Linguas italica

La linguas italica es un sufamilia de la familia de linguas indoeuropean, e inclui la sugrupo latina (pe latina e sua desendentes, la linguas romanica) e otra linguas antica (vide a su). Venetica, la lingua de la venetica antica, ci ia abita la area de italia norde-este, es ance posible un lingua italica. Alga linguistes sujeste ce la lingua de la siculas en Sisilia es ance un posible lingua italica.

La lingua proto-italica es suposada la lingua parlada par la popla italica, cual ia abita la parte la plu grande de Italia en la edas aec. Lo es posible ce la orijina de la italicas ia es estra la penisola de Italia - la area de Slovenia moderne es sujeste - ma no forma de italica estra Italia es disponable. La esemplos scriveda plu antica de la linguas es de enscrives umbra e falisca de la sentenio sete aec.

La familia italica ave du ramos conoseda:

Latina-falisca
- Falisca† (parlada norde de la site de Roma)
- Latina (parlada en Italia ueste-sentral)
  - La linguas romanica
- Venetica† (un membro posible, parlada en Italia norde-este)
- Sicula† (un membro posible, parlada en Sisilia)
Osca-umbra (o Sabelica):
- Osca† (parlada en Italia sude-sentral)
  - Marusina†
  - Pelinia†
  - Sabina†
- Umbro† (parlada en Italia norde-sentral)
  - Marsa†
  - Pisena sude†*
  - Volsca†
  - Dialetos nonserta:
    - Vestina†
    - Ernica†
    - Ecua†

† Lingua estinguida.

* Nota ce pisena norde es un lingua minima atestada e probable no indoeuropean.

En cuando la Republica Roman ia estende sua domina political supra la tota de la penisola italian, latina ia deveni dominante supra la otra linguas italica, cual ia sesa es parlada a alga tempo en la sentenio un ec. De latina demotica, la linguas romanica ia emerji.