Teocrasia
La teocrasia (dal grego θεός (theós) "Dio" e κράτος (kràtos) "podere") ła ze ła forma de goerno drio ła cuała ła zestion de łe atività rełijoze e cuełe goernative làeghe łe coincide. De frecuente ła rełijon inte ła teocrasia ła divien un s-ceto strumento de ła pułìtega. Ła teocrasia ła diferise da ła ierocrasia, che ła ze invese un raporto fiołado intrà el goerno siviłe e cueło rełijozo.
Inte el senso pì comun del tèrmano teocrasia, inte el cuało racuanti goernanti siviłi i coinside co racuanti cai rełijozi (par ezénpio l'inperatore bizantin cofà cao de ła Ceza o el presidente de Cipro arcivéscovo Makarios III inte el perìodo 1960-1974), łe pułìteghe goernative łe coinside co cuełe rełijoze o sanò łe ze fortemente influensae dai prensìpi de na rełijon (de sòłito cueła pì difondesta inte el teritòrio intaresà) e tipegamente el goerno el declara de comandare par vołer de Dio (cofà ła major parte de łe monarchie medievałi eoropee, ma anca el regno de Fransa finmente a ła revołusion franseze) o de un altro podere superiore, cofà spesifegà da ła rełijon nasionałe.
Vołendo èsar pì precizi, teocrasia signìfega goerno de Dio o, da parte de Dio. Ne l'antigo Israełe, co che i Israełiti i zera el pòpoło de Dio, ła zera in vigor na teocrasia, el zera Dio el Lejislatore e cueło che el delibarava norme, règołe, leji e prensìpi oltre che legałi, de conportamento, etc., anca da ła parspetiva rełijoza. Senpre inte ła nasion de Israełe antiga, i sacerdoti no i gaveva da interferire inte łe cuestion pułìteghe e i Rè no i gaveva da ndar drento inte łe cuestion rełijoze.
El conceto moderno de teocrasia
[canbia | canbia el còdaxe]El conceto de teocrasia el ze sta conià da ło stòrego Juzepe Flàvio inte el I secoło. Eło el ghea defìnio cofà teocrasia el goerno tìpego dei Ebrei. La definision de Juzepe Flàvio ła ze sta anpliadamente acetada finmente a l'età de l'Iłumenismo, co che el tèrmano el ghea scumisià a recòlzer-sù conotasion pì universalìsteghe e ciaramente negative, specialmente inte łe òpare de Georg Wilhelm Friedrich Hegel. Dopo de sto cuà el tèrmano "teocrasia" el vegnea doparà soratuto par targar racuante partegołari forme pułìteghe cofà calcoza de "poco rasionałe" o "sotodesviłupà".
La teocrasia ła ze concepia in antìteze a ła democrasia, che ła fonda ła lejitimità del podere pułìtego e ła fonte del derito inte ła vołontà del popoło, e no inte el vołere de Dio. Le prime teorie de sto tipo łe połe èsar catae-fora in età moderna inte el pensiero de Marsìlio da Pàdoa.
El conceto de teocrasia el ze doparà tanto de frecuente anca in sociołozia, ma tanto raramente o mai el vien defìnio propiamente par un dòparo sientìfego.
Notasion
[canbia | canbia el còdaxe]
Altri projeti
[canbia | canbia el còdaxe]Wikimedia Commons el detien imàjini o altri file so teocrasia
Linganbi foresti
[canbia | canbia el còdaxe]- teocraziaTreccani.it – Enciclopedie on line, Istituto de ła Ençiclopedia Italiana.
- teocrazia, in Disionàrio de istòria, Istituto de ła Ençiclopedia Italiana, 2010.
- (EN) theocracyEnçiclopedia Britannica, Encyclopædia Britannica, Inc.
Controło de autorità | LCCN (EN) sh85134643 · GND (DE) 4185071-3 · BNF (FR) cb12653253c (data) |
---|