Morlautre

Morlautre Schdadd Laudre
	Wabbe vunde ejemolisch Gmoind Morlautre
Heeh:	319 m ü. NN
Flesch:	4,52 km²
Oiwohna:	3075 (31. Dez. 2011)
Oigemaindung:	7. Juni 1969
Poschdlaizahl:	67659
Voawahl:	0631

49.4689957.765293319Koordinaten: 49° 28′ 8″ N, 7° 45′ 55″ O

Morlautre (amtlich Morlautern) is e Dorf wo im Norde vun Lautre laid. Die Morlautrer hon sellemols geh die Oigemändung geschdimmt, hat awwer nix geholf. Jetzt is Morlautre e Stadtdäl vun Lautre unn hat ca. 3000 Oiwohner.

Gschicht

Erschdi Erwähnung

Morlautre is erschdmols um es Johr 1215 urkundlisch erwähnt worr. De Enkel vum Barbarossa - Friedrich II - hat beschribb, dass Morlautre zum Kloschder vun Otterbersch gehere deet.

Die Schlacht vun Morlautre

Bei Morlautre in de Gemarkung "Berje" hats om 28., 29. und 30. November 1793 e graisslichi Schlacht gebb. Franzose hänn sich mit Preiße unn Sachse gekloppt. Des war kä schäni Sach. Des hat a so monchem Morlautrer es Läwe gekoschd. Desdeweh hat mer 1896 de Schlachteturm gebaut. Der erinnert on die Schlacht un is haid es Wahrzeische vun Morlautre

Hegschdes Feschd

Es hegschde Feschd im Dorf is die Morlautrer Kerwe. Des werd immer om Wocheend vum letschde Sunndach im Auguschd gefeiert. Do kumme alle Morlautrer aus de gonz Welt in ehr Dorf serick unn feiern dass die Schwart kracht. Es gäbbt a noch rischdische Staussborsch, e Kerwestrauss unn de Kerweparre halt Sunndags die Kerweredd. Kerwemondags werd in Morlautre so gut wie nix geschafft. Do sinn nämlich alle Lait uffem Frihschobbe. Dienschdags iss es gejammere gross. Do werd die Kerwe wonn's dungel werd begrab.

Werdschaft

Betriebe

Baure gäbbts laider nur noch im Neweerwerb.

Es gäbt awwer viele kläne unn middelstännische Betriewe. Unner onnerem e Apothek, Audohaus, Bäckereie, Baurelade, Doktore, Heizungsbauer, Frisere, Metzjerei, Modellbau, Physiotherapeude, Polschderei, Schlosser, Stämetz, Schparkassefiliale etc.

Gaschdstädde

Morlautre hat 2 Werdschafte unn e Hotel. Des is eischentlich e bissje wännisch fer so viel dorschdische Lait...

Utznoame

Jedes Dorf, jeder Ort in de Palz hat soi Utz-Noame weg. Die Morlautrer sinn die Hewwelritscher. Weil se owwe uffem Hewwel wohne unn im Summer gern de Hewwel runner uff die Wesch rutschen, nennt mer se die Hewwelritscher.