[go: up one dir, main page]
Lompat ke isi

Tuanku Tambusai

Wikipedia Minangkabau - Lubuak aka tapian ilimu
Infobox orangTuanku Tambusai
Biografi
Lahia5 Nopember 1784 Edit nilai pada Wikidata
Tambusai, Rokan Hulu Edit nilai pada Wikidata
Kamatian12 Nopember 1882 Edit nilai pada Wikidata (98 tahun (id) terjemahkan)
Negeri Sembilan Edit nilai pada Wikidata
Kalompok etnisUrang Minangkabau Edit nilai pada Wikidata
AgamoIslam Edit nilai pada Wikidata
Panghargaan

Tuanku Tambusai (lahia di Tambusai, Rokan Hulu, Riau, 5 November 1784 – maningga di Nagari Sambilan, Samananjuang Malayu, 12 November 1882 pado umua 98 taun) adolah surang ulama sarato salah surang pamimpin dalam parang Pidari.

Latar balakang

[suntiang | suntiang sumber]

Tuanku Tambusai lahia di Dalu-dalu, nagari Tambusai, Rokan Hulu, Riau. Dalu-dalu merupoan salah satu nagari padagang Minangkabau nan didirian di tapi Sungai Sosah, anak sungai Rokan. Tuanku Tambusai ba namo ketek Muhammad Saleh, nan sasudah pulang haji, dipanggia urang Tuanku Haji Muhammad Saleh.[1]

Tuanku Tambusai merupoan anak dari pasangan parantau Minang, Tuanku Imam Maulana Kali jo Munah. Bapak baliau barasa dari nagari Rambah nan bakarajo sabagai guru agamo Islam. Dek Rajo Tambusai bapaknyo diangkek manjadi imam lalu kudian manikah jo padusi disinan. Mande baliau barasa dari nagari Tambusai nan basuku Kandang Kopuh. Sasuai jo adaik Minang nan matrilineal, suku iko diturunannyo kapado Tuanku Tambusai.[2]

Samaso ketek Muhammad Saleh alah diajaan bapaknyo ilmu bela diri, tamasuak katangkasan naiak kudo, sarato tata caro banegara.[3]

Garakan Pidari

[suntiang | suntiang sumber]

Untuak mampadalam ilmu agamo, Tuanku Tambusai pai baraja ka Bonjol jo ka Rao di Sumatera Barat. Disinan baliau banyak baraja jo ulama-ulama Islam nan berpaham Pidari, sahinggo baliau mandapek-an gala pakiah. Ajaran Pidari sangek tatanam di dirinyo, sahinggo ajaran ko disebaan pulo di tanah kalahirannyo. Disinan ajarannyo sangek capek ditarimo dek masyarakaik banyak, sahinggo baliau banyak mandapek-an pangikuik. Samangaiknyo untuak manyebaan jo malakuan pamurnian Islam, mambueknyo baparang maislamkan masyarakaik di tanah Batak nan masih banyak manganuik pelbegu.[4]

Malawan Balando

[suntiang | suntiang sumber]

Pajuangannyo dimulai di daerah Rokan Hulu jo sakitarnyo nan bapusek di Bentiang Dalu-dalu. Sasudah tu baliau malanjuik-an palawanan ka wilayah Natal pado taun 1823. Taun 1824, baliau mamimpin pasukan gabuangan Dalu-dalu, Lubuak Sikapiang, Padanglawas, Angkola, Mandailiang, jo Natal untuak malawan Balando. Baliau sempat manunaikan ibadah haji sarato dimintak pulo dek Tuanku Imam Bonjol untuak mampalajari pakambangan Islam di Tanah Arab.[5]

Dalam kurun wakatu 15 taun, Tuanku Tambusai cukuik marepotkan pasukan Balando, sahinggo acok mamintak bantuan pasukan dari Batavia. Barakaik kacadiak-annyo, bentiang Balando Fort Amerongen dapek diancuaan. Bonjol nan alah jatuah ka tangan Balando dapek dirabuik baliak walaupun indak batahan lamo. Tuanku Tambusai indak mahadapi Balando sajo, tapi sakaligus pasukan Rajo Gedombang (regent Mandailing) sarato Tumenggung Kartoredjo, nan bapihak kapado Balando. Dek Balando baliau digala-i “De Padrische Tijger van Rokan” (Harimau Pidari dari Rokan) karano sangek sulik dikalahan, indak parnah manyarah, sarato indak namuah badamai jo Balando. Kataguhan sikapnyo dipacaliak-an jo caro manulak ajakan Kolonel Elout untuak badamai. Pado tanggal 28 Desember 1838, bentiang Dalu-dalu jatuah ka tangan Balando. Malalui pintu rahasio, baliau malolosan diri dari kapuangan Balando sarato sakutu-sakutunyo. Baliau maungsi sarato maningga di Seremban, Nagari Sambilan, Samananjuang Malayu pado tanggal 12 November 1882.

Karano jaso-jasonyo manantang panjajahan Balando, pado taun 1995 pamarentah maangkek baliau sabagai Pahlawan Nasional Indonesia.[6]

Rujuak-an

[suntiang | suntiang sumber]
  1. ↑ Muhammad Radjab, Perang Paderi di Sumatera Barat (1803-1838), Balai Pusataka, 1964
  2. ↑ Mahidin Said, Rokan : Tuanku Tambusai Berjuang, Sri Dharma N.V
  3. ↑ Soedarmanta, J. B.. Jejak-jejak Pahlawan: Perekat Kesatuan Bangsa Indonesia. 
  4. ↑ Dobbin, Christine. Gejolak Ekonomi, Kebangkitan Islam, dan Gerakan Paderi, Minangkabau 1784 – 1847. 
  5. ↑ Nain, Sjafnir Aboe, (2004), Memorie Tuanku Imam Bonjol (MTIB), transl., Padang: PPIM.
  6. ↑ "Riau Mandiri Online". Diarsipkan dari versi asli tanggal 2012-01-06. Diakses tanggal 2013-05-01. 


  Artikel batopik biografi tokoh Indonesia ko baru babantuak rancangan. Sanak dapek mambantu Wikipedia mangambangannyo.
Diambiak dari "https://min.wikipedia.org/w/index.php?title=Tuanku_Tambusai&oldid=3147175"