Iglu
En Iglu is en Sneehuus, so as de Eskimos jem traditionell boot hebbt. De Eskimos hebbt normalerwies in Telten oder in Hüüs ut Grasbülten wahnt. De Iglus hebbt se vör allen boot, wenn se in’n Winter op Jachd gahn sünd un blot för en Tied ünnerkamen müssen. Vundaag doot all Eskimos in normale Hüüs wahnen, Holt un Steen köönt nu mit’n Schipp licht ranbröcht warrn. Fröher harrn de Eskimos meist keen Holt (blot Driftholt).
De Iglus is en lütte Kuppel ut Sneeblöck, de so openannerstapelt warrt, dat se sik gegensiedig afstütten doot. De Snee deit de Warms good isoleren. Dör de Körperwarms vun’n Minsch warmt de Binnenruum vun’n Iglu op un de Temperatur stiggt op so üm un bi 0 °C, ok wenn dat buten licht 50 °C minus warrn kann. De Temperatur an’n Bodden vun’n Iglus is meist knapp ünner 0 °C, wieder baven kann dat bet to 5 °C warm warrn. Slapen warrt denn normalerwies ok nich an’e Eerd, de Slaapplatz liggt wat höger. De Temperatur dröff natürlich to hooch wesen, ans smölt de Snee. Dorto kann de Temperatur reguleert warrn. De Iglu hett normalerwies en Lock an de Bavensied, dat apen un dicht maakt warrn kann, üm frische Luft in’n Iglu rintokriegen un to warme Luft ruttolaten. De Ingang is meist na buten ruttrucken, as en lütten Tunnel, dat de Wind nich so in’n Uglu rinneit. Tosätzliche Warms un en beten Licht kunn mit dat Qulliq, en Ööllamp, rinbröcht warrn. Dat weer ok mööglich, dat för een vun de Sneeblöck en Iesblock inboot worrn is, de denn as Finster ok Licht rinbröcht hett.
Dat geev ganz verschedene Typen vun Iglus. De Typ dee sik dor na richten, wo de Iglus för wesen schull. Dat geev eenfache, lütte Iglus, de blot as Nachtquartier för een oder twee Nachten bi de Jachd bruukt worrn sünd. Denn geev dat gröttere Iglus, de för en ganze Familie weren, de dor längere Tied leevt hebbt. De hebbt denn faken in Gruppen stahn un lütte Dörper billt. Dat geev aver ok richtig grote Iglus, de Platz för en gröttere Grupp Lüüd baden hebbt. De weren denn to’n Deel ok över jemehr Ingangtunnels ünnerenanner verbunnen un hebbt so gröttere Hüüs billt.
