Kadokteran

Tungkek Aesculapius, simbol umum nan malambangan kadokteran.

Kadokteran (bahaso Inggirih: medicine) adolah ilimu jo praktik dari diagnosis, pangobatan, jo panagahan panyakik. Kato medicine barasa dari bahaso Latin medicus, nan aratinyo "dotor". Kadokteran tadiri dari baragam praktik parawatan kasihatan nan bakambang untuak mampatahankan sarato mamuliahan kasihatan jo panagahan sarato maubek panyakik. Kadokteran kontemporer manggunoan ilimu biomedis, panalitian biomedis, genetika, jo teknologi medis untuak mandiagnosis, maubek, jo managah cidera jo panyakik, biasonyo malalui ubek-ubek atau badah, tatapi juo malalui terapi nan baragam, antaro lain, psikoterapi, splint jo traksi lua, paralatan medis, biologis, jo radiasi ionisasi.

Kadokteran alah ado salamo ribuan taun, salamo tu sabagian gadangnyo adolah seni (area dari katerampilan jo pangatahuan) nan acok baubuangan jo kayakinan agamo sarato pilsapaik dari budayo satampek. Misanyo, saurang dukun ka manggunoan tanaman ubek jo badoa untuak cegak, atau filsuf jo dotor saisuak ka mangaluakan darah manuruik teori humoralisme. Pado abaik-abaik akhia, sajak muncuanyo ilimu pangatahuan modern, banyak dari kadokteran alah manjadi kombinasi antaro seni jo ilimu pangatahuan (baiak dasa jo terapan, di bawah payuang ilimu kadokteran). Sadang teknik jaik untuak badah adolah seni nan dipalajari malalui praktik, pangatahuan tantang apo nan tajadi pado tingkek sel jo molekuler pado jariangan nan dijaik muncua malalui ilimu pangatahuan.

Bantuak nan alun ilmiah dari kadokteran kini dikana sabagai pangobatan tradisional jo pangobatan rakyaik. Lai tatap umum digunoan jo atau sabagai ganti ubek ilmiah nan kudiannyo disabuik pangobatan alternatif. Misanyo, bukti efektivitas akupunktur itu "baragam jo indak konsisten" untuak kondisi apopun, tapi umumnyo aman kok dilakuan dek praktisi nan talatiah. Sabaliaknyo, parawatan di lua bateh-bateh nan aman jo manjua disabuik sabagai padukunan.

Cabang ilimu kadokteran

Profesi kadokteran dituntuik untuak dapek maagiah layanan kasihatan nan paliang rancak, apolai kini cakupan ilimu alah bakambang laweh. Ilimu kadokteran gigi, dan psikologi, walaupun acok dipisahan dari kadokteran umum, tatap manjadi bagian satu kasatuan ilimu kadokteran.

Surang dotor dapek mampunyoi kamampuan spesialisasi (alah manjalani pandidikan spesialisasi sasudah pandidikan profesi dotor) nan disabuik dotor spesialis, sarato subspesialisasi nan disabuik sabagai dotor konsultan. Panantuan spesialiasi, jo galanyo baragam di tiok nagara.

Spesialiasi diagnostik

• Laboratorium klinik adolah layanan diagnostik klinis nan maaplikasikan teknik laboratorium untuak mambuek diagnosis, dan manajemen pasien. Di Amerika Serikat, layanan ko ado di bawah pangawasan surang patologis (ahli patologi). Urang nan dapek bakarajo di bidang ko adolah staf nan paham jo teknologi kadokteran, di Indonesia Laboratorium patologi ko ado 2:

1. Patologi klinik
2. Patologi anatomi

• Radiologi bafokus pado pancitraan atau panggambaran tubuah manusia, misanyo jo sinar-X, CT-scan, USG (ultrasonografi), tomografi resonansi magnetik nuklir.

Disiplin ilimu pre-klinis

• Anatomi adolah ilimu nan mangkaji struktur, dan organisasi tubuah manusia
• Fisiologi adolah ilimu nan mangkaji fungsi baragam organ, dan sistem organ sarato interaksinyo dalam tubuah manusia
• Biokimia adolah ilimu nan mangkaji proses-proses kimia nan tajadi dalam tubuah manusia
• Histologi adolah ilimu nan mangkaji struktur mikroskopik, dan fungsi jariangan pambantuak, panyusun organ, jo sistem organ dalam tubuah manusia
• Farmakologi adolah ilimu nan mangkaji ubek-ubek, interaksi, dan efeknyo kapado tubuah manusia
• Patologi anatomi adolah ilimu nan mangkaji kalainan struktur mikroskopik, dan makroskopik baragam organ, dan jariangan nan disababkan panyakik atau proses lainnyo
• Patologi klinik adolah ilimu nan mangkaji kalainan nan tajadi pado baragam fungsi organ atau sistem organ
• Parasitologi adolah ilimu nan mangkaji panyakik-panyakik nan disababkan parasit
• Mikrobiologi adolah ilimu nan mangkaji panyakik-panyakik nan disababkan mikroba

