Abdy Ter Doest
Ter Doest es de noame van e vroegere cisterciënzerabdy in Lissewege, nu deelgemeente van Brugge.
D'abdy èt e styf belangryke rolle gespeeld by d'inpolderienge van land in Vloandern, Zeeland (Saeftinghe) en Olland. Et wos ook van groot belang vo 'n andel in wulle mè de Vlamsche steejn.
Lambert, Ere van Lissewege die up 't Upperof wunde, gof in 1106 en doming mè kapelle an de benedictynn die d'r en abdy up stichnten. In 1175 èn de cisterciënzers van de Duunnabdy van Koksyde d'abdy overgenoomn en in 1624 mè de Duunnabdy verenigd.
't Enigste da nu nog overbluuft, es de 17e eeuwse toegangspoorte en de styf grote tiendescheure uut de 13e eeuwe. Z'es 50,5 meiter lank, 23,75 m breed en 'n topgevel es 30,75 m oge. De zymeurn zyn 9,25 meiter oge. Twee reekn van tien eekn pylers droagn ol meer of achtounderd joar lank et eekn dakgebinte, uniek in zyn sorte. In 1711 èn ze 't strooin dak vervangn deur 38 000 dakpann.
Willem van Saeftinghe, die in 1302 mè de Vloamiengn mèvocht in d'n Guldnspoornslag, wos leeknbroeder van d'abdy. Je zoudt d'n Franschn anvoerder Robert II van Artois van zyn peird gesleegn èn en gedood èn.