奶媽

  想搵電子產品嘅話，請睇流動充電器。

BB嗰時嘅路易十四同佢嘅奶媽

乳母，又叫乳娘、奶娘、奶媽、奶母、奶婆，係請嚟用人奶餵哺孲𤘅子嘅婦女。喺古代，奶粉或其他人奶代用品未發明同未普及時，孲𤘅子嘅生母如果唔能夠或者唔肯哺育佢嘅仔女，就會請奶媽。尤其係上流社會、宮廷，唔少女性都唔會親自餵哺仔女，因此請奶媽喺上流社會好普遍。

請奶媽嘅原因有：

• 孲𤘅子生母死咗或唔同孲𤘅子一齊住
• 藥物導致人奶唔適宜哺孲𤘅子（包括醫療用藥同埋吸毒）
• 疾病
• 人奶唔夠餵孲𤘅子
• 唔肯餵哺孲𤘅子（例如驚影響身材）

另外，多胞胎嘅阿媽就算有餵人奶，亦會因為奶水唔夠餵咁多個孲𤘅子而要請奶媽。

奶媽嘅身份

只有喺授乳期嘅女性先可以做奶媽，因為佢哋通常係有餵佢哋嘅親生仔女。

一個阿媽只係畀到有限嘅奶水，如果幾個禮拜都有餵人奶，乳房分泌嘅人奶就會增加，通常可以足夠餵雙胞胎，因此只有一胎嘅情況下，人奶足夠餵多一個孲𤘅子。由於從前嘅奶媽多嚟自低下階層，喺奶水唔夠餵多一個孲𤘅子嗰時，往往被逼餵哺唔係自己親生嘅孲𤘅子，有啲奶媽更係妹仔身份。