Poeta

ZE	Sta pagina a l'é scrita in zeneise, segondo a grafia unitäia

O poeta o l'é unna persoña ch'a studia e ch'a scrive de poexie. Sto termine o vëgne da-o grego ποιέω, ch'o veu dî "fâ". Un poeta o peu ëse solo che o creatô (pensatô, scrittô, scrittô de cansoin, ò autô) ch'o compoñe de poexie (parlæ ò scrite), ò o peu ëse ascì unna persoña ch'a reçita e seu euvie à un pubrico.

O travaggio de un poeta o l'é essençialimente un lou de communicaçion, d'esprescion d'idee segge inte un senso lettiâ (pe exempio, in sce un evento ò un pòsto speçifico), segge inte un senso metafòrico. Di poeti en existii fin da-a preistöia, inte squæxi tutte e lengue, e an produto di travaggi con unna gran diverscitæ inte coltue e periodi despægi. Inte ògni çiviltæ e lengua, i poeti an addeuviou unna divescitæ de stili che son cangiæ co-o tempo, co-o resultato de unna varietæ stramesuâ de poeti e da lettiatua che, con l'arrivo di scistemi de scrittua, an produto.

Stöia

A çiviltæ de Sumer a l'à fæto vegnî a poexia ben ben popolare e importante, dæto che tante poexie di tempi antighi ne vëgnan da Sumer. L'Epopea do Gilgamesh a l'ea un poema epico ben ben importante e assæ lezzuo inte l'antigo Levante. Sto poema o l'é stæto scrito pe-a primma vòtta do 2100 a.C. pöcassæ inta Tersa Dinastia de Ur, e de còpie do poema en anæte avanti à ëse pubricæ e scrite fin à quande o l'é anæto feua de stampa tra o 600 e o 150 a.C. pöcassæ. A Stöia de Sinuhe a l'ea un poema narrativo popolare de l'Antigo Egitto, scrito do 1750 a.C. pöcassæ, in sce un òmmo de l'antigo Egitto de nomme Sinuhe, ch'o scappa da-o seu paise, e donca o vive comme un forestê. L'é solo pöco avanti da seu mòrte ch'o torna into seu paise. A stöia de Sinuhe a l'ea un di tanti poemi narrativi popolari de l'Antigo Egitto, mascime into tempo do Regno de Mezo de l'Egitto. S'é ipotizzou che a Stöia de Sinuhe a segge stæta scrita da un òmmo egiçian de nomme Sinuhe, ch'o descrive a seu vitta into poema. Pe quello, se pensa che o Sinuhe o segge stæto unna persoña vea.

Inta Romma antiga, i poeti profescionisti ean pe commun sponsorizzæ da di patroin, di sostegnitoî ricchi, compreiso a nobiltæ e i fonçionäi militari. Pe fâ un exempio, o Gaio Cilnio Mecenate, amigo do Cesare Augusto, o l'ea un patron importante di poeti augustien, compreiso tanto o Oraçio comme o Vergilio. Incangio o Ovidio, un poeta ben consolidou, o l'ea stæto scorrio da Romma da-o primmo Augusto.

I poeti occupavan unna poxiçion importante inta soçietæ araba pre-islamica; o poeta, ò sha'ir, o fava o ròllo de stòrico, indovin e propagandista. Pâ che poule in löde da tribù (qit'ah) e e parodie in sce atre tribù (hija') seggian stæte tra e forme ciù popolare da primma poexia. O sha'ir o representava o prestigio e l'importansa de unna tribù individuale inta penisoa araba, e e battagge de poexia ean addeuviæ incangio de guære vee. 'Ukaz, unna çittæ de mercou no lontan da-a Mecca, a l'ospitava un festival de poexia regolare donde l'abilitæ di sha'ir a l'ea missa in exibiçion.

Inte l'Erta Etæ de Mezo, i troubador ean unna classe importante de poeti e ne vegnivan da di ambienti despægi. Viveivan e viægiavan inte tanti pòsti e ean tegnui pe di attoî ò di muxicanti tanto comme di poeti. De spesso ean sotta patroçinio, ma tanti viægiavan ben ben.

O periodo da Renascion o l'à visto unna continuaçion do patronato di poeti da-a parte de famigge reale. Tanti poeti, però, aivan de atre vivagne de guägno, pe exempio i italien comme o Dante de Ardighê, o Zane Boccasso e o Françesco Petrarca, che travaggiavan pe unna corporaçion de speçiæ, ò o William Shakespeare ch'o travaggiava into tiatro.

Into periodo romantico e ciù avanti, tanti poeti ean di scrittoî independenti che se guägnavan da vive pe mezo do seu travaggio, de spesso con l'azzonta do guägno de atre occupaçioin ò da famiggia. Tra questi gh'ea di poeti comme o William Wordsworth e o Robert Burns.

Çerti poeti, comme o Vergilio inte l'Eneide e o John Milton into Paradise lost invocavan l'aggiutto de unna Musa.

Instruçion

I poeti di tempi d'accai ean de spesso de persoñe ben ben instruie, ma di atri ean in larga mesua auto-instruii. Çerti poeti comme o John Gower e o John Milton an posciuo scrive de poexie inte ciù de unna lengua. Çerti poeti portogheixi, comme o Francisco de Sá de Miranda, an scrito no solo che in portogheise ma ascì in spagnòllo. O Jan Kochanowski o l'à scrito in polacco e in latin, o France Prešeren e o Karel Hynek Mácha an scrito di poemi in tedesco, sciben che ean sloven e ceco respettivamente. O Adam Mickiewicz, o ciù grande poeta de lengua polacca, o l'à scrito unn'öde latiña pe l'imperatô Napolion III. Un atro exempio o l'é o Jerzy Pietrkiewicz, un poeta polacco: quande o l'à fæto stramuo inta Gran Bretagna, o l'à ciantou de scrive poexia in polacco e o l'à comensou à scrive un romanso in ingleise; o l'à traduto ascì da poexia in ingleise.

Atri progetti

Altri progetti

• Wikimedia Commons

• Wikimedia Commons a contêgne di files in sce poeta