Labinsk

Labinsk
Лабинск
Lidnanznam;	Flag;
Valdkund	Venäma
Eläjiden lugu (2022)	57,273 ristitud
Pind	46,41 km²
Pämez'	Sergei Šeremet; (kezaku 2020—)
Telefonkod	+7−86 169-xx-xxx
Avtokod	23, 93, 123
Aigvö	UTC+3 (MSK+0)

Labinsk (ven.: Лаби́нск) om Venäman lidn da lidnankund Krasnodaran randan suvipäivnouzmas. Se om Labinskan rajonan administrativine keskuz.

Istorii

Ende nogailaižiden Nauruz-aul oli olmas lidnan sijas, sid' adiglaižiden Četiun-aul (adig.: Чэтыун) oli pandud mantazole Kavkazan sodan aigan. Nügüdläižen eländpunktan aluz om pandud Donan kozakoil vl 1841 kuti Labinskai-stanic, nimitihe jogen mödhe. Se sai lidnan oficiališt statusad vn 1947 23. päiväl redukud Labinsk-nimenke.

Labinsk šingotase sömtegimištol (leibtegim, pühävoin tegim, saguden edheotand, maidtegim, konservtegim, mineraližen veden butiliruind i oluden pästand, villänpurnud), sauvondmujuiden da lakoiden järedal tegimel, puižen pakuitesen pästandal, bal'neologižeks kurortaks («Laba»-sanatorii reduidenke i termaližidenke vezidenke, severz'-se lebubazoid läz lidnad). Tehtas šapkoid i pövuid karvaspäi.

Geografijan andmused

Lidn sijadase Lab-jogen oiktal randal (ven.: Лаба, Kuban'-jogen hurapol'ne bassein), 270 m ü.m.t. keskmäižel korktusel, Kavkazan ezimägištonno.

Adigei sijadase jogen vastrandal, matkad Krasnodarhasai om 180 km päivlaskmha. Lähembaine lidn om Kurganinsk 27 km pohjoižhe orhal vai kaikil teil. Labinskai-raudtestancii (ven.: Лабинская) om olmas jonol Kurganinskaspäi.

Tobmuz

Prohladnii-žilo (1416 rist. vl 2010) da Mirun Zorä-futor (ven.: Заря Мира, 114 rist. vl 2010) mülüdas lidnankundha Labinskan ližaks.

Edeline lidnankundan pämez' (Administracijan pämez') om Aleksandr Kurganov (heinku 2018 — kezaku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 62 864 ristitud, lidnankundan — 64 394 ristitud. Vl 2018 kaik 60 164 ristitud elihe lidnas i 61 649 ristitud kaikes lidnankundas. Kaikiš suremb lidnan ristitišt oli 64 300 eläjad vl 1996.

Rahvahad (enamba 1 % vl 2010): venälaižed — 91,8 %, armenijalaižed — 3,3 %, ukrainalaižed — 1,2 %, toižed rahvahad — 3,0 %, rahvahuden ozutandata — 0,7 %.

Ortodoksižen hristanuskondan Jumalanmaman Emäganpäivän päjumalanpert'^[1]^[2] om saudud lidnas vll 1887−1891, se om udessündutadud vspäi 1991.

Labinskan medicinine kolledž^[3], agrarine tehnikum^[4] i socialiž-tehnine tehnikum^[5] oma lidnan professionaližen opendusen aluzkundoikš.

Galerei

Ph. Aleksandr Nevalaižen jumalanpert' (om saudud vspäi 2006), vn 2022 nägu
IS-3-tank Vägestusen torgul (2016)
Agrarižen tehnikuman tulend (2014)
Nevondkundaline lidnanznam

Homaičendad

Irdkosketused

Lidnankundan tobmuden sait (labinsk-city.ru). (ven.)

Labinsk Vikiaitas

	Krasnodaran randan lidnad
	Abinsk \| Anap \| Apšeronsk \| Armavir \| Belorečensk \| Gelendžik \| Gul'keviči \| Hadižensk \| Hul Purde \| Jeisk \| Korenovsk \| Krasnodar \| Krimsk \| Kropotkin \| Kurganinsk \| Labinsk \| Novokubansk \| Novorossiisk \| Primorsko-Ahtarsk \| Slavänsk Kubanil \| Soči \| Temrük \| Tihoreck \| Timašovsk \| Tuapse \| Ust'-Labinsk

[1] Jumalanmaman Emäganpäivän päjumalanpertin sait (svuspenie.labinsk.ru). (ven.)

[2] Labinskan pühäpertid sobory.ru-saital. (ven.)

[3] Labinskan medicinine kolledžan sait (lmk.labinsk23.ru). (ven.)

[4] Labinskan agrarižen tehnikuman sait (lat-labinsk.ru). (ven.)

[5] Labinskan socialiž-tehnižen tehnikuman sait (lstt.edusite.ru). (ven.)

[1]

[2]

[3]

[4]

[5]