Caniformia

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De Caniformia of Canoidea zeen ein vanne twieë óngerorde (sómtieds opgevatj es 'n superfemielje) oete orde vanne roufdere (Carnivora). Toet dees óngerorde behuuere de hóndjechtige en häör verwantje, wie baere, marterechtige, wasbaeren enne verwantje enne zieëroufdere. De anger óngerorde is de Feliformia of Feloidea, wotoe ónger anger de katechtige behuuere.

Toete Caniformia behuuere de volgendje femieljes:

• Hóndjechtige (Canidae)
• Baere (Ursidae)
• Zieëhónj (Phocidae)
• Walrusse (Odobenidae)
• Oearrobbe (Otariidae)
• Marterechtige (Mustelidae)
• Stinkdere (Mephitidae)
• Klein panda's (Ailuridae)
• Wasbaerechtige (Procyonidae)

Caniformia en Feliformia versjille vanein inne vorm vanne bulla tympanica, 'n bolvörmige ruumdje bie ónger anger roufdere die 't middenoear ómvatj. Bieje Feliformia besteitj de bulla tympanica oet twieë kamere, bieje Caniformia oet ein kamer.

Toet dees óngerorde behuuertj zowaal 't kleinste roufdeer, de wezel (Mustela nivalis) es 't grótste, de zujelike zieë-elefant (Mirounga leonina). Ouch de grótste landjroufdere, de Kodiakbaer (Ursus arctos middendorfii) ennen iesbaer (Ursus maritimus) behuuere toet dees óngerorde. De óngerorde kump oearsprunkelik euvere ganse werreld veur (mit oetzunjering van Madagaskar, 't vastelandj van Australië en Nuuj-Zieëlandj en versjillige eilenj). Twieë saorte, d'n hóndj (Canis familiaris) en de fret (Mustela furo), zeen gedomesticeerdj gewaoren en versprèdj euvere ganse werreld.

Dees óngerorde wuuertj ouch waal "Hóndjechtige" geneump, meh det kan verwarring oplevere mitte femielje Canidae.