Arto Paasilinna

Han arbeidde som journalist og avisredaktør i ymse finske aviser og tidsskrift i perioden 1963–1975. Han tok til å skrive dokumentar- og halvdokumentarforteljingar før han tok spranget over i romansjangeren, og debuterte som forfattar i 1972.

Paasilinna skaper gjerne historiene sine ut frå det som verkar som vanlege finske menneske og vanleg finsk daglegliv. Dette snur han på hovudet når han lèt personane boltre seg i dei mest utrulege hendingar, der grensene mellom røyndom og oppspinn blir oppheva. Bøkene hans blir dermed ofte karakteriserte som ei moderne form for eventyrforteljingar. Hovudkarakteren dreg saman med andre likesinna ut på vidløftige reiser, og han (sjeldan ho) reflekterer (på sin skjelmske og satiriske måte) over det han ser og opplever. Humor og fantasi er sentrale stilistiske verkemiddel hos Paasilinna.

I 1972 debuterte Paasilinna som forfattar med Operaatio Finlandia, men det var først med Jäniksen vuosi (1975) at suksessen kom for alvor. Denne romanen er omsett til ei lang rekkje språk og blir gjerne rekna som Paasilinna si viktigaste bok Boka, som også er filmatisert, fortel om redaktør Vatanen som byrjar å leve i skogen saman med ein hare. På norsk heiter boka Harens år og er omsett av Nøste Kendzior (2004).

Ulvova mylläri (1981, Den ulende mølleren, 2006) hentar handlinga si frå ei nordfinsk bygd like etter andre verdskrigen. Andre bøker ein kan trekkje fram, er kriminalkomedien Hirtettyjen kettujen metsä (1987; De hengte revenes skog, 2006), den morbidhumoristiske kollektivromanen Hurmaava joukkoitsemurha (1990; Kollektivt selvmord, 2007), den litt naive mannsfantasien Onnellinen mies (1976, En lykkelig mann), religionssatiren i Ukkosenjumalan poika (1984, Tordengudens sønn) og den underlege miksen av einebuartilvære, småkongefantasiar og dystopi i Maailman paras kylä (1992, Verdens beste bygd).

Arto Paasilinna var bror til forfatteren Erno Paasilinna og politikaren Reino Paasilinna.

• Finlands litteratur
• roman
• finsk

• Aschehougs forfattarside om Arto Paasilinna
• Biografiskt lexikon för Finland: Arto Paasilinna