Augustin Wibbelt

Augustin Wibbelt (* 19. September 1862 in Vüerremm; † 14. September 1947 ok dor) weer en westfäälschen Dichter. Boren weer he up den Wibbelthoff in Vüerremm. Dormals weer dat en Buurndörp in’n Oosten vun Aulen, hüdigendags höört dat to de Stadt Aulen hento. He weer dat 7. vun 10 Kinner vun de Familie Wibbelt. As he 12 Johr oolt weer, stüür em sien Vadder na de Latienschool in dat Nahberdörp Enniger. 1878 treed he in dat Gymnasium Carolinum in Ossenbrügge in. Vunwegen sien allerbest Abiturarbeit möss he keen mündlich Abitur maken un he dröff ok de Reed bi de Fierstunn holen. In dat Blatt stunn later to lesen: Wibbelt scholl sien Utspraak verbetern, vunwegen en noch allto düütlich hören kann, dat he ut dat Mönsterland kümmt. Augustin Wibbelt wörr 1888 kathoolschen Preester. Vun 1888 bet 1890 weer he Kaplan in Meurs in’t rhiensche Ruhrrebeet. Vun 1890 bet 1896 weer he Vikar in Mönster un denn Preester an’n Nedderrhien. Augustin Wibbelt is de bekanntste Schriever op Westfäälsch Platt.

Wat he schreven hett

Dat meist bekannte Gedicht vun Augustin Wibbelt is düt:

Dat Pöggsken

Pöggsken sitt in’n Sunnenschien,

O, wat is dat Pöggsken fien

Met de gröne Bücks!

Pöggsken denkt an nicks.

Kümp de witte Gausemann,

Hät so raude Stiewweln an,

Mäck en graut Gesnater,

Hu, wat fix

Springt dat Pöggsken met de Bücks,

Met de schöne gröne Bücks,

Met de Bücks in’t Water!

Weblenken

Augustin Wibbelt in de Datenbank Die niederdeutsche Literatur (hoogdüütsch)
Indrag to den Schriever in dat Westfäälsche Autorenlexikon (hoochdüütsch)
Augustin Wibbelt-Selschap (hoochdüütsch)
Augustin Wibbelt, Drüke Möhne (Gedichtvuördrag op YouTube)
Augustin Wibbelt, De Snieggel (Gedichtvuördrag op YouTube)