Imigrasion

Mapa del mondo, i paexi col blè pì scuro i xe cueli co pì imigrati (2005)

L'imigrasion xe el trasferirse par tenpo o par senpre de singole individui o de un grupo de anime inte un paexe o logo difarente da chelo de orixene. Sto fenomano xe el contraro de l'emigrasion. I pendolari, toristi e altri sojorni de curta durada, no i xe ciapai drento a la difinision de migrasion, ma a 'olte i vien ciapai drento inte ela de la migrasion stajonale de mandopara.

Statisteghe

Segondo un raporto del 2006 che provien da l'ONU so l'imigrasion a livel mondial, ghe xe sirca 200 milion de migranti in jiro pal mondo.

Sto qua che vien, el xe la persentuale e la proeniensa de imigrai, tolta sù inte el 2014, che ghè, inte i paexi sotoscrivesti:

Stato	Persentual	La major parte dei paexi de proeniensa
Lusenburgo	45,28 %	Portugal, Fransa, Italia
Spagna	10,06 %	Romania, Maroco, Ecuador
Austria	12,42 %	Xermania, Serbia, Turchia
Belxo	11,29 %	Italia, Fransa, Paexi basi
Xermania	8,68 %	Turchia, Italia, Polonia
Regno Unio	7,77 %	Irlanda, India, Pakistan
Italia	8,1 %	Romania, Albania, Maroco
Xvesia	7,12 %	Filandia, Irak, Polonia
Fransa	6,31 %	Alxeria, Maroco, Portugal
Paexi Basi	4,37 %	Turchia, Maroco, Indonexia

Pulitega de imigrasion inte l'Union Eoropea

La libara sircolasion de le anime, l'imigrasion e l'axilo pulitego, i xe i aspeti fondanti de la prosedura lejixlatia inte l'Union Eoropea. La libarta de movarse xe un dirito fondamentale e l'Union, ghin tien conto inte i so tratai.

L'imigrasion de tipo legale: L'Union Eoropea la dixe, inte i so tratai, le so condision par entrar e usir dai paexi menbri de st'ultima. I stati de l'Union i pole desidare la persentual de imigrai che i pole vegner drento. L'Union Eoropea ga el dirito de sostegnere nove riforme par sostegnere na integrasion favorevole da parte dei stati menbri inte i confronti dei migrai.
L'imigrasion iregolare xe una de le pì grande preocupasion de l'Union Eoropea. On imigrà iregolare xe na persona che riva inte l'UE sensa algun permeso o visto. In sti caxi, l'UE ga l'oblego de prevardare e scursar i numari de sto tipo de imigrasion, seguendo na pulitega de rinpatrii, inte el rispeto dei diriti fondamentali de l'omo e de la libara sircolasion.

L'UE ga el fin de balansar l'equilibrio tra imigrasion legale e ilegale, dando e asigurando la parità de tratamento de le anime proenienti da fora de l'Union, penalixando calsiasi ato rasista e ofensivo, oltre a promovare relasion senpre pì ligae tra i stati membri e i paexi da andove i imigrai pronjien. Segondo el Tratà de Lixbona, le puliteghe de imigrasion le sarà fate dal prinsipio de solidariedà e da l'equa distribusion inte i Stati membri, anca soto el profilo economego.

Cauxe

La cauxa del fenomano de l'imigrasion le pole esar tante e difarenti intrà de lore:

economeghe: (par scanpare a la poartà, par sercar condision de vita mejori e de conseguensa dasar el so paexe par catarghine uno mejo.);
de magnare: (par esar sensa magnar cusì tanto da no poer pì dar vanti a vivar);
climateghe: (a cauxa de caxini anbientali come co na tera taca vegner seca.);
puliteghe: (ditadure, persecusion, sopruxi, guere, xenosidi, pulisia etnega);
relijoxe: (se no xe pusìbiłe tegnerse e pregar la so relijion.);
sanitarie: (el s-ciopar de un epidemia o de na pandemia);
che le vien da pastroci naturali: (tsunami, alluvion, teremoti, carestie);
personali: (sielta ideoloxica, imoroxamento co un partner che stà inte n'altro paexe);
sentimentale: (riunificasion familiare);
criminale: (1) scanpare: (per scanpar a la xustisia del so paexe, par no esar inprixonà); (2) atrasion: (par conbinarghene de pì grose, no esendo sta contento del so laoro inte la so malavita);
par scola: (par nàr in na scola e otegnere un titolo de studio, par eser sicuro che i so fioi i vaga scola.).
in maniera forsada: (chi che migra, xe vitima de na trata de esari omàni).

Wikimedia Commons el detien imàjini o altri file so imigrasion
Scholia el detien schemi gràfeghi so Imigrasion

Controło de autorità	GND (DE) 4013960-8 · NDL (EN, JA) 00564038