Disiplin ilimu klinis

• Anestesiologi adolah disiplin ilimu nan mangkaji panggunoan anestesi.
• Dermatologi adolah ilimu nan mangkaji kulik, dan panyakiknyo. Di Inggirih, dermatologi adolah subspesialis dari kadokteran umum. Di Indonesia, spesialisasi ko digabungkan jo ilimu panyakik kelamin. Dotor jo spesialisasi ko diagiah gala SpKK (Spesialisasi Kulik jo Kelamin), nan kini lah baganti manjadi SpDV (Spesialisasi Dermatologi Venerealogi).
• Kadaruratan medis adolah ilimu nan bapusek pado diagnosis, sarato pananganan dari panyakik akut (sipaiknyo capek, sagiro) sarupo trauma. Ilimu ko juo baubuangan jo ilimu badah, pediatri, dan lainnyo.
• Kadokteran umum atau kadokteran keluarga manangani patolongan partamo untuak pasien jo masalah darurat, mamantau, dan mambina pasien jo masalah kronis (sipaiknyo lamo). Dotor kaluarga biasonyo dapek manangani 90% dari masalah kasihatan kaluarga (anak, urang gadang, manula baiak laki-laki ataupun padusi) jo indak musti marujuak ka dotor spesialis, baiak masalah akut atau kronis (panyakik lua (kulik, THT, mato, dll) jo panyakik dalam (jantuang, paru, dll)). Di Amerika Serikat, dotor nan tagolong generalist (sipaikyno umum) tadiri dari, pediatri: masalah anak, internis (ahli panyakik dalam): urang gadang, family physician (Dotor kaluarga): untuak sagalo golongan umua.
• Ilimu panyakik dalam bapusek pado masalah panyakik sistemik utamonyo pado pasien dewasa bak cando masalah panyakik nan dapek marusak saluruah tubuah. Ilimu ko banyak manurunkan subspesialis: (Indak sadoalah spesialisasi ko ado di Indonesia, caliak artikel dotor spesialis)
  • Endokrinologi
  • Gastroenterologi
  • Hematologi
  • Kardiologi
  • Kadokteran parawatan intensif
  • Nefrologi
  • Onkologi
  • Panyakik infeksi
  • Pulmonologi
  • Rheumatologi
• Neurologi adolah ilimu nan mangkaji tantang panyakik saraf. Di Inggris, spesialisasi ko ado di bawah kadokteran umum.
• Obstetrik, dan ginekologi (di kalangan dotor acok disingkek obgin). Dalam bahaso Indonesia disabuik ilimu kabidanan, dan panyakik kanduangan. Masalah ubek reproduksi, jo ubek kasuburan sacaro umum ditangani dek spesialis ginekologi.
• Parawatan pananganan pasien adolah cabang baru dari ilimu kadokteran nan manangani parawatan, dan maagiah dukuangan emosional pasien jo panyakik nan parah bak cando kanker, dan gagal jantuang.
• Pediatri adolah ilimu nan mangkaji masalah panyakik pado bayi, dan anak. Bak cando pado ilimu panyakik dalam, disiplin ko mampunyoi banyak subspesialis bak cando untuak bidang kardiologi, endokrinologi, gastroenterologi, hematologi, onkologi, oftalmologi, dan neonatologi.
• Talingo iduang Tenggorok Badah Kapalo Lihia (THT-KL): ilimu kadokteran nan mangkaji kasihatan talingo, proses mandanga, kasaimbangan, iduang, panapasan, tenggorok, kalainan suaro, gangguan malulua, jo adonyo tumor di daerah lihia, jo wajah.
• Kadokteran rehabilitasi medis atau disabuik juo fisiatri mangkaji pabaikan fungsional tubuah dari cidera atau kalainan kongenital.
• Kadokteran preventif adolah cabang dari ilimu kadokteran nan bapusek pado panagahan panyakik.
• Psikiatri atau ilimu kadokteran jiwa.
• Terapi radiasi bapusek pado panggunoan radiasi untuak terapi.
• Radiologi mangkaji interpretasi dari pancitraan medis dari baragam media bak cando sinar X. Di Indonesia, dotor jo spesialiasi radiologi diagiah gala SpRad.
• Spesialisasi bedah mangkaji ilimu badah. Ilimu ko mampunyoi cabang spesialisasi bak cando badah ortopedik, badah urologi, badah saraf, dan lainnyo.
• Ilimu kadokteran manuruik gender, mangkaji sisi pabedaan biologi, dan fisiologi dari jinih kelamin, dan baa pangaruahnyo pado panyakik.

Cakupan antardisipliner

Ilimu kadokteran pun malaweh ka bidang lainnyo. Babarapo bidang alun tanamo di Indonesia.

• Bioetika adolah sabuah ilimu nan mangkaji ubuangan biologi, sains, kasihatan, etika, pilsapaik, jo teologi.
• Farmakologi klinis mangkaji ubuangan interaksi antaro ubek, dan tubuah pasien.
• Informatika kadokteran mangubuangkan dunia kadokteran jo dunia teknologi informasi.
• Kadokteran udaro mangkaji tantang kasihatan nan baubuangan jo panabangan, dan pajalanan udaro.
• Kadokteran evolusioner adolah ilimu kadokteran nan bakaik jo teori evolusioner.
• Kadokteran forensik mangkaji ilimu kadokteran nan bakaik jo masalah hukum bak cando panantuan wakatu, dan panyabab kamatian sasaurang pado sabuah kasus kriminal.
• Kadokteran konservasi adolah ilimu nan bakaik jo kasihatan manusia, dan binatang sarato kondisi lingkungan. Disabuik juo sabagai kadokteran ekologis atau kadokteran lingkuangan.
• Kadokteran olahraga manangani kasihatan olahragawan-olahragawan.
• Kadokteran salam membahas hal nan baubuangan masalah kasihatan pado panyalaman.
• Nosologi adolah bagian pangalompokan panyakik untuak tujuan tatantu.
• Teknik biomedis mangkaji aplikasi prinsip teknis untuak praktik kadokteran.