Simpang Ampek (kota)
| Simpang Ampek | |
|---|---|
| Nagara |  Indonesia |
| Provinsi | Sumatera Barat |
| Kabupaten | Pasaman Barat |
| Kecamatan | Pasaman |
| Peresmian ibu kota | 7 Januari 2004 |
| Dasar ukum | UU No. 38 Tahun 2003 |
| Zona wakatu | WIB (UTC+7) |
| Kode telepon | +62 753 |
Simpang Ampek[1][2] adolah sabuah kota kabupaten nan manjadi pusek pamarintahan Kabupaten Pasaman Barat di Provinsi Sumatera Barat, Indonesia. Sasuai namonyo, Simpang Ampek mampunyoi ampek pasimpangan pantiang di pusek kotanyo, yakni ka arah utara manuju Sungai Beremas, ka arah barat manuju Sasak, ka arah timur manuju Panti sakaligus dapek taruih ka Lubuk Sikaping, dan ka arah selatan manuju Bawan nan juo dapek taruik ka Lubuk Basung. Di tangah pasimpangan tasabuik batagak Tugu Tigo Tungku Sajarangan, nan manjadi landmark kota ko.
Pasaman Barat babatehan langsuang jo Kabupaten Mandailing Natal di Sumatera Utara. Latak geografis ko mambuek masyarakaik di Simpang Ampek amaik heterogen. Ampat suku bangso utamo adolah Minang dan Melayu Pesisir sabagai panduduak lokal, warga Mandailing nan datang dari Sumatera Utara sarato suku Jawa nan datang sabagai transmigran. Pasaman Barat marupokan daerah transmigran nan partamo di Sumatera Barat.
Sabagai pusek kabupaten, kini di Simpang Ampek alah tagak babagai kantua pamarintahan tamasuak di antaronyo kantua bupati, kantua DPRD, jo kantua Kejaksaan Nagari (Kejari) Simpang Ampek. Kota iko juo alah mamiliki duo rumah sakik iyolah RS Islam Ibnu Sina jo RSUD Simpang Ampek.[3] Di kota iko ado pulo paguruan tinggi swasta sarupo Sikolah Tinggi Agamo Islam (STAI) YAPTIP jo Sikolah Tinggi Ilmu Ekonomi (STIE) YAPPAS. Palabuahan udaro Pusako Anak Nagari nan talatak 7 km dari pusek kota iko alah malayani panabangan dari Kota Padang ka Simpang Ampek jo sabaliaknyo.[4]
Rujuakan
[suntiang | suntiang sumber]- ↑ AYO! Kembali Ke Ejaan Minang Archived 2014-10-24 di Wayback Machine.. Bukittinggi.com.
- ↑ Penyusunan Rencana Rinci Kawasan Kota Simpang Ampek Archived 2014-10-24 di Wayback Machine.. Situs resmi Pemerintah Kabupaten Pasaman Barat.
- ↑ "Data Rumah Sakit di Kabupaten Pasaman Barat". Diarsipkan dari versi asli tanggal 2015-01-03. Diakses tanggal 2019-03-06.
- ↑ Susi Air layani penerbangan Pasaman Barat-Padang
Pautan lua
[suntiang | suntiang sumber]- (Indonesia) Situs web resmi kabupaten Pasaman Barat Archived 2010-07-28 di Wayback Machine.
Pusek pamarintahan: Simpang Ampek | ||
| Kecamatan |  | |
