Morgana

Morgana - Urta ğasır Awrupa xalqı riwäyätlärennän tılsımçı.

Riwäyätlärdä söylängänçä, tuğız bertuğan feyä Awalon atawınıñ (tatarçä — «Almağaçlar utrawı») xucabikäläre bulıp torğan. Alarnıñ Morgana isemlese turındağı xikäyätlär xalıq icatında ayıruça yış iskä alına.

İmeş, ber patşanıñ ulı tua, häm bäbi tuyına Awalon atawınnan da berniçä feyä çaqırıla. Alar bik mul büläklär belän kilälär, bäläkäy şahzadägä batır häm köçle bulsın, suğışta anı qılıç ta, söñge dä almasın, üze yaxşılıq häm ğädellek turında onıtmasın, digän teläklär telilär.

Ä feyalarnıñ Morgana isemlese bu şahzadägä qayçan da bulsa üzem büläk bulırmın, dip ömetlänä. Waqıtı citkäç, şahzadä anıñ atawında yäşi başlayaçaq häm anıñ berdänber yaratqan keşese bulaçaq, dip uylıy.

Menä şahzadä üsep citä. İl gizep, yartı dönyanı kürä, tormışı macaralar häm qurqınıç säyäxätlär belän tulı bula. Anıñ batırlığı häm citezlege turındağı xäbärlär böten dönyağa tarala.

Berwaqıt şahzadä Awalon atawı yanınnan yözep barğanda, Morgana anıñ qorabın batıra. Bu waqıtta inde şahzadä olığayğan, xälsezlängän bula. Şulay da utrawğa qädär yözep kilergä üzendä köç taba. Ğäcäyep matur baqçada printsnı haman da yäş häm güzäl bulıp qalğan Morğana qarşı ala. Qart şahzadägä ul ğaşıyq küzläre belän qarap tora. Annarı anıñ barmağına tılsımlı baldaq kiderä. Şahzadäneñ bökräygän arqası turaya, küzläre yana başlıy, ul üzendä köç häm qüät artqanın sizä. Bäxetennän nişlärgä belmägän prints şunduq üzeneñ tuğan ciren onıta. İmeş, Morgana belän alar äle dä Awalon utrawında matur ğına ğömer kiçerälär.

Тышкы сылтамалар

• Morgan le Fey at the Camelot project, University of Rochester: brief text and images