Kuhmo

**Kuhmo**
	Lidnanznam;
Valdkund	Suomenma
Eläjiden lugu (2024)	7,507 ristitud
Pind	5,456,87 km²
Pämez'	Juhana Juntunen; (semendku 2023—)
Telefonkod	+358-
Aigvö	tal'vel UTC+2,; kezal UTC+3

Lidnankundan sijaduz agjas i valdkundas (2020)

Kuhmo (mugažo suomen i ročin kelil) om Suomenman lidn da lidnankund valdkundan keskuzpalan päivnouzmas. Se om Kainu-agjan kahtenz' lidn kahtespäi eläjiden lugun mödhe.

Istorii

Municipalitetan aluz om pandud vl 1865, sen oficialine nimituz oli Kuhmoniemi edel 1937. vot. Tal'vsodan aigan (1939−1940) alištui bombardiruindale 48 kerdad NSTÜ:n polespäi, torad mäniba kümnes kilometras. Kuhmo sai lidnan statusad vl 1986.

Kuhmo šingotase mecan ümbriradmižel (pertid parzišpäi, puelementad, puižed CVT-apakod, pilindmaterialad), energijan pästandal mectegimišton jändusišpäi, maižandusel i turizmal. Lidnan «Woodpolis»-keskuz šingotab pusauvondad i opendab neciš sarakos. Kamermuzikan kezaline jogavozne festival' oleskeleb vspäi 1970. «Kalevala»-külä om mel'heižtaho turistoiden täht.

Geografijan andmused

Lidn sijadase agjan suvipäivnouzmas, Lammasjärven suvipäivlaskmaižel randal (47 km², 162 m ü.m.t.), Oulujärven basseinas.

Matkad Venäman röunhasai om 70 km päivnouzmha, Vartius-kontrol'punkt om olmas röunmal municipalitetan pohjoižpäivnouzmas (avtote i «Kajani — Kostamukš»-raudte). Matkad agjan Kajani-keskushesai om 88 km päivlaskmha orhal vai 102 km avtol, Hel'sinki-pälidnhasai om 500 km suvipäivlaskmha orhal vai 594 km avtotedme. Lähembaižed lidnad oma Nurmes (Pohjoižkarjal) 68 km suvhe-suvipäivlaskmha orhal vai 80 km avtotedme, i Kostamukš (Venäma) 70 km pohjoižpäivnouzmha orhal vai 100 km avtotedme.

Vn 2022 andmusiden mödhe lidnankundan pind om 5 456,87 km² (12. sija valdkundas), sidä kesken kuivma — 4 806,45 km², vezi da sokaz tahond ottas 650,42 km² (enamba mi 600 järved).

Tobmuz

Kuhmon municipaline suim kogoneb 35 ezitajaspäi.

Edeližed lidnan pämehed oma Tütti Määttä (Tytti Määttä, viluku 2018 — tal'vku 2022), Eila Valtanen (radoi vll 2004−2017).

Eläjad

Vn 1980 lidnankundan eläjiden lugu oli 13 900 ristitud (kaikiš suremb ristitišt vspäi 1980), vl 2000 — 11 167 ristitud, vl 2010 — 9 492 ristitud, vl 2020 — 8 187 ristitud. Ristituiden kaks' koumandest eläb municipalitetan keskuses.

Kodikel' (2016): suomen kel' — 98,0 %, ročin kel' — 0,1 %, toižed keled — 1,9 %.