Ivanovo

Ivanovo
Иваново
Lidnanznam;	Flag;
Valdkund	Venäma
Eläjiden lugu (2022)	399,983 ristitud
Pind	104,84 km²
Pämez'	Vladimir Šaripov; (kül'mku 2016—,; Владимир Шарыпов)
Telefonkod	+7−4932-xxx-xxx
Avtokod	37
Aigvö	UTC+3 (MSK+0)

Ivanovo (ven.: Ива́ново) om lidn da lidnümbrik Venäman päivlaskmas. Se om Ivanovon agjan pälidn da kaikiš suremb lidn. Om ümbärtud Ivanovon rajonan territorijal, sen administrativine keskuz (ei ole rajonan palaks).

Istorii

Lidnan aluz om pandud vl 1871 enččen Ivanovo-külän (om tetab 15. voz'sadaspäi) da Voznesenskii-posadan sijas. Vhesai 1932 nimitihe lidnad Ivanovo-Voznesensk:aks.

Ivanovon ižandusen znamasižed sarakod oma tekstil'tegimišt, sömtegimišt, mašiništonsauvomine (mašinad programohjandusenke, avtolibutimed), turizm i torguind.

Geografijan andmused

Lidn sijadase vanoikahas tahondas, seižub Uvod'-jogen molembil randoil (Volgan bassein), 120 m ü.m.t. keskmäižel korktusel. Varatoittas vedel Uvodin vezivaradimespäi.

Matkad Moskvhasai om 290 km suvipäivlaskmha. Lähembaižed järedad lidnad oma Vladimir 103 km suvhe orhal vai 115 km avtotel, Jaroslavl' 100 km lodeheze orhal i Kostrom 100 km pohjoižhe.

Klimat om ven kontinentaline. Voden keskmäine lämuz om +4,3 C°, kezakun-elokun +16,7..+18,8 C°, tal'vkun-uhokun −7,7..−12,0 C°. Ekstremumad oma −46 C° (viluku) i +38 C° (eloku). Kezaaigan minimum om −4 C° (kezaku), tal'vaigan maksimum om +7 C° (tal'vku). Ei voi panda halad heinkus vaiše (minimum +2 C°). Paneb sadegid 620 mm vodes, enamba kezakus-elokus (66..85 mm kus) i redukus (63 mm), vähemba uhokus-keväz'kus (28..29 mm kus).

Tobmuz

**Ivanovon rajonad:**
1. Frunzen rajon
2. Oktäbrin rajon
3. Nevondkundaline rajon
4. Leninan rajon

Ivanovo jagase rajonikš vspäi 1936. Kaik om nell' administrativišt rajonad vspäi 1979, käskusenandai tobmuz om ühthine.

Eläjad

Ivanovo om levedali tutab valdkundas kut «Venäman tekstiline pälidn» (Текстильная столица России) i «Neičeižiden lidn» (Город невест).

Vn 2010 Venäman rahvahanlugemižen mödhe lidnan eläjiden lugu oli 408 330 ristitud. Kaikiš suremb lidnan ristitišt oli läz 480 tuhad eläjid vozil 1987−1993. Läz 650 tuhad ristituid elädas lidnaglomeracijas, hö ottas koume videndest agjan ristitištos.

Ortodoksižen hristanuskondan läz nell'kümned pühäpertid^[1] oma kaičenus i saudud lidnas: Jumalanmaman Emäganpäivän kafedraline päjumalanpert' mez'jumalankodiš, Spasan Toižetamižen päjumalanpert', läz 26 jumalanpertid i üks'toštkümne časounäd. Riman katoline Sündun Voznesenjan tulendan jumalanpert' i protestantizman pühäpertid om saudud lidnas. Islaman pämečet' om avaitud vl 2003.

Kaik seičeme ičevuittušt üläopendusen aluzkundad ratas Ivanovos: Ivanovon valdkundaline universitet^[2], politehnine, himiž-tehnologine i energetine universitetad, medicinine, maižanduz- i lämoipalonvastaižpäzutandakademijad.

