Saung
Saung (shed) nyaéta hiji wangunan leutik kawas imah ngan henteu weweg; gardu; ranggon.[1] Saung ilahar katempo di sawah atawa kebon, dimangpaatkeun pikeun ngaso, nungguan sawah, kebon, ingon-ingon, nunda pakakas, gemuk, jeung sajabana. Saung ogé nunjul kana wangunan pikeun ngiuhan ipukan atawa pabinihan sangkan henteu kabentrang teuing ku panon poé.[1] Ilaharna dijieun tina bahan kai jeung awi, hateupna maké jarami atawa daun eurih.[1]
Kiwari saung loba ogé dijieun pikeun rupa-rupa kabutuhan, saperti saung anu ngahaja dijieun pikeun nendeun runtah anu baris dijieun kompos.[2] Aya deui saung tradisional anu ngahaja dijieun di kota pikeun tempat usaha kuliner, sangkan béda tinulian ogé katempo asri kawas di kampung atawa di lembur.[3].Aya saung pikeun ngukut atawa miara bangkong [4]
Nincak umur paré geus culcel bijil buahna, di saung ogé mimiti haneuteun nu ngadon tunggu sawah ngagebahan hama manuk piit jeung sajabana.[5] Nu tunggu di saung ilaharna ibu-ibu jeung barudak, ku sabab salakina mah ngadon garawé di kebon atawa nyiar suluh.[5] Tunggu paré disaung téh ilaharna ti mimiti wanci pecat sawed nepika lingsir ngulon, mangsa geus surup panon poé kakara ninggalkeun saung baralik ka imahna séwang-séwangan.[5]
Saung henteu ngan aya di urang wungkul, di luar negri ogé aya saperti di Australia jeung New Zealand ogé aya.[6] Malahan mah aya majalahna judulna "The Shed" jeung buku anu judulna "Men and Sheds".[7] Dua-duana dikokolakeun ku hiji paguyuban (Australian Men's Shed Association) anu eusina rupa-rupa iber pikeun saha waé anu mikaresep ngeunaan saung.[8]
-
Saung urang Bali -
Saung urang Inggris -
Saung paranti neundeun suluh -
Saung paragi ngaso tur jajan -
Saung sawah di Bali
Dicutat tina
[édit | édit sumber]- ↑ a b c Dibrata, R.A. Dana (2009). Kamus Basa Sunda. Bandung: PT Kiblat Buku Utama. ISBN 9793631937.
- ↑ Suryati, Teti (2009). Bijak dan Cerdas Mengolah Sampah. Jakarta: AgroMedia. ISBN 9789790062184.
- ↑ Hendry E. Ramdhan, Malahayati (2009). 99 PELUANG BISNIS BUAT ANAK MUDA. Jakarta: Penebar PLUS+.
- ↑ Iswaring Pujaningsih, Retno (2007). Kodok Lembu. Jakarta: Kanisius. ISBN 9789792113082.
- ↑ a b c Zulvita,Nurbaiti Harun,Fetriatman, Eva (1993). Kearifan Tradisional Masyarakat Pedesaan Dalam Pemeliharaan Lingkungan Hidup di Daerah Propinsi Jambi. Bandung: Direktorat Jenderal Kebudayaan.
- ↑ "Best way to Build a Shed" (dalam bahasa en-US). Zacs Garden. https://zacsgarden.com/how-to-build-a-shed/. Diakses pada 2017-02-10
- ↑ Thomson, Mark (January 1998). Blokes and Sheds. HarperCollins Publishers PTY. ISBN 0207189161.
- ↑ Why every man needs time in a shed - The Telegraph