • Wave the Swallow（ウェーブ・ザ・スワロー）
  • Storm the Albatross（ストーム・ザ・アルバトロス）
  • E-10000G
  • E-10000R

故事

故事喺巴比倫盜賊團（Babylon Rogues）嘅基地開始。盜賊團嘅領袖，Jet，喺佢間房入面欣賞開往巴比倫花園（Babylon Gardens）嘅鎖匙，一個據講可以解開佢哋巴比倫祖先嘅秘密嘅神器同傳家寶。蛋頭博士到訪，聲稱可以用混沌翡翠（Chaos Emeralds）將巴比倫花園重新崛起，並徵求盜賊團幫手收集全 7 粒。盜賊團同意，但係喺偷咗第一粒翡翠之後嗰陣撞見到搵緊同一粒翡翠嘅 Sonic、Knuckles 同 Tails。主角三人緊追於後，但係盜賊團成功逃脫。第二日，Sonic、Knuckles 同 Tails 三人喺廣告牌上面見到蛋頭博士宣傳一個叫「EX 世界大獎賽」（EX World Grand Prix）嘅極限裝備比賽。參賽者需要提交一粒混沌翡翠，而贏家會贏全 7 粒。當佢哋發現巴比倫盜賊團會參加嗰陣，三人決定參賽。

三人嚟到比賽會場嗰陣遇到 Amy Rose，並且同意俾佢加入。Sonic、Knuckles、Tails 同 Amy 同盜賊團比賽好幾輪。Sonic 喺最後一輪就嚟贏得第一名，但係佢嘅滑板被盜賊團嘅 Wave 特意破壞，令到 Jet 贏得比賽同全 7 粒混沌翡翠。Jet 用混沌翡翠結合嘅能量將巴比倫花園由地底掘起，諗住用佢手入面嘅鎖匙嚟解鎖巴比倫法院蘊藏嘅寶藏。但係，喺佢意識到之前，蛋頭博士已經乘機偷走咗個鎖匙。蛋頭博士發動佢嘅飛船前往花園；途中，佢嘅飛船被試圖阻住佢嘅 Amy 捉實。

Sonic 隨手攞起另一部滑板去追蛋頭博士；Jet 挑戰 Sonic 又一場比賽，鬥快阻止蛋頭博士。兩人到達巴比倫花園，發現蛋頭博士持劫 Amy 做人質。Sonic 同 Jet 結合佢哋嘅力量嚟拯救 Amy 同解開秘密嘅鎖匙。

Jet 用鎖匙解開花園嘅大門，盜賊團、Sonic、Knuckles、Tails 同 Amy 緊跟隨後，遇見巴比倫護衛（Babylon Guardian），一隻保護寶藏嘅巨怪。7 人合作打敗護衛，導致一個寶藏箱出現。蛋頭博士再次出現，要求佢哋俾個寶藏佢。佢發現寶藏淨係一個地氈，極度困惑，當場暈低。Jet 用鎖匙令到地氈飛起，揭示地氈其實係一個早期嘅極限裝備。

Sonic、Knuckles、Tails 同 Amy 告別巴比倫盜賊團。Jet 應承以後會再同 Sonic 比賽。

出面網頁

• 超音鼠維基超音鼠騎士
• 超音鼠騎士影片