Transport

Avtobusad, trolleibusad da taksid oma kundaližeks transportaks lidnas. Raudtestancii om avaitud vspäi 1894 «Moskv — Kinešm»-raudtekeskustal. Ivanovo om järed raudtesol'm, sortiruindstancii radab, om raudteid Moskvaspäi Vladimiran kal't i Jaroslavlihesai.

Kaik koume lendimportad oma saudud, no vaiše Ivanovo-Suvine-lendimport^[3] (ИВВ / IWA / UUBI, 68 tuh. passažiroid vl 2021) om federaline civiline. Se sijadase seičemes kilometras suvipäivlaskmha lidnan keskusespäi. Tehtas reisid Piterihe i Sočihe, om sezonreisid Kaliningradannoks.

Galerei

Lidnan tobmuden sauvuz Revolücijan torgul (2016)
Spasan Toižetamižen päjumalanpert', vn 2015 nägu
Vvedenskii-naižjumalankodi i Jumalanmaman Tulendan Pühäpertihe jumalanpert', vn 2015 nägu
Bumagtehnižiden tegesiden fabrik vl 2018
Sur' Ivanovon manufaktur vl 2018
Ivanovon valdkundaline universitet, päine sauvuz (2020)
Ivanovon valdkundaline teatraline kompleks (vai Čomamahtoiden pert'kulu, 2015)
«Serebränii gorod»-torguimižbobuštuzkeskuz (2015, Hobed lidn, om avaitud vl 2002 kudondfabrikan sauvuses)
Ivanovo-Suvine-lendimportan terminal vl 2010
Ivanovo-päraudtestancijan sauvuz vl 2021

Homaičendad

↑ Ivanovon pühäpertid sobory.ru-saital. (ven.)
↑ Ivanovon valdkundaližan universitetan sait (ivanovo.ac.ru). (ven.) (angl.)
↑ Ivanovo-lendimportan sait (ivanovo.aero). (ven.)

Irdkosketused

Ivanovo Vikiaitas

	Ivanovon agjan lidnad
	Furmanov \| Gavrilov Posad \| Ivanovo \| Jurjevec \| Juž \| Kinešm \| Kohm \| Komsomol'sk \| Navoloki \| Plös \| Privolžsk \| Pučež \| Rodniki \| Šui \| Zavolžsk \| Teikovo \| Vičug

	Venälaižen Federacijan subjektoiden pälidnad
	Abakan \| Alauz'lidn \| Anadir' \| Arhangel'sk \| Astrahan' \| Barnaul \| Belgorod \| Birobidžan \| Blagoveščensk \| Bränsk \| Čeboksarad \| Čeläbinsk \| Čerkessk \| Čit \| Elist \| Gatčin \| Gorno-Altaisk \| Groznii \| Habarovsk \| Hanti-Mansiisk \| Irkutsk \| Iževsk \| Ivanovo \| Jakutsk \| Jaroslavl' \| Jekaterinburg \| Joškar-Ol \| Kaliningrad \| Kalug \| Kazan' \| Kemerovo \| Kirov \| Kizil \| Kostrom \| Krasnodar \| Krasnogorsk \| Krasnojarsk \| Kurgan \| Kursk \| Lipeck \| Magadan \| Magas \| Mahačkal \| Maikop \| Moskv \| Murmansk \| Nal'čik \| Nar'jan Mar \| Novosibirsk \| Omsk \| Orel \| Orenburg \| Penz \| Perm' \| Petropavlovsk Kamčatkal \| Petroskoi \| Piter \| Pskov \| Rostov Donal \| Räzan' \| Salehard \| Samar \| Saransk \| Saratov \| Siktivkar \| Simferopol' (de fakto) \| Sevastopol' (de fakto) \| Smolensk \| Stavropol' \| Sur' Uz'lidn \| Suvisahalinsk \| Tambov \| Tomsk \| Tul \| Tver' \| Tümen' \| Uf \| Ulan Ude \| Ul'janovsk \| Vladikavkaz \| Vladimir \| Vladivostok \| Volgograd \| Vologd \| Voronež

[1] Ivanovon pühäpertid sobory.ru-saital. (ven.)

[2] Ivanovon valdkundaližan universitetan sait (ivanovo.ac.ru). (ven.) (angl.)

[3] Ivanovo-lendimportan sait (ivanovo.aero). (ven.)

[1]

[2]

[3]