David Randolph Scott

David Randolph Scott (* 6. Juni 1932 in San Antonio, Texas) is en ehmalger US-amerikaansch Astronaut un weer de söbente vun bither twalf Minschen, de up den Maand weern.

Leven

De Vader vun David Scott deen bi dat Air Corps vun de US Army. Van 1936 bit 1939 hett de Familie up de Philippinen, wiels den Tweeten Weltkrieg deen de Vader mehrere Johren in Europa, so dat David un sien Bröer alleen vun de Moder uptrucken wurrn.

Nah den Afsluss an de Western High School in Washington, D.C. hett Scott an de University of Michigan un de United States Military Academy in West Point studeert. As fievtbest vun 633 Absolventen verleet he de 1954 mit en „Bachelor of Science“. Ansluutend wurr he an de Webb Air Force Base in Texas as Pilot utbildt. Wiedere Statschonen weern de Laughlin Air Force Base in Texas un de Luke Air Force Base in Arizona.

Vun April 1956 bit Juli 1960 deen Scott as Jetpilot in Soesterberg in den Nedderlannen, wo he Kampfloogtüüch vun' Typ F-86 un F-100 fleegen dee. Nah sien Rückkehr in de USA studeer he an dat Massachusetts Institute of Technology Luft- un Ruumfohrttechnik, wo he je en Afsluss as Master of Science un Master of Engineering kreeg.

Nah sien Studium kreeg he en Inberopen as Dozent an de Air Force Academy, Scott kunn aber dörsetten, dat he an de Testpilotenschool up de Edwards Air Force Base versett wurr. Nahdem he den Kurs as Klassenbest afslooten harr, gung he an de nee apen maakt Aerospace Research Pilot School (ARPS) in Edwards. Bi en Notlannen mit en Starfighter keem he blots knapp mit dat Leven dorvan.

Gemini

Scott hett sück bi de NASA spoodriek as Astronaut bewurben un wurr an' 14. Oktober 1963 mit 13 annern as dart Astronautengrupp de Apenlichkeit vörstellt. As Spezialrebeet övernehm he af Februar 1965 de Missionsplanung un Navigatschoon.

An' 20. September 1965 wurr David Scott för den Ruumfloog Gemini 8 as Pilot indeelt. Scott würr bi dissen Floog ok en Weltruumutstieg dörführen. De Towiesen vun Scott weer wat verwunderlich, denn eegentlich harr man verwacht, dat de Ersatzpilot vun Gemini 5, Elliott McKay See nomineert würr. Somit keem Scott to en Insatz, ahn vörher in en Ersatzmannschap ween to hemm. He weer de Eerste vun de dart Astronautengrupp, de för en Insatz nomineert wurr.

Tosommen mit den Kommandanten Neil Armstrong, ebenfalls dat eerste Mal in' Insatz, is Scott an' 16. März 1966 to sien eerst Ruumfloog start. As dat plaant weer, hemm Armstrong un Scott in de Eerdumloopbahn en Rendezvous mit en tovör start Agena-Stuuf dörführt. Ansluutend gelung de beid to'n eersten Mal in de Ruumfohrthistorie en Kopplung in' Orbit.

Dör en Fehlfunktschoon vun en Stüerdüüs keem dat Gemini-Ruumschipp aber düchtig in't Taumeln, wat noch schlimmer wurr, as dat Ruumschipp vun de Agena trennt wurr. Armstrong un Scott weern in Levensgefohr, kreegen de Situatschoon aber weer ünner Kontroll. Wiel bi dit Manöver aber to völ Drievstoff verbruukt wurr, muss de Mission afbraken wurrn un en Notlannen inleit wurrn. Scott sien Weltruumutstieg full dordör weg.

Apollo

Fröhe Plaans

Noch wiels de Vörbereiten up den Floog vun Gemini 8 wurr Scott in dat Apollo-Programm inplaant. An' 25. Dezember 1965 wurr he as Ersatzpilot för den eersten bemannten Apollo-Floog vörsehen, wat an' 21. März 1966, kört nah de Landung vun Gemini 8 offiziell bestätigt wurr.

Nah en Umplaanen funn sück Scott an' 22. Dezember 1966 aber as Pilot vun de Hööftbesatten vun den tweeten bemannten Floog weer, bi den eerstmals de Maandlandefähre test wurrn sull. Sämtliche Plääns wurrn aber nah den Dood vun de Apollo-1-Astronauten an' 27. Januar 1967 up Ies leggt.

Apollo 9

An' 20. November 1967 geev de NASA wiedere Planungen bekannt. Scott weer nu Pilot vun dat Apollo-Ruumschipp, vun de Mission D, de in de Eerdumloopbahn de Maandlandefähre testen sull. Oorsprünglich sull disse Floog Apollo 8 heeten, nahdem en tovör nich plaant Maandfloog inschaaven wurr, kreeg de Mission de Beteken Apollo 9.

