Kirish söz Tirishchan tilshunas ziyaliy memet tursun zunun ependimning nechche on yilliq japaliq eqli emgikining méwisi bolghan bu gholluq eserge kirish söz yézish sheripining péqirgha chüshüshi hem pexirlinerlik we shundaqla mes’uliyiti...
moreKirish söz
Tirishchan tilshunas ziyaliy memet tursun zunun ependimning nechche on yilliq japaliq eqli emgikining méwisi bolghan bu gholluq eserge kirish söz yézish sheripining péqirgha chüshüshi hem pexirlinerlik we shundaqla mes’uliyiti éghir eqlane wezipidur. Mezkur kitabni qoligha alghan her qandaq bir uqurmen uning weznini dengsep körginide salmaqliq bu eserning royapqa chiqishi üchün mu’ellipning qanchilik ejir we méhnet singdürgenlikini hés qilalaydu. Démekchimenki mezkur eser özini özi tunushturup turuptu, emeliyette péqirning oshuqche zuwandarazliq qilishining lazimi yoq bolsimu, emma zimmemge artilghan bu dostluq burchidin bash tartishni tughra tapmidim. Shunglashqa bu yerde ikki kelime söz qilp özümning toluq shekillinip bolalmighan qismen shexsi qarashlirimni oqurmenler bilen ortaqlishishning zexmiti bolmisa deymen.
Aldi bilen bu kitabqa edebiy zhanir nuqtisidin qaraydighan bolsaq, qimmetlik medeniyet we örp - adet miraslirimizning mezmunini tughra chüshinip, usulliridin yolida paydilinish we ularni qelem sheklide saqlap qilish meqsitide pütülgen bu eserni énsiklopédiye bilen lughetchilik ilmining jewhiri singdürülgen bir yéngi edebiy shekil dep qarisaq xata bolmaydu. Yeni qismen söz atalghular we milli oyun-chaqchaqlargha tebir bérish we namlirining kélish menbesi qatarliq tepsilatlarni kéngeytip chüshendürüp eserning énisklopidik tüsini namayan qilghan bolsa, élipbe tertipide tüzülgen söz qurulmisi kitabning lughetchilikke xas tereplirini mu’eyyenleshtürgen. Bu yerde yene shuni tekitlesh kérekki, kitabtiki mezmunlarning keng we chungqur bolushidin bashqa, mu’ellipning mezkur eserning tüzülme we qurulmisini mentiqiwi we ilmi yusunda orunlashturush üchünmu nurghun ejir singdürgenliki melum. Kitabqa ilmi qimmet nuqtisidin qaraydighan bolsaq mezkur eser xelq arisida tarqilip kelgen, emma toluq retlep basma sheklige keltürelmigen uchurlar bilen qismen örp - adet bilen munasiwetlik yazmilarning tunji qétim bir toplam sheklide qéliplashturulup we tehrirlep neshir qilinishi bolup, buning özila bir qimmetlik eqli bayliq hésablinidu. Bu yerde mushundaq bir köp emgek telep qilidighan eserning birla aptorning qolidin chiqishigha apirin oqumay turalmaymiz.
Antropologiye ilmining medeniyet uqumigha bergen éniqlimisigha qaraydighan bolsaq medeniyet démek melum bir qowm xelqige ortaq bolghan bilim we xisletlerning birikmisidur, yeni medeniyet démek tili, dini étiqadi, yémek ichmek aditi, ijtima’iy qilmish adetliri, naxsha -usul, muzika we sen’et, ölum yitim, toy-tökün adetliridiki özlgichiliktin ibaret nurghun mezmunlarning birikmisidur. Yighip éytqanda bu insaniyet jemiyitining ortaq herket qilmishi we qimmet qarishining bir toplam ichidiki özgiche ipadilinish bolup, u bir qowm kimlikining éniqlimisigha mezmun qatidighan tepsilatlardur. Yeni shexslerning tewelik éngi, kolléktipning birlik héssiyati we bir ijtima’iy jem’iyetning özini tonutushi üchün kem bolsa bolmaydighan kündilik tepsilatlarning mejmu’esi medeniyet katégoriyesige kiridu. Buningdin körüwélishqa boliduki, örp- adet millet yaki qowmning igilikining mewjutluqi üchün kem bolsa bolmaydighan eng muhim amildur. Milli medeniyet mirasi bolmighan qowmning millet mewjutluqidin éghiz ichish xuddi su yüzidin ayni tutushqa urun’ghandek bihude xiyalidur. Mushu nuqtidin élip éytqandimu mezkur kitabni bash-panahsiz qalghan millitimiz üchün ata mirasini bilish we dawamlashturush üchün kem bolsa bolmaydighan bir rahname déyishke bolidu.
