Coteu de combat
Un coteu de combat (var. cotèl, cotelh, cotèth, cotèu de combat[1]) es un coteu concebut per un usatge militar, particularament per lo combat raprochat. Derivat de las dagas, es apareissut durant la Prumiera Guerra Mondiala per remplaçar las baionetas qu'èran pauc adaptaas au combat dins las trencadas. Son usatge s'es generalizat a partir de la Segonda Guerra Mondiala e lo coteu de combat fai totjorn partia de l'equipament dau soldat moderne.
Los coteus de combat moderne an una lama ponchua e renforçaa d'una lonjor compresa entre 15 e 20 cm, una garda dobla per aparar la man dau portaire, una manilha destinaa a facilitar l'utilizacion de l'arma e un revestiment mat per limitar los rebats. Los materiaus utilizats per la fabricacion son chausits en foncion de sa resisténcia. Los coteus de combat son destinats au combat raprochat, mas son pereu d'esplechs utilitaris permetent de copar una larga gama d'objectes e de materiaus rescontrats sus lo prat batalhier o dins la vida quotidiana d'un militar.