Stepanakert
Stepanakert (en armèni: Ստեփանակերտ, [stɛpʰɑnɑˈkɛɾt]), coneguda en azèri sou nom de Khankendi (Xankəndi) es una vila hantauma de la region istorica de Nagorno-Karabakh, dens l'estat d'Azerbaitjan. La vila èra la capitala de la republica de facto independenta d'Artzakh, dinc a l'ofensiva azèri de 2023. Se tròba sau versant orientau daus monts Karabakh, sus la riba esquèrra dau riu Karkar.
L'aira que vadot Stepanakert èra originaument un vilatge armèni nomenat Vararakn (Վարարակն). Durant la periòdi sovietica, Stepanakert hot causida coma nava capitala de l'Oblast Autonòm de Nagorno-Karabakh, pr'amor dau chaple recent per l'armada azèri de la populacion armènia de la capitala istorica de la region, Shoshí. Stepanakert vadot un centre d'activitat industriau, economica, e politica, incluent manifestacions demanant l'unificacion dau Haut Karabakh dab Armenia. Stepanakert sofrit damnatges extensius durant la dissolucion de l'union sovietica e de la purmèira guèrra dau Karabakh, e passèt sos las mans daus armènis locaus dab l'establiment de la Republica d'Artzakh.
Sos contraròtle armèni, la vila èra un centre regionau d'educacion e de cultura, sèti de l'universitat d'Artzakh, d'escòlas musicalas, e d'un palais culturau. L'economia locau èra basada sus l'indústria daus servicis, e avèva d'enterprisas variegadas, mai que mai dens la transformacion agroalimentari, la viticultura, e lo teishatge de seda. En 2021, Stepanakert avèva una populacion de 75,000 abitants.
Lo 29 de seteme de 2023, après meses de sèti seguits per de bombardaments intensius, las autoritats azèris prenoren contraròtle de la vila, la soa populacion quasi entèira avent hugit per Armenia.