Tosommen mit Kommandant James McDivitt un den Maandfährenpilot Russell Schweickart is Scott an' 3. März 1969 to dissen Floog start, bi den to'n eersten Mal de Floogmanöver för en Maandlannen dörführt wurrn. An' 6. März keem Scott denn doch noch to en Weltruumutstieg, ofschons he noch mit dat Levenserhollenssystem vun dat Ruumschipp verbunnen weer. He stunn een Stünn in de Luke vun de Kommandokapsel un hett Schweickart sien Utstieg fotografeert.

An' fievten Floogdag wurr de Maandlandefähren mit Schweickart un McDivitt an Bord vun dat Kommandomodul, in dat sück blots noch Scott befunn, afkoppelt. Nah dat Testen vun de Maandfähre hemm de beid Ruumscheep weer ankoppelt, un Schweickart un McDivitt sünd weer to Scott in dat Kommandomodul steegen. Somit weer Scott ebenfalls an dat eerst Kopplungsmanöver vun twee bemannt Ruumscheep in' All bedeeligt, bi de de Besatten (anners as bi Sojus 4 un Sojus 5) direkt un ahn en Utstieg ünnernehmen to mööten, umstiegen kunn.

Apollo 12 un 15

Kört nah de Landung vun Apollo 9, an' 10. April 1969, wurr Scott as Kommandant vun de Ersatzmannschap vun Apollo 12 indeelt. Wenn Charles Conrad utfallen weer, harr Scott as dart Minsch den Maand betreden. Scott keem aber nich to'n Insatz un deen wiels den Floog in' November 1969 as (Capcom).

As dat denn vörsehn weer wurr de Ersatzmannschap vun Apollo 12 to de Hööftmannschap vun Apollo 15. Scott weer somit de eerst Astronaut vun de dart Utwahlgrupp, de en Ruumfloogkommando övernehm.

To sien darte Mission is Scott tosommen mit James Irwin un Alfred Worden an' 26. Juli 1971 start. An' 31. Juli hett Scott as söbent Minsch den Maand betreden, Irwin folg hüm nah, wiels Worden wiederhen mit dat Ruumschipp um den Maand kreisen dee. Dat weer de eerste Maandfloog, bi de de wetenschaplich Siet en groot Rull speel. Scott un Irwin stunnd dorbi ok eerstmals dat Mondauto (LRV) to Verfügung, wodör gröttere Strecken as bither torüchleggt wurrn kunnen.

Kört bevör Scott un Irwin weer in de Maandfähre Falcon instiegen deen, hett Scott mit en Falkenfedder un en Hammer wiesen kunnt, dat de Fallgeschwindigkeit vun en Objekt in en Vakuum unafhängig vun sien Masse is.

De Breefmarkenschandaal

All kört nah de Lannen weer de kumplette Mannschap vun Apollo 15 as Ersatzmannschap för den letzten Maandfloog Apollo 17 indeelt wurrn. In den Loop vun dat folgen Johr wurr aber hör Verwicklung in den Breefmarkenschandaal vun Apollo 15 bekannt. Scott, Irwin un Worden harrn Breefumschlääg mit up ehr Floog mitnommen, de nich utdrücklich genehmigt wurrn weern, un de later vun en düütschen Händler verköfft wurrn. Gegen de dree Astronauten wurr en Disziplinarverfohren inleit, un an' 23. Mai 1972 wurrn se as Ersatzmannschap för Apollo 17 afsett. Dormit weer ok klor, dat dat för de dree Astronauten kein wiedere Mission geven würr, aber se sünd wedder veroordeelt, noch vun dat Astronautenkorps oder sogor vun de NASA utslooten wurrn.

Nah de aktiv Tiet

In' Gegensatz to Irwin bleev Scott tonächst bi de NASA un hett in dat NASA Flight Research Center, dat latere Dryden Flight Research Center up dat Gelände vun de Edwards AFB arbeit. He weer an de Vörbereiten vun dat Apollo-Sojus-Test-Projekt bedeeligt un is mehrere Male in de Sowjetunion reist. As hüm in' April 1975 de Leiden vun dat Dryden-Forschungszentrum anboden wurr, hett he de Air Force verlaaten un wurr NASA-Angestellter.

In' Oktober 1977 hett Scott de NASA verlaaten un sien eegen Firma, de Scott Science and Technology grünnd. In de Folgetiet weer he mehrere Male as technisch Berader in de Film- un TV-Industrie tätig: 1994/1995 för den Speelfilm Apollo 13, 1997 för de Reeg From the Earth to the Moon un 2005 för den Film Magnificent Desolation.

David Scott is schett un hett twee Kinner. He leevt un arbeit siet eenig Johren in London.

Literatur

David Scott, Alexei Leonow: Zwei Mann im Mond. Econ, Berlin 2004, ISBN 3-430-15975-X (Auch: Ullstein, Berlin 2006, ISBN 3-548-36827-1 (= Ullstein 36827)).

Weblenken

David Scott. Mehr Biller, Videos oder Audiodateien to’t Thema gifft dat bi Wikimedia Commons.

Biografieseite der NASA (englisch)
NASA-Videos vun dat Experiment mit Hammer un Fedder: 0,8 MB as MOV-Datei oder 6,2 MB as MPG-Datei