Bu yerde yene shuni tekitlep ötüshke tughra kéliduki biz qoghdaymiz démekchi bolghan örp - adet we milli medeniyet hergizmu bir turghun uqum yaki özgermes hadise emes, belki özgirishchanliq ichide méngiwatqan emma mukemmel qurulmisi shekillinip bolghan bir kolléktip miras közde tutilidu. Medeniyetning özi özgirishchanliqi küchlük tarixi ré’alliq bolup, insaniyet medeniyitining tarixi seperlirige nezer salidighan bolsaq medeniyetning shekillinish basquchliridiki birdin bir özgermey kéliwatqan xaraktéri uning dawamliq özgirip méngishidur. Biz qoghdimaqchi bolghinimizmu del özimiz sahip bolup, özimizning tarixi kechmishlirimiz, eqiliy qudritimiz we ijtima’iy éhtiyajimizning turtkisi asasida qélipliship, omumliship we ammibabliship, özgichilikimizni namayande qilip kéliwatqan medeniyet simwolliri bilen shularning tereqqiyat teqdirge igidarchiliq qilalaydighan hoquqimizdur. Bashqiche qilip éytqanda saqlap qélishqa tirishiwatqinimiz örp - adet we medeniy miraslirimizning subyéktip ipadilinish usullirila emes belki ashu örp -adetlerning yönilishi, özgirishi we kelgüsi teqdirige ige bolalaydighan igidarchiliq hoquqidur.
Millitimizning medeniyet we kimliki misli körülmigen hujumgha uchrawatqan halqiliq bir peytte pütülgen bu eserni del waqtida yaqqan shipaliq yamghurgha oxshatsaq mubalighe bolmas. Ejdadlirimiz nechche esirlerdin biri nurghun medeniyetler bilen uchriship, siyasi we ijtima’iy özgirishlerni béshidin kechürüsh bedilige mukemmelleshtürüp chiqqan ata miras bolghan milli medeniyetning mewjutluqi xirsqa duchar boluwatqanliqi hemmimizge melum. Milletning kelgüsi istiqbali éniqisiz bir kölenggüde turmaqta. Wetendiki siyasiy muhitqa nezer salsaq nöwette milli medeniyitimiz omumyüzlük hujumgha uchrap, özi peyda bolup, qélipliship we takamullashqan ashu ana tupraqta yoqulush girdabigha bérip qalmaqta. Weten ichide milletning örp - adetlirining ipadilinishliri cheklimige uchrap, xelqimizning kündilik turmushidin qistilip chiqirilipla qalmay, milli medeniyetlerni tarqitidighan, tonushturidighan we analiz qilidighan qanallarmu tosalghugha uchrimaqta. Meslen milli ziyaliylirimiz türmilerge tashlinip, öz tilimizda yézilghan eserler yoq qilinip, milli metbu’atlar taqilip, tilimiz aldi bilen tepekkur tilidin terjime tiligha aylinip emdilikte bolsa asta asta kéreksiz bir yükke aylinip qélish girdabigha kélip qaldi. Démek, mezkur kitabta xatirlen’gen mezmunlar bilen tunush bolghan mushu ewlad xelqtin kiyin milli medeniyitimizning istiqbalining qandaq bolushi téxi éniqsiz. Mushundaq kétiwerse eger bir küni dewr özgirip milli örp - adetlirimizni qaytidin térildurush pursiti yaritilghan teqdirdimu wetinimizde paydilan’ghudek yazma menbelermu tépilmay qélishi mumkin. Eger qolimizda mushundaq bir yazma xatire bolmisa tamamen yat bir medeniyetning tesiride yétilgen kiyinki ewladlarning öz medeniyitini bilishi asan’gha toxtimaydu. Til yoqaldi démek, ashu tilgha mezmun bergen we mewjutluqini saqlap qalghan medeniyet tupriqi yoqaldi démektur. U chaghda ghuwa eslime we subyéktip perezdin milli medeniyetni qayta tizildurush asan emes.
Yighip éytqanda mezkur kitabning bügünkidek bir syasiy muhitta otturigha chiqishi xelqimizning zide qiliwétilgen könglige melhem bolghusi. Roshenki milletning teqdiri üchün bash qaturushning shekilliri her xil bolup, her kim özining qudriti, qimmiti we qabiliyitige mas wasitiler bilen milletning mewjutluqini saqlap qélish üchün küresh qiliwatidu. Tarixta ming leshker bilen yéngelmigen jengni bir qelem bilen ghalibiyetke chiqarghanlarning misalimu az emes. Bizmu milli mewjutluq kürishimizning frontlirini siyasi, iqtsadiy we eqiliy sehnilerde teng élip barghénimizdila ümidsizlik ichidin ümid, qarangghuluq ichidin yuruqluq köreleymiz. Her bir uyghur a’ilisining bu kitabni sétiwélip saqlap quyushi xelqimizning eqli frontida jeng qiliwatqan ziyaliylirige béreleydighan eng ali mukapatidur.
Doktur amir seydula
2019- yili mart,