水

水（粵拼：seoi2，英文：water）係一種氫氧化合物嘅俗稱，學名叫氧化氫（joeng5 faa3 hing1），純水只含有單一種分子，由兩個氫原子同埋一個氧原子合成。化學方程式應該表達成 ${\ce {H_2O}}$ 。水係地球上最常見嘅物質之一，係包括人類在內所有生命生存嘅重要資源，亦係生物體最重要嘅組成部分。

地球超過百分之七十表面俾水覆蓋，嗰啲地方叫海洋，或者簡單啲叫做海。水分為淡水同鹹水，而鹹水即係所謂嘅海水，佔全球嘅97.5%，而淡水有2.5%。冰佔咗淡水2.5%嘅1.7%，所以用得到嘅淡水（過濾咗嘅）係少之又少。淡水係其中一種全世界都爭奪嘅自然資源之一，太多水叫水浸，太少水叫乾旱。

水同人類

水可以發電。係靠地心吸力嘅原理利用水由高地向下衝嗰度衝力推郁部發電機。

成年人類身體嘅主要成份含有超過百分之八十嘅水，由於水響身體入面負起咗好多好重要嘅工作，譬如散熱、帶走毒素之類，而人體亦會無時無刻排走水份，好似唞氣、屙尿、出汗等等。所以人一定要飲返啲水去補充返不斷喺身體流失嘅水。

水嘅性質

喺常溫常壓下，水係無色無味嘅透明液體。喺自然界裏面，純水超罕見，水通常係酸、鹼、鹽等物質嘅溶液，習慣上仍然將呢種水溶液叫做水。純水可以通過蒸餾作用取得，當然，呢個只不過係相對意義上純水，唔可能絕對冇雜質。水係一種可以喺液態、氣態同固態之間轉化嘅物質。固態嘅水叫做冰；氣態叫水蒸氣。

喺20℃時，水嘅熱導率係0.006 J/s·cm·K，冰嘅熱導率係0.023 J/s·cm·K，當雪嘅密度係0.1×103 kg/m3時，雪嘅熱導率係0.00029 J/s·cm·K。水嘅密度喺3.98℃嗰陣時最大，係1×103kg/m3，溫度高過3.98℃嗰陣，水嘅密度會跟住溫度升高而減小，喺0～3.98℃嗰陣，水唔跟住熱脹冷縮嘅規律，密度隨溫度嘅升高而增加。水喺0℃嗰陣，密度係0.99987×103 kg/m3，冰喺0℃嗰陣，密度係0.9167×103 kg/m3。所以冰可以浮喺水面上面。

水嘅熱穩定性勁強，水蒸氣加熱到2000K或者再高啲，都只有勁少量離解做氫同氧，但水喺通電嘅條件下（電解）會離解做氫同氧。具有好大嘅內聚力同表面張力，除咗汞之外，水嘅表面張力係最大，重可以產生明顯啲嘅毛細現象同吸附現象。純水有勁微弱嘅導電能力，但係普通嘅水因為含有少量嘅電解質（好似礦物質、溶解大氣中二氧化碳形成嘅碳酸）而有較強嘅導電能力。

水嘅來源

地球係太陽系八大行星之中唯一有液態水大部分覆蓋嘅星球。地球上水嘅起源是學術上存在好大分歧，目前有幾十種唔同嘅水形成學說。有觀點認為喺地球形成初期，原始大氣中嘅氫、氧化合成水，水蒸氣逐步凝結並形成海洋；亦有觀點認為，形成地球嘅星雲物質中原先就存在水嘅成分。另外嘅觀點認為，原始地殼中矽酸鹽等物質受火山影響而發生反應、析出水分。亦有觀點認為，俾地球吸引嘅彗星同隕石係地球上水嘅主要來源，甚至現今地球上嘅水仲喺度不停增加。

水污染議題

如果飲咗受污染嘅水，會嚴重損害生物的健康。

水文化

古代世界觀入面嘅水

水作爲人類生存嘅必需品，人類喺好早期已經對水有所認識。古代西方嘅四元素說，其中一個就係水；四元素說認爲所有嘢都係由地、水、風、火組成，而呢四種元素係有乾濕、凍熱區分，水就係代表濕、凍嘅嘢。中國就有五行學說，水代表所有嘅液體，以及具有流動、潤濕、陰柔性質嘅事物。