Barkisimeto
Lidnanznam
|
Flag
|
| Valdkund | Venesuel |
| Eläjiden lugu (2022) | 1,250,564 ristitud |
| Pind | 353 km² |
| |
| Pämez' | Luis Jonas Rejes (2017—, Luis Jonás Reyes) |
| Telefonkod | +58-(0)251 |
| Aigvö | UTC−4 |
Barkisimeto (isp.: Barquisimeto [baɾkisiˈmeto]) om lidn Venesuelan lodehes. Se om valdkundan nellänz' lidn eläjiden lugun mödhe, Lar-štatan administrativine keskuz da kaikiš suremb lidn, mugažo Iribarren-municipalitetan keskuz.
Istorii
[vajehta | vajehtada lähtetekst]Eländpunktan aluz om pandud vl 1552 samha kuldad. Vn 1812 manrehkaiduz mureni lidnad lujas.
Barkisimeto šingotase transportteiden sol'meks valdkundan keskuzpalan i päivlaskman keskes. Ümbriratas sadud tarbhaižid kaivatusud lidnan tegimil. Ižandusen toižed päsarakod oma sauvond, torguind, sömtegimišt (kofen edheotandad), metalltegesiden pästand valamižen mahtusel i mehanižel ümbriradmižel, nahkoiden i tabakan ümbriradmine.
Geografijan andmused
[vajehta | vajehtada lähtetekst]Lidn sijadase 566..940 m korktusil, 640 m ü.m.t. keskmäižel korktusel. Tobjan palan reljef om lapak. Matkad Karakas-pälidnhasai om 260 km päivnouzmha. Manrehkaidusiden magnitud voib sadas erasti vidhe..kudehe ballhasai.
Klimat om tropine pol'kuiv. Kun keskmäine lämuz om +20..+22 C° tal'vkus-uhokus i +23..+26 C° voden toižen aigan. Paneb sadegid 543 mm vodes, vähemba tal'vkus-keväz'kus (7..25 mm kus).
Tobmuz
[vajehta | vajehtada lähtetekst]
Lidnan territorii mülütab kümne nimitadud tulendad: seičeme oma Irribaren-municipalitetas i koume Palavecino-municipalitetas.
Lidnan tobmuz om kahtenvuitte. Irribaren-municipalitetan pämez' (isp.: alcalde de Iribarren) ohjandab Barkisimeton tobjal palal, administracii radab lidnan keskuzpalas. Sen pämez' om Luis Jonas Rejes (om valitud tošti voziden 2021−2025 strokuks). Palavecino-municipalitetan administracii sijadase Kabudare-tulendas lidnan suves, sen pämez' om Derbi Guedes (Derby Guedez, 2021−2025), edeline — Mirna Vies (2017−2021). Valitas pämehid i municipaližiden nevondkundoiden ühtnijoid kaikel rahvahal nelläks vodeks.
Eläjad
[vajehta | vajehtada lähtetekst]Vl 2011 lidnan eläjiden lugu oli 1 059 092 ristitud. Kaikiš suremb ristitišt om nügüd'. Enamba 1,8 mln eläjid om lidnaglomeracijas.
Valdkundaline Keskuzpäivlaskmaine universitet Lisandro Al'varadon nimed[1] (isp.: Universidad Centroccidental Lisandro Alvarado, UCLA) om alusenpandud vl 1962 koumeks profškolaks, nimitihe universitetaks vspäi 1967. Kaik kahesa valdkundališt i seičeme privatišt üläopendusen aluzkundad oma ezitadud lidnas niiden päkampusoikš vai filialoikš.