monsunklima

Monsunklima er ein variant av tropisk regnklima med regnfattig vinter. Monsun er ein type vind som skiftar retning med årstida. Asia blir ramma av den sterkaste monsunen, og her fører den fuktige lufta til ei fleire månader lang regntid.

Monsunklima skil seg frå savanneklima ved at årsnedbøren er større og/eller tørketida er mindre markert, slik at det kan vekse tropisk regnskog. Ordet monsunklima blir også brukt meir generelt om klimaet både i tropiske og tempererte monsunstrok.

Døme på monsunklima kan hentast frå India, som har ei kjølig årstid dominert av nordaust-monsunen, ei varm årstid når denne stilnar av, og regntid når oppvarminga av landet har kome så langt at sørvest-monsunen trengjer inn. Forutan i større delar av Sør-Asia finst monsunklima i mindre område av Afrika, Australia og Sør-Amerika.