Bataillon
Bataillon is de Naam för en Militärverband bi de Strietkräft. Dor höört as Ünnerafdelen verscheden Kompanien oder Batterien vun en Truppenoort to. Düsse Kompanien un Batterien sünd unner Ümstänn ünnerscheedlich utrüst un paßt so tosamen, dat se alltohopen eerst richtig funkscheneren könnt. To dat Battaillon höört 300 bit 1.200 Suldaten to. Dat hangt vun de Truppenoort af. Dat Wachtbataillon bi de düütsche Bundeswehr hett mehr as 1.800 Suldaten. Dat sünd so veel, as bi en Regiment. De Naam kümmt vun de Traditschoon her. En Reeg Bataillonen sünd to en Regiment tohopenfaat.
Historie
[ännern | Bornkood ännern]Dat Woort „Bataillon“ kümmt vun dat italiensche Woort „battaglia“ (Slacht, Upstellen in de Slacht). Battaglione is de Afdelen, de för de Slacht upstellt wurrn is. In dat 15. un 16. Johrhunnert hett jede sülvstännige Bulten vun Suldaten to Foot in de Slacht, de veerkant uptreden dö, düssen Naam harrt (franzöösch: bataillon), egolweg, wie veel Suldaten dor nu bi weern. In Düütschland is to dat Bataillon dormols ok Veerbulten oder Gewaltbulten seggt wurrn. En enkelte Kompanie vun de Infanterie, de to de Slacht upstellt weer, heet just so „Bataillon“, as en ganz Regiment. Dat Woort keem mit de Hugenotten in dat 17. Johrhunnert ok na Düütschland. De nee Naam is dormols an Steed vun den olen Slachtbulten inföhrt wurrn, as bi de Infanterie de Slachtorden jummers mehr updeelt wuurn is up lüttjere Truppendelen. As Naam för Ünnerafdelen vun de Infanterieregimenter, wo jummers en Reeg Kompanien tohören döen, is de Bataillon in Frankriek 1635 inföhrt wurrn, in Preußen 1685 un in Öösterriek 1695.