Novokuibiševsk

Novokuibiševsk
Новокуйбышевск
Lidnanznam;	Flag;
Valdkund	Venäma
Eläjiden lugu (2021)	98,306 ristitud
Pind	86 km²
Pämez'	Vladimir Nikeräsov; (reduku 2023—,; velgusentäutai)
Telefonkod	+7−84 635-xx-xxx
Avtokod	63, 163
Aigvö	UTC+4 (MSK+1)

Novokuibiševsk (ven.: Новоку́йбышевск) om Venäman lidn da lidnümbrik Samaran agjan keskuzpalan päivlaskmas. Se om agjan nellänz' lidn eläjiden lugun mödhe.

Istorii

Eländpunktan aluz om pandud vl 1946 läz Lipägi-raudtestancijad sauvomha kivivoiümbriradajad tegint. Radnikžilo sai lidnan statusad vn 1952 22. päiväl uhokud.

Novokuibiševsk šingotase kivivoin ümbriradmižen tegimel, kivivoihimižen, sauvondmaterialiden i sömtegimišton edheotandoil. Keskvolgan kivivoinümbriradmižen tedoinstitut radab.

Geografijan andmused

Lidn sijadase Volgan hural randpolel, augotase kudes kilometras jogespäi, 90 m ü.m.t. keskmäižel korktusel.

Novokuibiševsk seižub ani Samaran suvipäivlaskmaižen röunan taga, toine lähembaine lidn om Čapajevsk vides kilometras suvipäivlaskmha.

Klimat om ven. Voden keskmäine lämuz om +5,6 C°, kezakun-elokun +19,8..+21,7 C°, tal'vkun-uhokun −8,2..−12,3 C°.

Tobmuz

Kaik seičeme žilod mülüdas lidnümbrikho Novokuibiševskan ližaks, niiden kesken Majak-žilo (1787 rist.). Lidnümbrikon pind — 263,25 km².

Lidnümbrikon tobmuden pämez' om sen Administracijan pämez'. Edeline lidnümbrikon pämez' om Sergei Markov (tal'vku 2016 — reduku 2018, kül'mku 2019 — reduku 2023). Lidnümbrikon Duman ezimez' om Jurii Ferapontov vn 2010 sulakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 108 449 ristitud, lidnümbrikon — 110 729 ristitud. Vn 2021 rahvahanlugemižen mödhe lidnan ristitišt oli 98 306 eläjad. Vl 2017 kaik 102 933 ristitud elihe lidnas i 105 161 ristitud kaikes lidnümbrikos. Kaikiš suremb lidnan ristitišt oli 116 400 eläjad vl 1999.

Ortodoksižen hristanuskondan kuz' jumalanpertid^[1], časoun' i vauktustuzkeskuz oma saudud. Islaman pühäpert' om avaitud lidnas.

Professionaližen opendusen aluzkundad oma valdkundaližed Novokuibiševskan gumanitariž-tehnologine kolledž^[2], Novokuibiševskan medicinine kolledž^[3] (Samaran medkolledžan filial), Samaran valdkundaližen tehnižen universitetan filial.

Transport

Avtobusad (25 maršrutad), trolleibusad (11 maršrutad) i maršruttaksid oma kundaližeks transportaks lidnas. Trolleibusan verk zavodi radod vl 1986, sen jonod oma levitadud il'man redustoitandan tagut. Municipaline edheotand holitab avtobusan i trolleibusan maršrutoid. Lidnoidenkeskeine avtostancii radab.

Novokuibiševskai-päraudtestancii radab vspäi 1948. Sen ližaks seižutezpunktad oma: Norišton (Молодёжная), Lipägi, 1084. kilometr-platform.

Jogiport i jogistancii ratas lidnümbrikon žiloiš.

Galerei

Lauk vl 2017
Norišton «Rus'»-klub (Venä, vn 2018 olend)
Novokuibiševskai-päraudtestancijan sauvuz vl 2015

Homaičendad

Irdkosketused

Lidnan Administracijan informacine portal (nvkb.ru). (ven.)

Novokuibiševsk Vikiaitas

	Samaran agjan lidnad
	Čapajevsk \| Kinel' \| Neftegorsk \| Novokuibiševsk \| Oktäbr'sk \| Otradnii \| Pohvistnevo \| Samar \| Sizran' \| Žigulövsk \| Tol'jatti

[1] Novokuibiševskan pühäpertid sobory.ru-saital. (ven.)

[2] Novokuibiševskan gumanitariž-tehnologižen kolledžan sait (nggtk.ru). (ven.)

[3] Novokuibiševskan medkolledžan lehtpoled Samaran medkolledžan smedk.ru-saital. (ven.)

[1]

[2]

[3]